Inatsisinik atortitsinermut ministeri Nunatsinniinnermini 850 millioninik aningaasaliiniartoq
Nunatsinni inatsiseqarnermut tunngasunut suliniutit nutaat inatsisinik atortitsinermut ministerip Peter Hummelgaardip naalakkersuisullu Naaja Nathanielsenip ataasinngornermi saqqummiuppaat. Politiit amerlanerusut, qarasaasiaqarnermut tunngasut Nuummilu politeeqarfik nutaaq suliniutinut ilaapput.
Foto: Morten Okkels
Danmarkimi inatsisinik atortitsinermut ministeri Peter Hummelgaardip (S) inatsisinik atortitsinermut naalakkersuisoq Naaja Nathanielsen (IA) peqatigalugu Nuummi Hans Egedep Illuani tusagassiortunik ataasinngornermi nalunaaqutaq 17.15 katersortitsivoq.
Kalaallit Nunaanni inatsisinik atuutsitsinermut suliassaqarfimmi piffissami nutaajunerusumi pitsanngorsaat annersaattut Danskit naalakkersuisuisa namminneq oqaatigaat.
– Nunat assigiinngissutaat ataqqillugit Kalaallit Nunaanni innuttaasut Danmarkimi innuttaasutut inatsisitigut isumannaatsumik kiffartuunneqarlutillu sullinneqassapput. Taamaammat inatsisinik atuutsitsinermut suliassaqarfimmi aningaasaliingaatsiarpugut, Peter Hummelgaard oqarpoq.
Ministerip 2026-miit 2030-mut 850 millionit koruuninik Kalaallit Nunaanni inatsiseqarnermut tunngasunut assigiinngitsorpassuarnut agguaassassanut immikkoortitsivoq.
Inuit amerlanerusut atortorissaarutillu pitsaanerusut
Aningaasat ilaatigut politiit unnerluussisullu amerlanerulernerannut atorneqassapput. Kalaallit Nunaanni Politiit ukiumut sulisut 31-nik amerlissapput, aamma Kalaallit Nunaanni eqqartuussiviit pitsaanerusumik qarasaasiatigut atortorissaaruteqalissallutik.
Ingammik pinaveersaartitsinermi eqqugaasullu illersortariallit, soorlu meeqqat, ikiorneqarnissaat immikkut pingaarnersiorneqassapput.
Peter Hummelgaardip saqqummiussamini Kalaallit Nunaanni eqqartuussiveqarnermut tunngatillugu unammilligassat ilisimaneqarluartut arlallit, ilarpassui Sermitisaami allaaserineqareersut, isummerfigivai.
Assersuutigalugu Nunnata Eqqartuussisuuneqarfiani eqqartuussisuuneq Stig Nørskov-Jensen qarasaasianik atortorissaarutinik pitsaanerusunik pisariaqartitsisoqartoq aasaq manna apersorneqarami oqarpoq.
Inatsisinik atortitsinermut ministeri Peter Hummelgaard aamma politiit unnerluussisullu suleqatigiinnerulernissaannut aningaasaleruusuppoq:
– Danmarkimi naalakkersuisut Nuummi politeeqarfimmik nutaamik pilersitsinissaq siunnersuutigaat, taamaalillutik politiit unnerluussisullu politeeqarfimmi ataatsimuulissallutik. Tamannalu immikkut ittumik pisariaqartitsiffiussaaq, ilaatigut Kalaallit Nunaanni Politiit Ilinniarfiannut, pigaartunut, isertitsivimmut il.il. ininik nutaanik, inatsisinik atortitsinermut ministeriaqarfik uppernarsaavoq.
Suliniutit nutaat allat tassaapput paasissutissanik nakkutilliisoqarfik nutaaq PET-illu sulinerata pitsanngorsarnissaa. Inatsisillut Kalaallit Nunaanni atuuttut nutarsarnissaat Danmarkimi naalakkersuisut aningaasaliiffigissavaat.
Aammattaaq politiini kalaallisut oqaasillit atorfinitsinnissaannut atorfimminniiginnarnissaanullu iliuuseqarnissaq pingaaruteqarpoq, ministeriaqarfik erseqqissaavoq. Ajornanngippallu unnerluussisussaatitaasunik Ilisimatusarfimmi inatsisilerinermik kandidatinngorsimasunik atorfinitsitsinissaq.
