Naalakkersuisooqatigiilersussat D, IA, S aamma A-p isumaqatigiissutaat 

Inatsisartut nutaat inissititereerpata naalakkersuisooqatigiilersussat suliassaminnik aallartitsissapput, taakku ukiuni tulliuttuni sisamani sulissutigiumasatik pillugit isumaqatigiissutaat sukumiisorujussuuvoq.

Sermitsiamit isumaqatigiissut misissorparput, isumaqatigiissullu taanna partiit naalakkersuisooqatigiinni peqataasut tamarmik anguniagassanik tapertaaffigisimagaat maluginiagassaavoq. Matumani isumaqatigiissummi anguniagassat eqikkakkat atuarsinnaavatit.

Namminiilivinnissaq

• Mianersortumik ingerlanneqassaaq, inuiaqatigiillu akuutinneqassapput.

• Erseqqissumik siunnerfeqarnissaq piviusorsiortumillu piffissaliinissaq.

• § 21-mik isumalioqatigiissitap nanginnissaa suliaminillu naammassinninnissaa qulakkeerneqassaaq.

• Namminersorneq pillugu inatsit naapertorlugu naalagaaffimmit oqartussaaffinnik tigooraanerup aallartinneqassaaq.

• Oqartussaaffiit suut piviusorsiortumik tiguneqarsinnaanerannik ingerlatsinissamut pilersaarummik suliaqartoqassaaq.

Danmarkimik isumaqatiginninniarneq

• Siunissami suleqatigiinnissamut sinaakkutinik nutartikkanik muteerninillu pilersitsinissaq siunertaralugu, qallunaat naalagaaffiannik Naalakkersuisut isumaqatiginninniarlutik aallartissapput.

• Kalaallit qallunaallu tamakkiisumik naligiissinneqarlutillu assigiimmik naleqartinneqarnissaat pillugu paaseqatigiinneq isumaqatigiissuteqarnerlu.

• Siunissami aningaasaqarnikkut suleqatigiinnermut isumaqatiginninniarnerit piviusorsiortut aallartinneqassapput, tassani Kalaallit Nunaanni ineriartornermik pilersitsinissaq pillugu aningaasaliinerit pisariaqartut ilanngullugit.

• Namminersorneq pillugu Inatsisip nalilersorneqaqqinnissaa siunertaralugu pilersaarusiornermut piumasaqaatit suliarineqassapput.

Aningaasaqarnikkut politikkia

• Piujuartitsissuullunilu piffissarlu ungasinnerusoq isigalugu aaqqissuusseqqinnernik pisariaqartunik aallussilluni aningaasaqarnikkut siuariartornermut sammisuussaaq.

• Namminersorlutik inuussutissarsiortunik nukittorsaasunik, pisortat ingerlatsiviannik pisariillisaasunik ilassuserneqassaaq.

• Erseqqissunik pingaarnersiuilluni, missingersuusiornermilu inatsit ataqqillugu sukannersumik aningaasartuutinut politikip ingerlanneqarnera nanginneqassaaq. Aningaasarsiornikkulli siuariartortuarnissap atugarissaarnerullu qularnaarnissaa pillugu pisortat aningaasaliisarnerat suli pisariaqassaaq.

• Akileraartarnermut aaqqissuusseqqinneq nalilersoqqinneqassaaq, taamaalilluni Naalakkersuisut 2026-iinnartoq akileraartarnermik aaqqissusseqqinnermik annertusaasinnaaqullugit.

Inuussutissarsiornermut politikki

• Aningaasaqarnikkut siunissaq piujuartitsisoq qularnaarniarlugu Kalaallit Nunaat namminersortunik aningaasaliisartunik amerlanerusunik pilerilersitsillunilu inuussutissarsiornikkut ineriartortitsinermik nukittorsaassaaq. Namminersorlutik inuussutissarsiortut amerliartussapput.

• Namminersorlutik inuussutissarsiortunut siunnerfilikkamik akileraartarnikkut aaqqissuusseqqinnermik suliaqartoqassaaq.

• Suliffeqarfiit mikisut akunnattumillu angissusillit aallunneqassapput.

• Inatsisinik malittarisassanillu pisariillisaaneq pingaartinneqassaaq, aningaasaliisarnermillu periusissiaq ersarissoq suliarineqassaaq.

