Jens-Frederik: Aallartilluarnissaq qulakkeeqqaalaassavarput
Naalakkersuisut siulittaasuat, Jens-Frederik Nielsen (D) kissaateqarpoq Naalakkersuisut nutaat aallartilluarnissaat qulakkeeqqaalaassasoq ulappusilertigatik. - Suliassat siunitsinniittut amerlaqaat, ilaatigut avataaneersunit sakkortuumik sunnerniarneqarneq eqqarsaatigalugu, kisianni siulliullugu pingaartippara Naalakkersuisut aallartilluarnissaat qulakkiissagipput.
Assi: Arnaq Nielsen
Danskit tusagassiorfiisa arlallit allaaserinnillutik maluginiagaattut, politikkikkut aaqqissuussineq Kalaallit Nunaanni Danmarkimut naleqqiullugu allaanerulluinnarpoq.
Naalakkersuisut nutaat katitigaanerat Danmarkimi takorlooruminaatsinneqarpoq, assersuutigiinnarlugu assigiinnassagaluarpaa Socialistisk Folkeparti Liberal Alliancemik naalakkersuisooqatigiittussanngortinneqassasut.
Kalaallit Nunatsinni partiit assigiinngikkaluaqisut tamanna pisinnaavoq, partiimmi qitiutippaat isumaqatigiissusiornermikkut inuiaqatigiit kalaallit pillugit angusassat sapinngisamik pitsaanerpaat siunnerfigineqassasut, tamannalu partiit sisamaallutik maanna isumaqatigiissutigalugu naalakkersuisooqatigiiliorput.
Taamaalilluni naalakkersuisooqatigiinneq siornatigut Kalaallit Nunaanni misilinneqarsimanngitsoq pilersinneqarpoq, tassa partiit sisamat, taamatullu qinersisartut 75 procentiisa taasisimanerat taakku katersuuffigivaat.
Partiit sisamat naalakkersuisooqatigiinnerat qinersinerup tullissaata tungaanut ingerlaannarnissaa pillugu pilersaarummik malitassiorpit?
- Ataatsimoornerput nukittuumik inissisimavoq, imminnut tatiginninnerput ataqqeqatigiinnerpullu nukittuujuvoq. Unammilligassatsinnut tunngatillugu nukittuumik inissisimanerput atorluassallutigu isumaqatigiissutigaarput. Tunngaviliilluarluta suleqatigiilernitsinni aamma attaveqatigiilluarpugut, tamattalu Kalaallit Nunaanni innuttaasut pitsaanerpaamik sullinnissaat aallaavigigatsigu tatiginnilluinnarpunga toqqavipput pitsaasuusoq.
- Soorunami assigiinngissutigisagut pillugit isumasioqatigiittarnissarput avaqqunneqarsinnaanavianngilaq, kisianni taakku ilutsinni aaqqiivigisassaqqaarpagut, Naalakkersuisut siulittaasuat Jens-Frederik Nielsen (D) akivoq.
Maanna ullut nalinginnaasut aallartipput
Inatsisartuni partii illuatungiliuttutuanngortoq tassaavoq Naleraq.
Naleraq sinnerlugu inissititerluni ataatsimiinnermi oqaaseqartartoq, Jens Napãtôk’, naalakkersuisooqatigiilersunut pilluaqqussuteqarpoq, neriorsuillunilu suleqatigiissinnaaffitsigut suleqatigiittoqassasoq, aammalu ulluni 100-ni naalakkersuisunngortut sulineranni eqqissisimatitsisoqassasoq.
Taamaakkaluartoq 100-t sinnerlugit naalakkersuisunngortut sulinertik ingerlassinnaassavaat, Inatsisartuni ukiakkut ataatsimiittoqarnissaasa, tassa 19. septembari 2025-mi ullulerneqartup tungaanut.
Tamannarpiarlu Naalakkersuisut nutaat suliassaminnik aallartitsinissaminnut ingerlatsilernissaminnullu pisariaqartissagunarpaat, tassa siusinnerusukkut naalakkersuisooqatigiit Inuit Ataqatigiit aamma Siumut politikkikkut suliniutit amerlasuut aallartereernikuummatigit, Múte Bourup Egede qinersisitsinissamik suaaruteqarnissaata tungaanut.
Tassunga assersuutigiinnarlugu akileraartarnermut aaqqissuusseqqinneq, aalisarnermut inatsisip nutaap nalunaarutitassaanut tunngasut, soraarnerussutisiaqarnermut aaqqissuussineq, aammalu politikkikkut suliniutit arlalissuit allat ingerlasut nalilersorneqartussaassammata.
Taamatuttaaq naalakkersuisooqatigiilertut siunissamut isigalutik suliniutinik nutaanik aallartitsisussaapput. Naalakkersuisooqatigiilertullu qularnanngitsumik pilersaarusiussapput naalakkersuisooqatigiinnissamut isumaqatigiiissutip timitalersorneqarnissaanut najoqqutassaminnik.
Nunami politikkikkut ingerlatsineq avataaniittunut naqissuserneqassaaq
Kalaallit Nunaat innuttaasuilu qaammatini arlalissuanngortuni avataaneersunit sakkortuumik sunnerniarneqarput kimigiiserfigineqarlutillu. Sunnerniarneqarneq kimigiiserfigitinnerlu naalakkersuisooqatigiilersut nukippassuarnik atuiffigisariaqassavaat nunap ineriartortinneqarnera pillugu sulinerup saniatigut:
- Suliassarpassuaqarpugut, kisiannili massakkut Naalakkersuisut akisussaaffinnut agguataarnissaat aammalu pitsaasumik aallartinnissarput qulakkeeqqaartariaqarparput. Taakkua iluarsereerpata, sulineq piaarnerpaamik aallartissaaq.
Suna pingaarnerpaatut isigaajuk? Suliassat nunatsinnut tunngasut imaluunniit avammut tunngasut?
- Tamarmik pingaaruteqarput. Ulloq siulleq aallartilluta anguniarlugu sulissutigisariaqarparput Kalaallit Nunaat toqqissisimasoq kiffaanngissuseqarnermillu aallaavilimmik ineriartortoq. Innuttaasut ilisimassavaat siunissami qaninnermi siunissamilu ungasinnerusumi politikkikkut sulinermi qanoq ingerlatsisoqarnersoq, Naalakkersuisut siulittaasuat Jens-Frederik Nielsen Sermitsiamut oqarpoq nangillunilu:
- Kisianni aamma pingaaruteqarpoq toqqissisimanerup patajaatsumillu ingerlatsinerup pilerseqqinneqarnissaa, avataaniit tatisiniartoqarneranut tunngatillugu. Partiit Kalaallit Nunaanni ataatsimoorput, kalaallit innuttaasui ataatsimoorput, ataatsimoorlutalu avammut ersersissavarput nunarput nammineq aqussagipput aammalu nunat tamalaat suleqatigiinnissaanut ammasuusugut.
