Inissiisarfiit nutaat illoqarfinni marlunni sanaartorneqassapput
Qallunaat naalakkersuisuisa Naalakkersuisullu pineqaatissinneqarsimasunut inissiisarfiit sumiinnissaat inissallu 70-it agguartaarnerat isumaqatigiissutigaat.
Inissat ilaat Nuummiissapput.
Assi: Leiff Josefsen
Danmarkimi naalakkersuisut Kalaallit Nunaanni pineqaatissinneqarsimasunut inissiisarfiit amerlinissaannut aningaasaliissuteqarput, maannalu taakkua sumiissanerat pillugit Naalakkersuisut isumaqatigiissuteqarfigaat.
Nuummi pineqaatissinneqarsimasunut inissiisarfiup allineratigut, Qaqortumi Sisimiunilu nutaarluinnarnik inissiisarfinnik sanaartornikkut inissat katillugit 70-it pilersinneqassapput.
Inatsisinik atortitsinermut ministereqarfik tusagassiuutinut nalunaarummi allappoq.
Inissat nutaat amerlasuut maannakkut pineqaatissinneqarsimasunut inissiisarfinni inissaaleqinermut aaqqiissutaassapput, aamma Naalakkersuisut sakkortuumik pinerluuteqarsimasunut sukannernerumik pineqaatissiisalernissamik kissaataannut piviusunngortitseqataassallutik.
Inatsisinik atortitsinermut ministereqarfik naapertorlugu inissat ima agguataarneqarput:
- Nuummi inissat nutaat 34-t. Taakku immikkoortortani ammasuni inissanik 16-inik aamma tigummigallarneqartussanut immikkoortortami matoqqasumi inissanik 18-inik agguarneqarput.
- Qaqortumi inissiisarfik nutaaq, inissanik allanngorarsinnaasunik, pillaatissanik atuinissamut aqutsivinnit assigiinngitsunit atorneqarsinnaasunik, 30-inik inissalik sananeqassaaq, tamatumalu peqatigisaanik inissiisarfik minnerusoq massakkut inissiisarfiusoq atorunnaarsinneqassaaq.
- Sisimiuni inissiisarfik nutaaq 25-nik allanngorarsinnaasunik inissalik pilersinneqassaaq, tamannalu massakkut inissiisarfiup atorneqartup, ullumikkut killilimmik tigummigallagassanngortinneqartunut immikkoortortaqartoq, atorunnaarsinneqarneranik kinguneqassaaq.
- Piffissami ikaarsaariarfiusumi Nuummi inissiisarfitoqqami utaqqiisaagallartumik inissat 12 pilersinneqassammata taakkununnga aamma ilaavoq, taakkulu ataavartussamik aaqqinnerit piareerneqarnissaasa tungaanut, artukkerneqarnermi ikiuutaasussaapput.
Naalakkersuisut isumaqatigiissutip inaarutaasumik inissisimanera naammasimaartorujuugaat naalakkersuisoq Naaja H. Nathanielsen oqarpoq.
- Qallunaat inatsiseqarnermut ministeriannik Naalakkersuisut pitsaasumik oqaloqateqartarsimapput. Inissat Qaqortumi, Nuummi Sisimiunilu inissinneqassasut isumaqatigiissutigivarput. Pinerluttunik Isumaginnittut suliap ingerlaqqinnerani najukkani inuutaasut kommuninilu sulisut pisariaqartinneqartumik ilanngutissagaat soorunami naatsorsuutigivarput, Naaja H. Nathanielsen oqarpoq.
Qallunaat naalakkersuisuisa Kalaallit Nunaanni eqqartuussiveqarnermut pitsanngorsaanissamut 2026-miit 2030-mut katillugit 850 millionit koruuninik immikkoortitsinissamik pilersaarut augustimi saqqummiuppaat.
Pinerluttulerinermut inatsit 2026-mi aasakkut allanngortinneqarpat pineqaatissinneqarsimasunut inissiisarfiit pisortatigoortumik taaguutaat parnaarussivinngussapput.