• Aningaasaliisartunik pilerilersitsiumalluni ingerlatseqatigiiffinnut akileraarut apparneqassaaq.

• Suliffeqarfiit aallarterlaat ilitsersuinermik tapiiffigineqarnissamullu periarfissaqassapput.

• Suliffeqarfinnut mikisunut akunnattumillu angissusilinnut alliartornissaq suliffeqarfeeqqallu mikisut akunnattumillu angissusillit piuinnarsinnaanerannik siunnerfeqartumik periusissialiortoqassaaq.

• pilersaarusiortarnermut inatsit eqaannerusoq suliarineqassaaq, taamaalilluni assersuutigalugu aatsitassarsiornermut, aalisarnermut takornariartitsinermullu aningasaliinerit allaffissornermit kinguarsarneqaqqunagit.

Aatsitassarsiornermut politikki

• Nunanit allanit aningaasaliisartunik pilerilersitsiniarluni suliaqarneq annertusarneqassaaq.

• Nunanik aatsitassanik eqqussuisunik suleqateqarneq annertusarneqassasoq.

• Misissuisarnermik periusissiaq, aningaasaliinerit nunatta soqutigisaanut pinerinik, aningaasaliinerillu ineriartornermut pitsaasumik ilapittuisuunerinik qulakkeerinnittoq suliarineqassaaq.

Takornariaqarneq pillugu politikki

• Takornariartitsinermik ineriartortitsineq piujuartitsisuullunilu avatangiisinik piffinnilu inuiaqatigiinnik mianerinnittuussaaq.

• Namminersorlutik ingerlatsisut ingerlatseqatigiiffinnit pisortanit pigineqartunik, ingerlatseqatigiiffinnilluunniit Namminersorlutik Oqartussanit sullissinissamik isumaqatigiissuteqartunit unammillerneqassanngillat.

• Takornarialerineq minnerpaaffii tikillugit malittarisassiortuunani sinaakkutinik pitsaasunik pilersitsinermiissaaq.

• Aningaasaliinissamullu periarfissiinissaq qularnaarneqassaaq, aamma nunanit allanit. Kingullerli taamaallaat piffinni aningaasanik amigaateqarneq pissutsigalugu pisariaqartuni taamaallaat pissaaq.

Suliffeqarnermut politikki

• Sulinerup pilerinartuuneranik qulakkeerinninnissaq siunertaralugu suliffeqarnerup iluani aaqqissuusseqqinnermik suliaqartoqassaaq.

• Suliffissarsiornermi ikiorsissutit nutarterneqarnerat ilanneqassaaq.

• Ilinniarneq, ilinniaqqinneq piginnaanngorsaanerlu namminersorlutik inuussutissarsiortut pisariaqartitaannik aallaaveqassaaq.

• Qinnuteqarnissamut periarfissaq mesterlæreritut aaqqissuussinermik utertitsisinnaanermut misissorneqassaaq.

• Mesterlæritut aaqqissuussatut ittup eqquteqqinnissaanut periarfissaq misissorneqassaaq.

• Meeqqat inuusuttullu sunngiffimminni ajornannginnerusumik suliffeqalersinnaalernissaat naalakkersuisoqatigiit sulissutigineqassaaq.

Mingutsitsinngitsunut ikaarsaarneq nukissiuuteqarnermullu politikki

• Mingutsitsinngitsumik nukissiornermi nunarsuarmi siuttunngorsinnaanitsinnut periarfissaqarpugut. Pinngortitami isumaluuterpassuagut nunarsuarmilu inissisimaffitta immikkuullarissumiinnera atorlugu nammineq nukissiornermi pisariaqartitavut matussusiinnarnagit aamma nukissiamik minguitsumik piujuartitsisumillu nunarsuup sinneranut avammut niueruteqarsinnaavugut.

• Mingutsitsinngitsumik nukissiamik nunanut allanut pilersuinitsinni CO2-mik aniatitsinermi annikillisaaqataasinnaavugut siunissamillu piujuartitsisumik siuarsaalluta.

• Aningaasalersuinermik periutsinik aallussisumik erngup nukinganik innaallagissiorfinnik nutaanik aningaasaqarnikkut misissueqqissaarnernik suliaqartoqarnissaa naalakkersuisoqatigiit kissaatigaat, tassani pisortat namminersortullu aningaasaliinernik periarfissat ilanngullugit.

