Nunamut namminermut Naalakkersuisup Jess Svanep borgmesterit
peqataaffigisaani naalakkersuinikkut ataqatigiissaarisut
ataatsimiinneranni BDO-p nalunaarusiaa saqqummiuppaa, kommunit
qangatut aaqqissuussaaqqilissappata allaffissornikkut ingerlatsinermi
aningaasartuutinik imaqartoq.
Nalunaarusiaq innuttaasunut
saqqummiunneqartariaqarpoq inuppassuit kissaatigimmassuk kommunit
maannakkut aaqqissuussaanerminniit avinneqassasut, Qeqqata Kommuniani
borgmesteri Malik Berthelsen (S) isumaqarpoq.
Nunamut namminermut Naalakkersuisup Jess Svanep borgmesterit
peqataaffigisaani naalakkersuinikkut ataqatigiissaarisut
ataatsimiinneranni BDO-p nalunaarusiaa saqqummiuppaa, kommunit
qangatut aaqqissuussaaqqilissappata allaffissornikkut ingerlatsinermi
aningaasartuutinik imaqartoq.
Nalunaarusiaq innuttaasunut
saqqummiunneqartariaqarpoq inuppassuit kissaatigimmassuk kommunit
maannakkut aaqqissuussaanerminniit avinneqassasut, Qeqqata Kommuniani
borgmesteri Malik Berthelsen (S) isumaqarpoq.
- Nalunaarusiap innuttaasunut saqqummiunnissaa pingaartuuvoq, naak naammaginninnermik misissuinerit takutikkaluaraat innuttaasorpassuit kommunit avikkusukkaat, qanorluunniit akeqaraluarpat, pissutsillu atugaat ajorseriarlutik.
- Taamaattumik Qeqqata Kommuniani kommunalbestyrelsemi aalajangerpugut kommunit avinneqarnissaat pillugu tikkuussisussamik innuttaasunik taasititsiniarluta. Tamannali pitinnagu nutaamik avitsinerup kingunerisassai pillugit innuttaasut qaammarsarneqassapput, Malik Berthelsen oqarpoq.
Sulisussarsiornermik
ajornartorsiuteqarneq
Naalakkersuisut
borgmesterillu naalakkersuinikkut ataqatigiissaarisuni ulluni
marlunni ataatsimiinneranni kommunit aaqqissuussaanerat, najukkami
sunniuteqarsinnaaneq, kommunit suliassaat, tamat
naalakkersueqataanerat, piginnittuuneq inatsisinillu tunngaveqarneq
pillugit workshopertoqarpoq, kommunit qanoq
aaqqissuunneqarsinnaanerat pillugu aqqutissat
saqqummiunneqartinnagit.
Kommunit suliassaat
pillugit workshopimi borgmesterit innuttaasunik kiffartuussisussanik
kommunit sulisussarsiornermik ajornartorsiuteqarnerat oqaluuseraat.
- Kommunit tallimaannaavugut, kommunillu ilaasa aamma avinngasussimasortaqartut isumaginninnermi, ilinniartitsinermi allanilu sulisussanik ilungersunartorsiorneq misigaat, aamma IT-p, inatsisilerinerup aningaasaqarnerullu iluani. Taamaattumik takorlooruminaatsupilussuuvoq maannakkut kommunit suli amerlinissaat. Sulisussaqarniarnermik ajornartorsiutit qanoq aaqqissavavut?
- Kommunalbestyrelsinngorumaartussat kajumissaarusuppakka nalunaarusiami ilungersunartunik paasiniaanissaat, Kommune Kujallermi borgmesteri Stine Egede (IA) Malik Berthelsen isumaqatigalugu oqarpoq, tassalu innuttaasut kommunit suli amerlaninngornissaasa mikinerulernissaasalu kingunerisassaannik qaammarsarneqartariaqartut.
