Iqalunnut timmisartuussineq ammaqqittoq: Air Greenland tikilluaqquneqarpoq
Air Greenlandip timmisartua qaaqqusanik ilaasoqarluni Nuummiit Iqalunnut timmisartuussinermik ammaaqqilluni angallasseqqaarmat Iqalunni innuttaasut tikilluaqqusiartortut nuannaarluinnarput. Kalaallit Nunaata Nunavullu akornanni silaannakkut aqqut ukiuni qulini ingerlaviusimanani maanna ammaanersiorneqarpoq.
"Tikilluaritsi!"-mik nilliasut Iqaluit mittarfiata illorsuata silataani tusarsaavoq. Air Greenlandimi timmisartua Dash 8 aallartitanik qaaqqusanillu ilaasoqarluni, Nuummiit Iqalunnut pingasunngornermi 26. juni, akunnerni marlunni sivisussuseqartumik timmisartuussereerluni Iqalunnut, ukiuni qulini siullermeerluni, tikippoq.
- Angallassinerup ammaqqinneqarnera nuannerpoq. Qularinngilara Iqaluit Nuullu akornanni ikinngutigiinneq nukittorsarneqassasoq illoqarfiit taakku marluk akornanni toqqaannartumik timmisartuussisoqaqqilernera pissutigalugu, Iqaluit borgmesteriat, Solomon Awa, pingasunngornermi juunip 26-ani Air Greenlandimik tikilluaqqusiartortunut 300-t missaanniittunut oqalugiarnermini oqarpoq.
Nuuk tikeraarneqarluartartutut atorniarlugu kajumissuseqarneq
Nuup Iqaluillu akornanni timmisartuussisoqaqqilernissaa sivisuumik sulissutigineqarsimasoq, Air Greenlandimi siulersuisuni siulittaasoq Malik Hegelund Olsen oqarpoq. Taassuma aamma oqaluttuaraa Kalaallit Nunaanni timmisartortitseqatigiiffiup aamma Canadian Northip suleqatigiinnerat pitsaalluinnartoq, Canadamilu timmisartortitseqatigiiffiup Nuummi mittarfissuup 2200 miiterisut takitigisup atulernerani Iqaluit Nuullu akornanni timmisartuussisoqaqqilernissaa qilanaarigaat.
Tamanna Shelly De Cariap, Canadian Northimi pisortaanerup, oqalugiarnermini uppernarsarpaa.
- Nuummi mittarfik nutaaq 2200 meterisut takitigisoq atulertussaavoq. Mittarfik ammarneqarpat timmisartup Nuummut angallassisalernissaanut suliniutit qilanaaraagut. Kulturikkut, inooriaatsikkut inuunermullu isiginnittariaatsitsigut arlalitsigut assigiiffeqarpugut, taamaattumik toqqaannartumik timmisartuussineq attaveqatigiinnermik ineriartortitsinissamut periarfissatsialaavoq, Shelly De Caria oqarpoq.
Taanna oqarpoq ukioq manna Kalaallit Nunaannukarnissani pilersaarutigilereerlugu.
Iqaluit 7.700-t missaannik innuttaasoqarpoq. Taakkunanngalu 300-t missaanniittut pingasunngornermi juunip 26-ani Air Greenlandip timmisartuanik siullermik tikilluaqqusiartorlutik mittarfimmukaapput. Peqataasut hotdogs-inik, chips-inik, mamakujunnik sodavandinillu Canadian Northimit tunniunneqartartunik nereqatigiipput. Assit allaaserisap qulaani takusinnaavatit.