• Nukissiornermik politiki mingutsitsinngitsumik piujuartitsisumillu siuariartornermik periusissiamik ikorfartuinissaa pingaarnertut periuserineqassaaq, tassani suliffissuit silamut qajassuussinerusunut aaqqiissutinut ikaarsaassapput.

• Namminersortut innaallagissamik kiassarnermillu atuinermi silamut qajassuussinerusunik eqqarsarnissamut pilerilersinneqarnissaat kissaataavoq. Taamaammat assersuutigalugu seqernup nukinganik innaallagissiuutit varmepumpillu nammineq angerlarsimaffinni ivertissuunnissaat pilerinarnerulersinneqassaaq.

Pisortat ingerlatsinerat

• Pisortat ingerlatsinerat / allaffissornikillisaaneq pillugu aaqqissuusseqqittoqassaaq.

• Silassorsissuusiamik atuinermik annertusaaneq, digitalinngorsaaneq aamma ataatsimut sullissinernik ineriartortitsineq ingerlanneqassaaq.

• Assigiiaartumik ataqatigiissumik suleriuseq, allaffissornermik annikillissaaneq pisariillisaanerlu qularnaarniarlugit sulisoqassaaq.

• Namminersorlutik Oqartussat kommunillu ikiorsiissutaannik akilersuinermik isumaginnittumik pilersitsinissamut pilersaarusiortoqassaaq.

• Atorfinitsitsinermi politikimik sukannersumik ingerlatsissapput, taamaaliornermilu atorfiit inuttaqanngitsut pinngitsoornatik inuttaleqqinneqartassanngillat.

Soraarnerussutisiaqartitsinermik aaqqissuusseqqinneq

Soraarnerussutisiaqartitsisarnermik aaqqissuusseqqinneq, soraarnerussutisiaqartarnermi inatsimmik kinguneqartussaq aallartinneqassaaq.

• Suleqatigiissitamik immikkut ilisimasalinnik inuttalikkamik, ukiup ataatsip ingerlanerani soraarnerussutisiaqartitsisarnermik aaqqissuusseqqinnissamut kaammattuutinik tunniussisussamik pilersitsisoqassaaq.
• Kaammattuutit 2026-mi politikikkut isumaqatigiissutissamut toqqammaviussapput.
• Aaqqissuusseqqinnermi pingaartillugu eqqumaffigineqassaaq, ukiuni aggersuni utoqqalisut amerliartuinnassasut.

• Aaqqissuusseqqinnermi Kalaallit Nunaanni Danmarkimilu tjenestemandit soraarnerussutisiaasa assigiinnginneri pillugit unammillernartitanut aaqqiissummik imaqassaaq.

• Aaqqissuusseqqinneq kikkut tamarmik nammineerlutik soraarnerussutisiassaminnik katersinissaannut erseqqissunik aningaasaqarnikkut pilerinarnerulersitsinermik qularnaarinnittuussaaq.

• Aaqqissusseqqinnermut atatillugu soraarnerussutisiaqarnissamut aaqqissuussinermut pinngitsoorani ilaasussaatitaaneq nutarterneqassaaq.

Kommunit

• Kommunit avinneqarsinnaanerat pillugu suliniutinit ingerlareersut nangittumik suliarineqassapput.

• Kommunit aaqqissuussaaneri nutaaliorfiussapput, innuttaasut sumiiffimminni tamat oqartussaaqataanerat qanimut malugissavaat pisortallu ingerlannetsinerinut tatiginninneq annertunerulersinnissaa siunertaralugu nutaaliortoqassaq.

Aalisarnermut politikki

• Aalisarnerup iluani pissutsit allanngorartarnerisa ilutigisaannik inatsisit atuuttut ingerlaavartumik alaatsinaaffigineqassapput, aalisartut nunattalu aningaasarsiornissaat aningaasarsiornissaamut periarfissaasa pitsaasuunissaat pingaaruteqarmat.

• Aalisarnermut Siunnersuisoqatigiit attuumassuteqanngitsut pilersinneqassapput, taakku Naalakkersuisunut aalisarnermut suliassaqarfimmi siunnersuisassapput.
  

