Isumasiuineq Amerikamiut Trumpip Kalaallit Nunaannut pilersaarutaanut isumaannik takutsitsivoq
Amerikamiut 23 procentiisa USA-p Kalaallit Nunaannik piginnittariaqarneranik isumaqartut, isumasiuinerup ersersippaa.
Amerikamiut vicepræsidentiat J. D. Vancep (sammillernit pingajuat), uani Pituffik Space Basemut marsip qaammataani nuliani Usha Vance (saamillernit aappaat) peqatigalugu tikeraartoq takuneqarsinnaavoq.
Assi: Jim Watson/Reuters/Ritzau Scanpix
Amerikamiut 54 procentiisa USA-p Kalaallit Nunaannik tigusinissaa isumaqatiginngilaat.
Marsip qaammataata naanerani Amerikamiut isumalioqatigiiffiata Pew Research Centrep isumasiuinerata inernera taama takutitsivoq.
23 procentit Amerikamiut tigusinissaat isumaqatigaat, 22 procentillu qularlutik akipput.
Aperineqartunit 34 procentit Amerikamiut præsidentiata Donald Trumpip Kalaallit Nunaannik tigusinissamik pilersaarutini piviusunngortinnavianngikkaa isumaqarput.
23 procentit “tamatuma ilimanartorujussuuneranik” akipput.
Kalaallit Nunaat qallunaat naalagaaffeqatigiinnerannut ilaavoq.
Trump: Kalaallit Nunaat tigujumaarparput
Trumpip siorna novembarip tallimaani præsidentitut qinigaanerata kingorna, tamannalu sioqqullugu qineqqusaarnermi, USA-p “Kalaallit Nunaat piumaaraa” arlaleriarluni oqartarpoq.
Taamattaaq USA killissani tikillugu Kalaallit Nunaannik tigusinissaminik iliuuseqarumaartoq aamma oqarpoq.
- Kalaallit Nunaat pissavarput. Aap, 100 procent, marsip 30-ani taama oqarpoq.
Trump naapertorlugu Kalaallit Nunaat USA-p naalagaaffittut isumannaatsuunissaanut pisariaqarluinnartuuvoq.
Amerikamiut vicepræsidentiat, J. D. Vance, marsip naalernerani Amerikamiut Kalaallit Nunaanni sakkutooqarfiannut tikeraarpoq – tikeraarneq pisortatut oqartussanit isornartorsiorneqarpoq.
Tiguserusuttuni republikanerit amerlanerupput
Misissuinermi Amerikamiut 18-t sinnerlugit ukiullit 3605-mit apersorneqarput.
Misissuinertaaq republikanerinut demokratinullu avinneqarpoq. Trumpip nammineq qinersisartuini Amerikamiut Kalaallit Nunaannik tigusinissaannut isumaqataasut amerlanerupput. Isumasiuinermi apersorneqartut republikanerit 41 procentii isumaqataapput, 28 procentillu akerliullutik.
Qulartut 31 procentiupput.
Misissuinermittaaq Amerikamiut Gazap Amerikamiunit tiguneqarnissaa pillugu aperineqarput.
Tassani 62 procentit akerliullutik akipput, 15 procentillu isumaqataallutik akipput. Taamatut aamma republikanerini akisut amerlanerit akerliupput.
Republikanerit aperineqartut affaasa missaat – 44 procentit - USA-p Gazamik tigusinissaanut akerliupput. 27 procentit isumaqataapput.
