Kommuneqarfik Sermersuup inissianillu piginnittup Jackie Lyngip akornanni isumaqatigiinngittoqarnermi Nuummi Nuukullak 3-mi inissiani 73-ini attartortut inissisimapput.
Pisortanit taarsigassarsiat 28 millionit koruunit missaanniittut, inissianik 73-inik inissialiornissamut atorneqartut, akilerneqaqqullugit kommunip piumasarimmagu Kommuneqarfik Sermersuumut attartornermut isumaqatigiissummik Jackie Lyng taamaatititsivoq.
Kommuneqarfik Sermersuup inissianillu piginnittup Jackie Lyngip akornanni isumaqatigiinngittoqarnermi Nuummi Nuukullak 3-mi inissiani 73-ini attartortut inissisimapput.
Pisortanit taarsigassarsiat 28 millionit koruunit missaanniittut, inissianik 73-inik inissialiornissamut atorneqartut, akilerneqaqqullugit kommunip piumasarimmagu Kommuneqarfik Sermersuumut attartornermut isumaqatigiissummik Jackie Lyng taamaatititsivoq.
Aaqqiagiinnginneq eqqartuussivimmi aaqqinneqarumaartoq, Kommuneqarfik Sermersuup naatsorsuutigaa.
Kommunimut aamma Jackie Lyngip ingerlatseqatigiiffianut Nuuk City Investimut pissutsit ilungersunarput ajorluinnartumik kinguneqarsinnaallutik, taama naliliivoq Per Nikolaj Bukh, Aalborg Universitetimi aningaasaqarnermut tunngasunik professoriusoq.
Navianartorsiutit annertuut
Jackie Lyngip taarsigassarsiani maannakkorpiaq utertissinnaanagit oqaatigaa, Kalaallit Nunaannimi aningaaseriviit arlaannaataluunniit taarsigassarsisikkumanngimmani.
- Kommuni eqqartuussivimmi ajugaassappat Nuuk City Invest-ilu piumasani pillugu piumasaqarfigiguniuk, Jackie Lyngip aningaasat pissarsiarisinnaanngippagit ingerlatseqatigiiffik akiliisinnaajunnaarsinnaavoq, professori Per Nikolaj Bukh naliliivoq.
Taamaattoqartillugu kommunip 28 millionit koruunit annaasinnaavai, Jackie Lyngilu ingerlatseqatigiiffimmik iluatsinngitsumik pigisaqalersinnaavoq, nammineq aningaasaatini pigisanilu annaasinnaallugit. Inissiarpassuit akikitsuararsuarmik kommunip allaat tunineqartussanngortissinnaavai, tamannalu suliamik ajornakusoornerulersitsissaaq, Per Nikolaj Bukh oqarpoq.
Taamaattumik annertuumik navianartorsiortoqarpoq, kommunili allatut periarfissaqannginnami pisortanit taarsigassarsiat akilerneqarnissaat piumasariinnarsinnaavaa, erniakitsumimmi akilersuinertaqanngitsumillu taarsigassarsiat kommunillu ineqarnermut akiligassarpassuaqarneranik aaqqissuussineq inatsisinut naapertuutinngilaq, Per Nikolaj Bukh naliliivoq.
Isumaqatigiissutit iluanaarnartut
Eqqartuussissuserisumit nassuiaammit, ineqarneq pillugu suliami aningaasaliisartunut pisortanit taarsigassarsisitsisarneq pillugu Kommuneqarfik Sermersuumit suliarineqarsimasumit, taassuma oqaasii tunngaveqarput.
Per Nikolaj Bukh naapertorlugu ineqarneq pillugu suliami inuussutissarsiutigalugu attartornermut isumaqatigiissutit, nalinginnaasumik illunik attartornermit isertitassanut naleqqiullugit, iluanaaruteqarfiungaartutut oqaatigineqarsinnaasunik, nassuiaammi paasissutissarpassuaqarpoq.
Allatut oqaatigalugu kommuni inissiat inissiarsuarniittut attartornissaannut akisuumik akiliisarpoq, tamannalu pisortat taarsigassarsisitsinissaannut inatsimmut kommunillu sipaarniaqqusaanissaanut piumasaqaatinut, nalinginnaasumik kommuninut atuuttunut, toqqaannartumik akerliulluinnarpoq.
Aammattaaq kommunip eqqartuussissuserisua isumaqarpoq attartornermut isumaqatigiissutit ima iluaqutaatigisimasut allaat aningaasaliisut pisortanit taarsigassarsisitsisarneq pillugu inatsimmik unioqqutitsinerlutik nalunngittariaqarsimagaluarlugu.
Inuiaqatigiinnut aaqqiissutissamik siunnersuut
Maannakkut kommunip, Nuuk City Investip kiisalu aningaasaliisut allat akornanni ineqarneq pillugu suliami aaqqiagiinngittoqangaatsiarpoq. Isumaqatigiinnginnerup qanoq aaqqinneqarsinnaaneranik professori siunnersuuteqarpoq.
Aaqqiissutissatut namminersorlutik oqartussat aningaasaateqarfiannik pilersitsisoqassasoq siunnersuutigaa, ineqarneq pillugu suliami aningaasaliisunit akiliisinnaajunnaarnermiluunniit inissianik pisiffiusinnaasumik. Pisortat annaasaqarnissaat pinngitsoortinniarlugu inatsisitigullu ataavartumik aaqqissuussisoqarnissaa kiisalu ineqarneq pillugu suliaq pillugu ajornartorsiummik ataavartumik aaqqiissutissarsinissaq siunertaavoq:
- Aningaasaliisut piumasaqaatinik aalajangersimasunik tunngaveqartumik aningaasaateqarfiup pisiarisinnaavai, taakkulu aningaasaliissutaat ukiumut 5-10 procentinik erniaqartinneqarsinnaapput. Tassa imaappoq isertitaminnik annaasaqassapput, aammali akiliisinnaajunnaarsinnaanerat pinngitsoorneqassaaq, Per Nikolaj Bukh oqarpoq nangillunilu:
- Toqqaannartumik tigusinikkut pinngitsaaliissummik taarsiissutitalimmik pigisanik piginnikkunnaarsitsinerup pineqannginnera, namminerli kajumissutsimit isumaqatigiissuteqarnerusoq, pingaaruteqarpoq.
Aningaasaateqarfiup inissiat nutaat sanassanngilai, ineqarnermulli suliaq pillugu inissiat pisiarineqarnerannut aningaasalersuissaaq inatsisitigullu ajornartorsiutit aaqqissavai:
- Tamanna inuiaqatigiinnut silatusaarnerussaaq, Per Nikolaj Bukh oqarpoq.