• Aalisarnermut Siunnersuisoqatigiit immikkut ilisimasalinnik attuumassuteqanngitsunik, nalitusiartortitsisarnermik tamanik ilisimasalinnik inuttaqassapput.

• Aalisakkat ilivitsut avammut niuerutigiinnarnagit, qanoq ililluni suliarinninneq aqqutigalugu aalisakkanik ataasiakkaanik aningaasarsiornerulersinnaanitsinnik suussusiisunik nalunaarusiortoqassaaq. 

• Nalunaarusiami tassani aningaasat ingerlaarnerat ilanngunneqassaaq, taamaalilluni aningaasat nalitusiartortitsinermi sumi aalisartut inuiaqatigiillu aalisagaatitsinnik aningaasarsiorluarnerunissarput paasineqarsinnaaqqullugu.

Peqqinnissamut politikki

• Peqqissutsimut isumaqatigiissut 2023-mi atsiorneqartoq annertusarneqassaaq.

• Ornikkuminassuseq, pitsaassuseq peqqinnissaqarnermilu suliniarnermi naligiinneq pitsanngorsarniarlugit aningaasaliisoqassaaq.

• Sulilersitsisarneq sulisooreersunillu tamanik tigumminniinnarnissaq sulinermi qitiutinneqassaaq.

• Unammillersinnaasunik aningaasarsiaqartitsinermik, piffissanik suliffiusunik pitsaasunik sulisullu inissiaannik nutaalianik periarfissaqarnermik pisariaqartitsiffiuvoq.

• Kalaallit peqqinnissaqarfimmi ilinniagallit nunani allaniittut angerlarnissaat pilerinarnerulersinniarneqassaaq.

• Ilinniaqqinneq pisariinnerulersinniarneqassaaq, assersuutigalugu sundhedsassistentit sygeplejerskitut ilinniarsinnaanerat oqinnerulersillugu.

• Utaqqisut allattorsimaffiat appartinniarlugu atorfinitsitsinerni ammanerusumik eqqarsarlutalu nunat avannarliinnaat eqqarsaatiginagit, nuannit amerlanerusunit sulisussanik aallertassaagut.

• Digitalikkut aaqqiissutinik, pingaartumik assersuutigalugu nunaqarfinni isorliunerusunilu innuttaasut atugassaannik app-inik ineriartortitsinernik kiisalu silassorissuusianik atuinertigut nukittorsaasoqassaaq. 

• Immikkut ilinniagallit napparsimasunut teknologi aqqutigalugu qaninnerulersinnerisigut, innuttaasut tamarmik sumi najugaqarnerat apeqqutaatinnagu eqqortumik katsorsarneqarnissaat qularnaarniarneqassaaq.

• Krætimut pilersaarutit pioreersut sukkanerusumik nappaatinik suussusiinissaq, pitsaanerusumik katsorsaanissaq napparsimasullu ilaqutaasalu ikorfartorneqarnissaat qularnaarniarlugu nangittumik suliarineqassapput.

• Tarnikkut nappaatit timikkut nappaatinut naligiissillugit akuerineqassapput.

• Nuna tamakkerlugu tarnikkut nakorsiartarfittut aaqqissussamik pilersitsinissaq anguniarneqassaaq.

• Dronning Ingridip Napparsimavissua (SANA) universitetshospitalinngortinneqarsinnaanera misissorneqassaaq.

• Peqqinnissaqarfik tassaaginnassanngilaq napparsimalernermi ornittagaq, peqqinnissaqarfik pinaveersaartitsinermi peqqinnerulersitsinermilu akuulluni suleqataassaaq. Paasititsiniaanerit, peqqissutsimik misissorneqarnerit, inuunerinnerulernissamullu neqeroorutit aaqqissuussap ilaatut ilanngutitinneqassapput.

Ilinniartitaanermut politikki

• Ilinniartitaaneq siunnerfilikkanik aningaasaliissuteqarnerit aqqutigalugit kivinneqassaaq, taamaalilluni minnerpaamik meeqqat atuarfianni naammassisut meeqqat tamarmik, sapinngisamillu amerlanerpaat piginnaasaqalerfiusumik ilinniagaqaleqqullugit.

