J.D. Vancep USA-p Kalaallit Nunaannik soqutiginninnera erseqqissaraa
“Qanorluunniit pisoqaraluarpat” USA-p soqutigisani illersorniarpai, USA-p vicepræsidentia Kalaallit Nunaannut tikeraareernermini oqarpoq. USA-p Kalaallit Nunaat Danmarkip maannakkut tunissutigisartagaanit amerlanerusunik tunisinnaagaa, Trump naliliisoq ilanngullugu oqaatigaa.
J. D. Vance nulialu Usha Vance sapaatip akunnerani kingullermi tallimanngormat Pituffik Space Basemut tikeraarput.
Foto: Jim Watson/Reuters/Ritzau Scanpix
Tallimanngorninngoraa USA-p vicepræsidentiata, J. D. Vancep Kalaallit Nunaannut soqutiginninneq naalagaaffiup isumannaatsuuneranut tunngassuteqartoq, USA-llu soqutigisani illersorniarai erseqqissarpaa, "come hell or high water", taannalu "qanorluunniit pisoqaraluarpat”-mut nutserneqarsinnaavoq.
Taama tusagassiorfimmut Newsmaximut oqarpoq.
Sapaatip akunnerani kingullermi Kalaallit Nunaanni tikeraarnerminut atatillugu, kiisalu Amerikamiut præsidentiata Donald Trumpip Kalaallit Nunaat tigujumallugu sakkutuulersorsinnaaneq “tunuartikkumanagu” oqaaseqarnera pillugu Newsmaximit apersorneqarpoq.
- Præsidenti oqaatigisaalu – soorunami tusagassiorfinnit saassunneqarput – oqaatigisaali iluameerput.
- Oqarpoq: "Tusaalaaritsi, manna uagut isumannaatsuunissatsinnut tunngavoq. Misilinut illersornissatsinnut sunniuteqarpoq, qanorluunniillu pisoqassagaluarpat, USA-p soqutigisai illersussavagut ".
Vance: Kalaallit innuttaat aningaasanik amerlanerungaartunik tunisinnaavagut
Kalaallit “Danmarkimit kiffaanngissuseqarusunnertik erseqqissorujussuarmik oqaatigigaat” Vance sapaatip akunnerani kingullermi kalaallit Nunaannut tikeraarnermi kingorna oqarpoq.
“Ukiumut Kalaallit Nunaanni inuk ataaseq 60.000 dollarit missaannik pisartoq”, tikeraarnermi nalaani paasisimallugu, Vance oqaluttuarpoq.
Newsmax malillugu Vancep aningaasat Danmarkiminngaaneersut oqallisigai. Vancep qanoq ililluni aningaasat 60.000 dollarit, 400.000 kr-t missaannik naleqartut naatsorsorsimanerai erseqqinngilaq. Ataatsimoortumik tapiissuterpiaat qissimikkaanni taakku appasinerujussuupput; inummut ataatsimut 75.000 kr-t missaanniipput.
- Præsidentip oqaatigisaa tassaavoq, uagut inuiannut kalaallinut aningaasanik amerlanerujussuarnik tunniussisinnaanerput. Aammaarlugu: Isumannaatsuunissap USA-mut pingaaruteqarnera pissutigalugu, Vance oqarpoq imalu nangippoq:
- Aap, Danmarkimit kiffaanngissuseqalernissaq kissaatigigaat isumaqarpunga. Taamaalioreerunik, pissutsit USA-mit Kalaallit Nunaannut ilanngukkusutagut oqaluuserisinnaavagut, Vance oqarpoq.
Mette F: Nunat allat tiguinnaarsinnaanngilasi
Danmarkip statsministeria, Mette Frederiksen (S), ulluni kingullerni Kalaallit Nunaannut tikeraarpoq. Tallimanngorpat angerlaqqissaaq.
Múte B. Egede (IA) Jens-Frederik Nielsenilu (D) peqatigalugit sisamanngornermi tusagassiortunik katersortitsinermi Amerikamiunut toqqaannartumik oqariartuuteqarpoq.
- Nunanik allanik tigusiinnarsinnaanngilasi, Mette Frederiksen oqarpoq.
Jens-Frederik Nielsenip, Naalakkersuisunngortussanut siulittaasussap, arlaleriarluni Kalaallit Nunaata USA-mut ilaalersinnaannginnera erseqqissarpaa.
Udenrigsminister Lars Løkke Rasmussen (M) Amerikamiut udenrigsministeriannik sisamanngornermi Bruxellsimi ataatsimeeqateqarpoq.
Ataatsimeereernerup kingorna Løkke ilaatigut ima tusagassiortunut oqarpoq:
- Kunngeqarfik sinnerlugu soorunami pissutsinut arlalialunnik erseqqissaavunga.
- Tassa Amerikamiut præsidentiata nangittumik Kalaallit Nunaannik tigusiniarnerminik oqaluttuarnerata akuersaarneqarsinnaannginera.
