Issittumi Atlantikumilu avannarlermi aningaasaliinerit 27,,4 mia. kr.
Issittoq aamma Atlantiku avannarleq pillugu illersornissamut tunngatillugu isumaqatigiissut Naalakkersuisut oqaloqatiginerisigut inissinneqarpoq.
Issittoq pillugu isumaqatigiissut nutaaq saqqummiunneqarpoq. Nunanut allanut tunngasunut ilisimatusarnermullu naalakkersuisoq Vivian Motzfeldt naapertorlugu isumaqatiginninniarnerni Kalaallit Nunaat peqataatinneqarpoq.
Foto: Trine Juncher
Danmarkimi illersornissamut ministerip Troels Lund Poulsenip (Venstre) aamma nunanut allanut ilisimatusarnermullu naalakkersuisup Vivian Motzfeldtip (S) tallimanngornermi ualikkut illersornissaq pillugu isumaqatigiissut nutaaq saqqummiuppaat – isumaqatigiissut immikkoortoq 2 – Issittoq Atlantikullu avannaa 2025-miit 2033-mut sammineqassalluni.
- Isumaqatiginninniarnerni Kalaallit Nunaata peqataanissaa anguniarsimavarput. Nunatta illersorneqarnissaa isumannaatsuunissaalu eqqarsaatigalugit akisussaaffimmik tiguseqataarusuppugut, Vivian Motzfeldt oqarpoq, taassumalu oqaatigaa Kalaallit Nunaanni sakkussiornerulertoqarnissaa pineqanngitsoq.
Aningaasaliissutissat suliniutinut katillugit 27,4 milliarder koruuninik naleqartut nunami suliniutinik 2,5 milliarder koruuninik, imaatigut suliniutinik 22,3 milliarder koruuninik silaannakkullu suliniutinik 2,6 milliarder koruuninik aningaasartaqartussaapput.
Sakkutuut qullersaqarfiat nutaaq
Isumaqatigiissummi ilaatinneqarpoq Arktisk Kommandop ataani sakkutuut immikkoortortaqarfiata aaqqissuussaanerata tunngavilerneqarnissaa, Nuummi qitiusumik immikkoortortaqarfeqalernissaq aaamma Issittumi Tunngaviusumik Ilinniarfimmi droninik aqutsisinnaanermik ilinniartitsinerit nutaat atulernissaat.
Imarsiornerup iluani isumaqatigiissutip immikkoortuani siullermi januaari 2025-miit umiarsuarnut aalajangerneqartunut saniatigut Issittumi umiarsuarnik marlunnik allanik pissarsisoqassaaq. Tamatuma saniatigut Sikuki Nuuk Harbour suleqatigalugu Nuummi illersornissaqarfiup umiarsuaanut talittarfimmik nutaamik pilersitsisoqassaaq kiisalu umiarsuit sikusiutit aamma pissarsiarineqassallutik, taakku marloqiusamik atortutut innuttaasunut aamma atorsinnaassallutik.
Tunumi radarit nutaat
Silaannakkut angallannermi radarinut nutaanut - Tunumi silaannakkut angallannermi kalerrisaarinermut atortussanut aamma dronenik pisinissamut kiisalu Kangerlussuup mittarfiani pissutsit pitsaanerulersinnissaannut aningaasaliissuteqartoqarpoq.
Aammattaaq Sermitsiap allaasereriigaatut immap naqqatigut kabelimut nutaamut malussarissortalimmut aningaasaliisoqarpoq. Taassuma saniatigut immap naqqatigut kabelit marluk atoreersut nutaamik allamik ilaneqassapput, Kalaallit Nunaanni attaveqaatit pingaarutillit isumannaarneqassallutik.
Najukkami piginnaasat
Vivian Motzfeldt naapertorlugu Kalaallit Nunaanni suliniutit najukkami piginnaanngorsaaqataassapput.
- Nunami maani piginnaasatsinnik ineriartortitsinissaq soqutigilluinnarparput. Soqutigilluinnarparput aalisartut, nunaqavissut immaqalu kujataani savaatillit piginnaasaminnik ineriartortitsissasut, taamaalillutalu nunarput imarpullu nammineerluta nakkutigisinnaalerniassagatsigit. Sakkutuutut piginnaanernik ineriartortitsinertut ittuunngitsumik, kisiannili sakkutuujunngitsutut nakkutilliisutut piginnaanngorsaanissatut isigineqassapput, Vivian Motzfeldt oqarpoq nangillunilu:
- Umiarsuit nutaat kingusinnerusukkut uagut nammineq pigilissavavut, siunissami allanik taarsertussanngorpata. Tamanna isumaqarpoq imartatta nakkutiginissaanut uagut nammineerluta pigisaqalerumaartugut.
- Kunngeqarfiup ataani illersornissatsinnik ineriartortitsinissaq soqutigivarput, NATO-mi kunngeqarfik aqqutigalugu ilaagatta, akisussaaqataarusukkattalu. Illersornissamut pisariaqartumut peqataanissarput soqutigivarput. Nunarsuarmi pissutsit takutippaa tamatumunnga aamma ukkatarinnittariaqartugut, tamatumunngalu akisussaaqataarusuppugut.