• Namminersorlutik inuussutissarsiortut pisariaqartitaasa ilinniagassallu innuttaasunut neqeroorutigineqartut sakkortunerusumik ataqatigiissilerneqassapput.

• Ungasianit ilinniarsinnaanermut periarfissat pitsanngorsarnissaat siunertaralugu, internetikkut aqqutit pitsaanerusut nukittunerusullu sulissutigineqassapput.

Meeqqat atuarfiat

• Meeqqat atuarfiani immikkoortuni arlalinni atugarissaarnerlu annertusarniarlugit pitsaassutsip qaffassarnissaa sulissutigineqassaaq.

• Ilikkagaqartarneq pitsanngorsarniarlugu atuartitsinermi atortussiat kalaallisuut suliarineqarlutillu atugaalissapput.

• Tuluttut ilinniartitsineq qaffassarneqassaaq. 

• Aalaneq aqqutigalugu ilikkagaqarneq aallunneruneqassaaq.

• Meeqqanik ersinngitsumik innarluutillit atuagarsornermi inooqataanermilu piginnaasanik ineriartortitsinissaq siunertaralugu aaqqissussamik pitsaasumillu atuartinneqassapput. 

• Meeqqat ataasiakkaat qanoq annertutigisumik ikorfartorneqarnissaat immikkullu atuartinneqarnissaat aalajangerniarlugu, meeqqat ersinngitsumik innarluutillut tamarmik immikkut nalilersorneqartassapput. 

• Meeqqat ersinngitsumik innarluutillit atuagarsornikkut pikkorissut, atuarfinnili sinaakkutinut nalinginnaasunut naleqqutinngitsut aallunneqarnerat annertunerussaaq.

• Meeqqat atuarnerminnik ajornanngitsumik ingerlatsisut aamma ilikkagaqarfiusumik unammillerfiusunillu atuarnissaat qularnaarneqassaaq.

• Meeqqat atuarfianni fagit atuartitsissutit amerlassusaat susassaqartut peqatigalugit nalilerlersorneqassapput. 

• Meeqqat atuarfiat nunatsinni kulturimut nalimmassarneqarnerussaaq. 

• Atugarissaarneq tarnikkullu peqqissuuneq aallunneqarnerussapput, taamaaliornikkut meeqqat nukittunerulersinneqarsinnaaqqullugit. 

• ilinniartitsisut ataasiakkaat atuarfiillu ataasiakkaat namminneerlutik atuartitsinermik pilersaarusiornissamut kiffaanngissuseqarnerussapput. 

• Atugarissaarneq ilikkariartornerlu eqqarsaatigalugit, klassini meeqqat ikinnerulersinneqassapput. 

Inuusuttut ilinniarfii

• Ilinniarnermik unitsitsiinnartarnerup patsisaanik misissuineq.

• Ilulissani inuussuttunut ilinniarfilimmik, namminersorlutik inuussutissarsiortut pisariaqartitaannut nalimmassakkamik pilersinneqassaaq. 

• Inuussutissarsiornermi ilinniartitaanernut soqutiginninneq qaffassarniarlugu, paasititsiniaanernik inuusuttunut taakkulu angajoqqaavinut sammitinneqartumik aallartitsisoqassaaq. 

• Inuusuttunut timikkut tarnikkulluunniit innarluutilinnut immikkut siunnerfeqartumik inuusuttunut ilinniartitaanermik immikkut naleqqussakkamik neqerooruteqarnissamut periarfissaat misissorneqassapput.

• Inuili inuussutissalerinermut ilinniarfiuinnarnani siammasinnerusumik ilinniarfinngorluni, imminut pilersornermut attuumasunik tamanik aallussiffiusunngorlugu ineriartortinneqassaaq.

• Efterskolit aalajangersimasumik siunnerfilinngorsinnaanerannik nalilersorneqarlutillu isumaliutigeqqinneqassapput. 

• Pingaarnertut imarsiornermik ingerlatsivik umiarsuarmik atuarfittalimmik kiisalu timersornikkut ilikkiakkanut periarfissat misissorneqassapput.

Ingerlaqqiffiusumik ilinniarfiit

• Ilisimatusarfiup ilinniartitaanerni aqqutissanik suli amerlanerusunik pilersitsiortornermik nangitsinissaa kissaatigaarput, soorlu tamanna inatsisilerinermi biologimilu takugipput.