- Mianersortariaqarpugut, innuttaasullu maannakkut kommunit qanorluunniit akeqassagaluarpat atukkallu ajorseriassagaluarpata avinneqarnissaannik kissaateqartut kingunerisassaannik qaammarsarneqartariaqarput, naggataagummi utoqqarnut, inunnut innarluuteqartunut meeqqanullu kinguneqarnerluttussaavoq, Stine Egede oqarpoq.
Kommunit akornanni
ataatsimut aaqqiissutissat
- Kommunit aaqqissuussaanerisa allanngortinnissaat oqaluuserineqartillgu, tamanna paasineqarajuttarpoq kommunit aaqqissuussaasimanernut uteqqittoqarniartoq, kikkullu sumiissappat?
-Aammali kommunit suliassaat oqaluuseraavut, ilaatigut sulisussarsiornermi ilungersunartorsiornerit, qanorlu siunissami kommunit akornanni ataatsimut aaqqiissutissanik nassaarnissamut ammalluta, soorlu IT-mut sullissinermulluunniit atatillugu.
-Pingaartuuvoq oqaluuserissallugu nunami sumi inissisimaneq apeqqutaatillugu avitsinissaq, aammali suliassat kommuninit kivinneqartussat pillugit, Kommuneqarfik Sermersuumi borgmesteri Avaaraq Olsen (IA) oqarpoq.
Qanimut
oqartussaaqataaneq
Kommune Qeqertalimmi
borgmesteri Ane Hansen (IA) oqarpoq siusinnerusukkut kommunit
aaqqissuussaaneranni nunaqarfiit aqutsisui
sunniuteqarsinnaanerusimasut, kommunalbestyrelsemi aamma
issiatitaqartarnermikkut tamannalu
oqartussaaqataanerulersitsisarluni.
- Nunaqarfiit siulersuisuisa sunniuteqaqataanerat kommunerujussuarni annikillipiloorsimavoq, innuttaasunullu tamanna ima misinnarluni qanimut oqartussaaqataajunnaarlutik.
- Kommuniusimasut innuttaasa misigaat qanimut oqartussaaqataajunnaarlutik, borgmesteriminnukaannarsinnaannginnamik, Ane Hansen (IA) oqarpoq, tikkuarluguli saniatigut pisortat suliffeqarfiisa innuttaasunik kiffartuussinerat aamma allanngorsimasoq.
- Namminersorlutik Oqartussat suliffeqarfiutaat soorlu Tusass, Nukissiorfiit inissiaatileqatigiiffillu INI A/S aamma kommunit aaqqissuusseqqinnerat ilutigalugu nutaaliorsimapput, illoqarfinni mikinerusuni nunaqarfinnilu kiffartuussinerup annertussusaa allanngortillugu, tamannalu inuuniarnermi aningaasartuutinut akinullu sunniuteqarpoq, innuttaasut kiffartuunneqarnerannut kinguneqartumik, Ane Hansen oqarpoq.
Borgmesterimut 1000
kilometerit
Avannaata Kommuniani
borgmesterip tullia siulleq Jens Ole Nathanielsen (IA) isumaqarpoq,
innuttaasut akornanni kommunit aaqqissuunnerat pillugu oqallinneq
misigissutsinut tunngasinnaasoq, misigisimagamik
sunniuteqarsinnaanatik.
- Innuttaasut sunniuteqaqataanerorusupput, tamannalu kommunerujussuarmi ersarissumik misigisarparput, Ilulissaniit Qaanaamut 1000 kilometerinik isorartutigimmat.
- Matumani najukkamik sunniuteqaqataanerup aalajangiisinnaassutsillu annertusinissaa pingaartuuvoq. Sumiiffimmi qinigaaneq naleerussinnaavoq qinigaq aalajangerpat illoqarfimmut allamut nuunniarluni.
-Taamaattumik aaqqiissutissanik naalakkersuinikkut oqallinnissaq pingaartuuvoq sumiiffimmi qinigaatitaqarnerup attatiinnarnissaanut. Kommuninut qinersinissami kommunit nutaamik aaqqissuuteqqinneranni innuttaasut sunniuteqaqataanissaat annertunermik sammineqartariaqarpoq, Jens Ole Nathanielsen oqarpoq.
