Innaallagissiorfik sillimmat nutaaq 2028-mi

Angerlarsimaffiit iluini nillerneruleraluttuinnartillugu, radiokkut attaveqaatit qarasaasiatigullu attaveqaatit anngakaaneranni, Nukissiorfiit sulisut ulappupput innaallagiaqaleqqinnissaa sulissutigalugu.

Tassunga aamma ilaapput pisortat qullersat pilersuinermik suliffeqarfimmi. Sermitsiamit nukissiuuteqarnermut pisortaq aamma taassuma qanimut suleqataa, Nukissiorfiit teknikkikkut pisortaat naapippagut paasisassarsiorfigalugit.

AAMMA ATUARUK

Nukissiorfiit: Innaallagiaarunneq maanna nassuiarneqarsinnaalerpoq

Taakku oqaluttuarput sulisut ikigisassaanngitsut ulluni kingullerni ulloq unnuarlu  sulisimasut arfininngornermi ullaakkut innaallagissamik pilersuineq unimmalli, namminnerlu aamma ullut taakku ulloq unnuarlu sulisimallutik, maannali sinik amigaatertik angummaffigisimanerarpaat.

Pisoq immikkuullarissoq 

2021-mi politikerit Nukissiorfinniit ersarissumik nalunaarfigineqarput, taannalu pivoq innaallagissamik pilersuinerup kipinerata aammalu innaallagissiorfiup sillimmataaasup aallartinniarnerata ajornartorsiutigineqarnerata kingunerisaanik nassuiaammi allatullu paasineqarsinnaanngilaq mianersoqqussutaasoq iliuuseqartoqarnissaalu avaqqunneqarsinnaanngitsoq oqariartornertut.

AAMMA ATUARUK

Nukissiorfiit: Innaallagiaarunnermik aatsaat taamaattumik misigisaqarpugut

Kisianni maannakkut, tassa 2024-mi, sungaartumik mianersoqqussummik Nukissiorfiit politikerinut tunniussinngillat, Nukissiorfiimmi tungaanit toqqarpaat upperissallugu ilumut nukissiuuteqarnikuut pitsanngorsaanissaq annertusaanissarlu siunissami qaninnerusumi piumaartoq:

- Maannakkut qamittoorneq pillugu nalilersuileruttorpugut, kisianni maannangaaq oqarsinnaavugut qamittoorneq pisoq immikkuullarissuusoq, tassa Utoqqarmiut kangerluaarsunnguanit imermik nukissiorfiup attaveqaataata (transmissionslinje) nakkarneranik pissuteqartoq, matumanilu pingaaruteqarpoq erseqqissassallugu Utoqqarmiut Kangerluaarsunnguani erngup nukinga atorlugu nukissiorfik ajunngilluinnarmat, tamatigullu isumagineqarlunilu aserfallatsaaliorneqartarmat, nukissiuuteqarnermut pisortaq Johan Danielsen oqarpoq.

Kisiannimi siullermiinngilaq qamittoorneq, Nukissiorfiit tungaanit qulakkeerinnillusi oqarsinnaavisi siunissami taamatut pisoqaqqissanngitsoq?

- Nukissiorfinniit nukivut tamaasa atorlugit, ullut tamaasa, pingaartumillu sulisugut teknikkimik suliaqartut ajutoornernik pinaveersaartitsiniarlutik sulipput, kisianni qulakkeerinninnissaq ajornakusoorpoq. Matumani pisoq misigisimanngilarput, aamma isumaqarpunga qanorluunniit ilioraluarutta siumut takoreersinnaanngilarput ilimaginngisatsinnimmi pisoqarnissaa, Utoqqarmiut Kangerluaarsunnguanit erngup nukinga atorlugu nukissiorfiup attaveqaatai ukiut tamaasa misissuisarpugut, aamma ukiut tallimakkaarlugit annertuumik misissuinerit ingerlanneqartarput. Tamakku pissutissaqartitsisimanngillat kukkuneq tamanna takusinnaasimagipput,teknikimut pisortaq, Filip Sivertsen akivoq.

Innaallagissiorfik sillimmat nutaaq 2028-mi

Qulakkiikkamik neriorsuuteqartoqarsinnaanngikkaluartoq, Nukissiorfiit tungaannit Nuummi atuisunut nuannaajallatsitsinissaat qularnanngilaq, tassami innaallagissiorfik sillimmatitoqaq nutaamik taarserneqassammat  2028-mi.

