Ineqarneq pillugu suliami aaqqiagiinnginneq anaananut eqqugaaratarsinnaasunut sunniuteqarpoq

Kuserneq naartusunut angajoqqaanullu mikisunik meeralinnut eqqugaaratarsinnaasunut, meeqqamik pisariaqartitaannik isumaginnissinnaajumallutik immikkut tapersersorneqarnissamik sakkussanillu pisariaqartitsisunut, Kommuneqarfik Sermersuumit neqeroorutaavoq.

Neqeroorut nuunneqaqqissanersoq ukioq manna aappassaanik, Kommuneqarfik Sermersuumi politikerit pingasunngorpat ataatsimiinnerminni oqaluuserissavaat. Nuunnerup siulliup katsorsaariaatsit malunnartumik sunniuteqarfigisimavai, tassani nakuusernerit atornerluinerillu ajornartorsiutaasimasut sulisut nalunaarutigaat.

Tamanna kommunimi Meeqqanut, Ilaqutariinnut Atuarfeqarnermullu Ataatsimiititaliap oqaluuserisassaani atuarneqarsinnaavoq.

Ineqarnermut tunngatillugu suliaq najugaqarfiup upernaaq Ceresvejimit maanna Hans Egedesvejimut nuunneqarneranut pissutaavoq.

Suliffeqarfiup atorunnaarsitsinissaq kalerriutigaa

Najugaqarfik Ceresvejimi inissianik arlalinnik peqaraluarpoq, suliffeqarfiulli inissianik piginnittup kommunimut attartornermut isumaqatigiissutertik atorunnaarsinniarlugu kalerriutigaa.

Suliffeqarfik Namminersorlutik Oqartussanit ilisimatinneqarsimavoq pisortanit erniaqanngitsumik akiligassaqanngitsumillu taarsigassarsiat uterteqquneqassasoq, tassa inissiat najugaqarfimmit atorneqarmata.

AAMMA ATUARUK

Namminersorlutik Oqartussat piumasaqaateqareernerisa kingorna, attartortitsisut kommunimut taamaatitsinissaminnik ilimasaaripput

Tamanna pissutigalugu kommunip init attartortittakkat tamaasa annaajumanagit najugaqarfik nuuppaa,

Nuunnerulli kingunerisaanik ikiorneqarnissamik periarfissat ajorseriarsimapput:

- Sukkasuumik iluarsiisoqartinnagu sulisut sukumiisumik katsorsaasinnaanerat ajornartoorfeqartuarallassaaq.

- Taamaannera naartusunut eqqugaaratarsinnaasunut ilaqutariinnullu mikisunik meerartalinnut sullitarisaannut kiisalu sulisunut ajornaquteqanngitsumik ataqatigiissakkamillu suleriuseqarnissamik pisariaqartitsisunut kingunerluuteqarsinnaavoq, kommunip ingerlatsivia politikerinut ataatsimiititaliami ilaasortanut allappoq.

Kusernermi sulisut unammilligassaat arlallit ilanngussami allaaserineqarput. Ineqartut nutaat pissutigalugit nakuusertoqarsimavoq tamannalu sulisut aamma ineqartut akornanni aarlerinermik annertusisumik toqqissisimannginnermillu pilersitsisimasoq ilaatigut eqqaaneqarpoq.

Aamma Ikiaroornartumik ajornartorsiut takkuteqqippoq, siusinnerusukkut aqunneqarsinnaasimagaluartoq:

- Najugaqartut sulisullu immikkut sumiiffeqartinneqarnerat katsorsaanerup sukumiisup pitsaasullu pisariaqartinneqartup attatiinnarniarneqarnera ajornakusoortinneqarpoq.

Nooqqinnissaq

Taamaattumik sumiiffimmut allamut nuuttoqaqqinnissaa maanna eqqartorneqalerpoq:

- Sukumiisumik katsorsaasarneq najoqqutarisatsinnut tunngaviusup pilerseqqinnissaanut illumik nutaamik pissarsisariaqarpugut, tassanilu illumi sulisut, suliniutit assigiinngitsut najugaqartunullu katsorsaanissamik neqeroorutit ataatsimoortinneqassapput, soorlu siusinnerusukkut Ceresvej 9-mi taamaannikuusut.

Nutaamik inissiinissamut sumiiffimmik erseqqissumik ingerlatsivik tunngavissiinngilaq.