KUANNERSUIT
Isumaqatigiissitsiniarnermik eqqartuussiviup nammineq piginnaatitaaffini sumut killeqarnersoq suliarissavaa
Greenland Minerals and Energy-mik (GME) taaguuteqarnikuusoq, maannakkullu Energy Transition Mineralsimik taaguuteqalernikuusoq, akuersissummik pinngikkuni taarsiivigitinnissamik suliassassanngortitsimmalli maanna ukiut marluk sinnereerpai. Naalakkersuisullu suliamut atatillugu itigartinneqarnissaanik periarfissamik maanna takusoripput.
Naalagaaffiup eqqartuussissusserisuata Namminersorlutik Oqartussat aamma Danskit oqartussaasui sinnerlugit Australiamiut aatsitassarsioqatigiiffiannit Greenland Minerals/Energy Transition Mineralsimit piumasaqaat, Kuannersuarni atuinissamik akuersissummik tunineqarnissaat imaluunniit taarsiivigineqarnissaat 76 milliardit koruuninik, itigartitsissutiginikuuaa.
Assiliisoq: Trine Juncher Jørgensen
Greenland Minerals A/S-ip Namminersorlutik Oqartussat suliakkiullugit naammagittaalliuutaata Isumaqatigiissitsiniarnermut eqqartuussivimmi suliarineqarnerani suliarinninneq ingerlaqqilaarpoq. Taamak oqaluttuarpoq Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen (IA) tusagassiuutitigut nalunaarummini.
- Namminersorlutik Oqartussat suliakkiullugit naammagittaalliuutit suliarineqarnissaannut tunngatillugu Isumaqatigiissitsiniarnermut eqqartuussiviup piginnaatitaaneranut apeqqut immikkoortillugu suliarineqassasoq pillugu Isumaqatigiissitsiniarnermut eqqartuussiviup aalajangernera Namminersorlutik Oqartussat ulloq 2. oktober tiguaat, tusagassiuutitigut nalunaarummi ilanngullugu ilisimatitsissutigineqarpoq.
Nathanielsen: Suliaq itigartinneqartariaqarpoq
Naammagittaalliuuterpiaap suliarineqannginnerani apeqqutip taassuma paasinarsisinneqarnissaa Namminersorlutik Oqartussanit pingaaruteqarsimasoq, Nathanielsen nalunaarummini erseqqissaavoq.
- Isumaqatigiissitsiniarnermi suliassaq taanna maannakkut ukiut marluk sinnerlugit ingerlareersimalerpoq, aammalu Isumaqatigiissitsiniarnermut eqqartuussivik suliassap taassuma suliarinissaanut qanorluunniit piginnaatitaasoq isumaqanngitsugut uparuarnissaa, Namminersorlutik Oqartussat tungaanniit aallaqqaataaniillu pingaartinneqarsimavoq.
- Namminersorlutik Oqartussat naalagaaffiullu naliliinerat suli tassaavoq, suliassaq itigartinneqassasoq, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen (IA) oqarpoq.
Isumaqatigiissitsiniarnermut eqqartuussivik taamatuttaaq aalajangerpoq, apeqqut pillugu pingaarnertigut isumaqatiginninniarnissamut ullut tallimat atugassiissutigineqassasut. Immikkoortitsinissaq pillugu pingaarnertigut isumaqatiginninniarnerit qaqugu ingerlanneqassanersut, suli aalajangiiffigineqanngilaq.