2021-mi, aamma taamani innaallagiaq qamimmat, Nukissiorfiit piginnittumut ersarissumik oqaatigaat, innaallagissiorfik sillimmat aserfallassimammat aamma taamaattumik ikinniarnera sivisusimasoq.

Tamatumuuna maannakkut, tassa arfininngormat, aamma piffissaq sivisooq qaangiummat aatsaat innaallagissiorfik sillimmat innaallagissamik, kiassarnermik imermillu. Tassami suli innaallagissiorfimmi sillimmataasumi generatorit nutaanngitsut atorneqarput sulilu taarserneqarsimanngillat.

- Generatorit pisoqqat marluk suli pigaarput, kisianni aamma iliuuseqartoqarsimavoq, ilaatigut generatorinik containeriniittunik arfineq pingasunik Nuuk sumiiffinni assigiinngitsuni inissiisimasugut, taakkulu innaallagissamik pilersuileqqinnissatsinnut iluarsaassinermi ilapittuutaapput, taamaalilluta ajoqusertoqassagaluarpat generatorit taakku suli atorneqarsinnaassapput, nutaamik sillimmatitut innaallagissiorfimmik peqalernissatta tungaanut , Johan Danielsen nassuiaavoq.

Filip Sivertsen ilanngullugu erseqqissaateqarpoq, ajutoortoqartillugu, aammalu nukissiuutitigut pilersuineq ajutooqqatillugu, pilersuileqqinnissaq kittaartumik ingerlanneqartartoq, tassami ikummatissamik pilersuivimmi atortorissaarutit tulleriaarlugit aallartinneqartussaammata.

Pisumilu matumani tassa eqqumiitsumik pisoqarnerani, Nuummi innaallagiaq eqqumiitsumik pissuseqaleraluartoq pilersuineq suli ingerlasimavoq, uffa massa Utoqqarmiut Kangerluarsunnguani erngup nukinga atorlugu nukissiorfiup attaveqaatai ajutooqqagaluartut, nukissiorfiup piffissami qanittumi misissugassarigaa ilanngullugu ilisimatitsivoq.

- Taamaattumik sillimmatitut innaallagissiorfimmi pumpe-nik aallartitsiniarnitsinni ajornartorsiuteqarsimavugut, taakkulu aallartinneqarsinnaanngippata, taava innaallagissamik pilersuineq aallartinneqarsinnaanngilaq, taamatuttaaq atortorissaarutit motorinik kissassimaartitsisussat ilanngullutik qamissimagamik, taamaattumillu utaqqiisaarutaasumik innaallagissamik pilersuilernaveerneq sivitsortooraluarpoq. Kisianni nalinginnaasumik atortorissaarutit ajutoornermi piaartumik aallartinneqartussaapput, taamaattumik immikkut ittumik pisoqarsimavoq, teknikkimut pisortaq Filip Sivertsen nassuiaavoq.

Naalakkersuinermik tapersersuinermut upperinninneq

Nukissiuuteqarnermut pisortaq Johan Danielsen aamma teknikkimut pisortaq Filip Sivertsen Nukissiorfiit siunissaa pillugu neriuuteqarput. Tamanna 2021-imiit pingaarutilimmik allaaneruvoq, taamani Nukissiorfiit Politikerinut iliuuseqartoqarnissaanik kaammattuuteqarlutik erfalasoq sungaartoq amuaat.

- Matumani sanaartornermut inatsit aammalu pilersaarutit tigussaasut pigivagut, taakkulu naggataatigut qulakkeerinnissapput nukissiuutinik pitsaanerusumik pilersuineq anguneqarnissaanut, pingaartumik Nuummi, nutaamik atlantikukkoortaatinut mittarfittaaqqammertumut. Naalakkersuisoqarfik uagutsinnut attuumasoq suleqatigilluarparput, aningaasaliissutinullu tunngaasut aningaasanut inatsimmi atuutsilernissaq apeqqutaalluni anguniakkatsinnut iluatsittumik ingerlanissatsinnut maanna kisimi aalajangiisuussaaq, Nukissiorfiit qullersai marluk Danielsen aamma Sivertsen Sermitsiamut oqarput.