Jacob Nitterip Kim Kielsenip takorluuisinnaassusia nersoraa

Nuummi mittarfittaaq  inuit sapiitsut takorluuisinnaalluartut peqataasimanngitsuuppata piviusunngorsimanavianngilaq, Air Greenlandip pisortaanera Jacob Nitter Sørensen Københavnip mittarfiani Airbusip Nuummut timmisartuussinissaa sioqqullugu oqalugiarnermini oqarpoq.

- Inuk ataaseq immikkut maluginiarnartumik anguniagaqarlunilu sapiissuseqarsimasoq tassaavoq, Kim Kielsen. Suliniummut upperinneqqissaarnermigut nersunartumillu nakkaannajaatsuunnginnermigut, suliap imaannaanngitsup naammassineqarnissaanut tunngaviliillunilu ingerlatitsisuusimavoq, timmisartuutileqatigiiffiup pisortaa tusagassiortorpassuarnut oqarpoq.

Aalajaalluni suliniuteqartoq

- Suliaq unammilligassarpassuaqarsimavoq aamma akiuuttoqarsimaqaaq, kisianni Kimmi, illit nukissaqarnerit aalajangersinnaassuseqarnerillu ullumi maani nikorfasinnaanitsinnut matuersaataasimavoq. Qujanaq sapiitsuliorninnut aamma aalajaallutit suliniuteqarsimaninnut!

Jacob Nitter Sørensenip Naalakkersuisut Siumullu siulittaasorisimasaata nersualaarnissaa sioqqullugu Kalaallit Nunaanni silaannakkut angallannerup ineriartornera naatsumik oqaluttuaraa.

- Silaannakkut angallassinerup oqaluttuassartaa tassaavoq ineriartornermik siuariartornermillu oqaluttuaq. Qulimiguulinnik angallassinermiit Dash7-inut naatsunut missinnaasunut nuussimavugut, kingorna Dash-8-nut nutaaliaanerusunut ikaarsaarsimavugut – maannalu angalanerput A330 atorlugu nangipparput. Qanga angalaneq sapaatit akunnerinik marlunnik sivisussuseqarsimasoq ullualuit ingerlaneranni pisinnaanngorpoq, maannalu tiimit iluanni. Tamanna ineriartornermik oqaluttuarpoq – siunissamut oqaluttuarpoq, Air Greenlandip pisortaa oqarpoq.

Pilersaaruterpassuarnik suliaqarneq

Nuummi mittarfiup nutaap anginerullu periarfissarpassuarnik pilersitsisinnaanera atorluarlugu Air Greenland qaammatini arlalinni timmisartuussinissamut pilersaarutinik nutaanik suliaqarsimavoq.

- Angusaq tamanna uatsinnut isumaqarpoq, ullumiit Nunarput attaveqaqatigiinnikkut qanillattornerutissimagatsigu. Ullumikkut aallartiffigalugu ullaakkut nal. 09.20 Upernavimmiit aallartoqarsinnaavoq, Qaqortumullu nal. 16.30 milluni. Kangianiit Tasiilamit ullaakkut aallarluni ualikkut Uummannamut tikittoqarsinnaanngorpoq – aamma Nuummiit Londonimut ullup ataatsip iluani, pisortaq oqalugiarnermini erseqqissaavoq.

- Assersuut alla: Københavnimiut Nuummut weekenderiarsinnaapput, neriulluarlutik, kangerlummut angalaarlutik, sisorarlutik, snescooterinik takusassarsiorlutik immaqalu aalisarneq misilillugu, Jacob Nitter Sørensen oqarpoq, Københavnillu mittarfia  qujassuteqarfigaa “Nunatsinnut Air Greenlandimullu sivisuumik sullissisimanerannut. Ilissi tapersersuinersi uatsinnut isumaqaqaaq, aamma timmisartukkut angallassinermiit annertunerujussuuvoq”.