Inuussutissarsiornermik ilinniarfiit pillugit inatsit akerlilersorneqaraluartoq akuerineqarpoq
Ilaatigut inuussutissarsiornermik ilinniarfinni siulersuisuerunnissaanik kinguneqartussamik Inatsisartut inatsimmik akuerinnipput.
Assi: KTI
Nunatsinni ilinniarfinni inuussutissarsiornermut tunngasunik siulersuisuunikkut suliaqartoqartarunnaaliivippoq.
Sisamanngormat Inatsisartuni inatsisip nutaap akuersissutigineqartup kingunerisaanik siulersuisut atorunnaarsinneqassapput. Demokraatit Atassutillu inatsimmut akerliullutik taasimmata, Naleqqallu ilaasortaatitaa ataaseq taasinngimmat, aalajangiineq isumaqatigiinngissutaavoq.
Inatsisissatut siunnersuut tusarniaassutigineqaqqaarmat ilaatigut Sulisitsisunit akerlilerneqarpoq, inuussutissarsiortullu aamma ilinniarfinnit siulersuisuini immikkut ilisimasallit sinniisuujunnaarnissaat, taakkua ernummatigaat.
- Iluatsilluartarnera akuttuvoq
Siunnersuutip suliarineqarnerani Demokraatit aamma taamatut isumakuluuteqarput:
-Ilinniarfinni siulersuisut Naalakkersuisunit atorunnaarsinniarneqarnerat, tamatumunngalu taarsiullugu suut tamarmik Nuummi Namminersorlutik Oqartussat allaffeqarfiannit aqunneqarniarnerat, siunnersuummi ajornartorsiutaanerpaavoq.
- Eqiterinerup iluatsilluartarnera akuttuvoq. Pisortat allaffeqarfiini sulisut amerliartornissaat qularutigissanngilarput, tamannalu anguniagarisussaanngilarput, oqaaseqartartoq Nivi Olsen siullermeerinninnermi oqarpoq.
Siulersuisueruppat ilinniartitaanermut naalakkersuisoqarfimmi atorfilinnit ilinniarfiit toqqaannartumik aqunneqassapput.
Aningaasanik isumannaatsumik aqutsinermik praktikkerfissanillu qulakkeerinnissasoq
Siulersuisut atorunnaarsinneqarnissaannik siunnersuut ataatsimiititaliami suliarineqarmat tamanna sammineqangaatsiarpoq, tamannarpiarlu pillugu Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap naalakkersuisoq arlalinnik apeqquteqarfigaa.
Siulersuisut atorunnaarsinneqarnissaannik ernumassutit Ilinniartitaanermut naalakkersuisup Aqqaluaq B. Egedep (IA) allakkatigut ilumuunnginnerarpai. Naalakkersuisoq naapertorlugu siulersuisunik aaqqissuussineq aningaasanik isumannaatsumik aqutsinissamut qulakkeerinnittuusimanngilaq. Ukiuni 13-ini aaqqissuussinerup atuunnerani praktikkerfiit 200-nik ikileriarsimanerat aammattaaq Naalakkersuisup ajuusaarutigaa.
Inatsit nutaaq atuutilerpat praktikkerfissanik periarfissanik ilinniarfiit qulakkeerinninniarlutik suliffeqarfinnut attaveqanngikkaangata, Naalakkersuisut toqqaannarnerusumik akuliussinnaalissapput.
- Asuliinnaasoq
- Siulersuisut inuussutissarsiornermik ilinniarfinnut allaffissornikkut atasut inuiaqatigiinnullu iluaqutaanngitsut atorunnaarsinneqarpata, ukiumut 2 millionit koruunit missaat sipaarneqarsinnaapput, ataatsimiititaliamut akissuteqaammini ersarissumik naalakkersuisoq allappoq.
Sulisitsisut tamanna asuliinnaanerarpaa, praktikkerfissallu neqeroorutigineqartut affaat sinnilaaginnarlugit (60 procentit missaat) inuttalerneqarsinnaasut, ilinniartut inissisimanerat pillugu misissuinerit takutikkaat, pisortap Christian Keldsenip innersuussutiginikuuaa.