Ilaqutariit meeqqallu

• Isumaginninnikkut aaqqissuusseqqinneq Namminersorlutik Oqartussani kommuninilu aaqqissuussinernik naleqqussaasussaq aallartinneqassaaq.

• Meeqqat inatsisitigut illersorneqarnissaat qulakkeerumallugu, meeqqat immikkut maalaartarfeqalernissaat pilersinneqassaaq. Taannalu pissaaq MIO-p aaqqissuusaanera nutarterneqarneratigut meeqqat maalaarsinnaatitaanerannut passussilersinnaalersillugit.

• Angajoqqaat sulinngiffeqartarnerat sivitsorneqassaaq, sapaatit akunnerinit 21-nit sapaatit akunnerinut 37-nut sivitsuisoqassalluni.

• Angerlarsimaffiup avataanut inissiinissaq pisariaqalersillugu, meeqqap inuunerissuunissaa eqqarsaatigalugu ilaqutarsiat salliutinneqartassapput, matumani taamaaliornerup meeraq qitigutillugu iliuuseqarnerussaaq.

• Meeqqat toqqissisimanartumik inuuneqarnissaat qularnaarniarlugu ilaqutarsiat sukumiisumik nalilersorneqartassapput.

• Kommunit peqqinnissaqarfiullu siusissukkut suliniutinut ilaqutariinnullu ajornartorsiortunut ikorfartuinermik pitsaanerusumik suleqatigiissuteqartarnissaat kissaataavoq. Pinaveersaartitsinermi angajoqqaatut piginnaasat ilaqutariillu ataatsimut inissisimanerannik tamakkiisumik isiginnittumik periuseqarneq pisariaqarpoq.

Ulluunerani paaqqinniffiit

• Meeqqat sulisullu pitsaasunik sinaakkuteqarnissaannik qularnaarittoqassaaq.
• Meeqqat nappaateqartut pilertornerusumik paasineqartarnissaannut sakkussat pitsaanerusut. 

• Meeqqap angerlarsimaffimmini sumiginnagaaneranik takussutissaqartillugu 

  meeqqap pisariaqartitaa aallaavigalugu iliuuseqartarnissaq.

• Meeqqerivinni sulisut pitsaasunik atugaqartinneqarnissaat qulakkeerlugu kiisalu pikkorissarnissamut piginnaanngorsarnissamullu neqerooruteqartarneq pitsaasoq.

• Sulisut ilinniagaqarsimanngitsut, meeqqerivimmi ukiuni arlalinni sulereersimasut, piginnaasatigut uppernarsaatinik tunineqarsinnaanissaat periarfissinneqassapput.

Utoqqarnut politikki

• Utoqqarnut inatsimmik sulineq nanginneqassaaq, sulialli nanginneqarnerani attuumassuteqartutut soqutigisaqartut akuutinneqarnerussapput.

• Utoqqaat aningaasaqarnikkut, peqqinnermikkut inuunerissaarnermikkullu ajornakusoortitsisut immikkut aallunneqassapput.

• Utoqqaat ukiunik soraarninngorfissanik angusisut, suliffeqarnerminnik nangitsinissamut nukissaqarlutillu piumassuseqartut taamaaliornerminni pillarneqassanngillat. Taamaalilluni utoqqalinermi soraarnerussutisiaat ilanngarneqassanngillat, taamatullu aamma ullormut sivikinnerusumik sulisinnaanerat periarfissinneqassaaq.

• Kiserliornermik annikillisaanissamik siunertaqartumik neqeroorutinik pilersitsinissaq aallunneqassaaq.

Inuit innarluutillit

• Inuit innarluutillit sullitanngortinnagit qanoq tunniussisinnaaneranik aallussisoqassaaq. 
• Immikkoortumi aaqqissuusseqqinnermik suliat ingerlasut nangittumik suliarineqassapput.
• Ataasiakkaanut naleqqussakkanik aaqqissutit pingaarnertut allunneqassapput, taamaalilluni inuit innarluutillit amerlanerusut inuiaqatigiinni peqataasinnaaqqullugit. 
• Tamat ornittagaanni iserfissat pitsaanerusut, inissiat innarluutilinnut naleqquttut eqaatsumillu ullup ilaa nikerartumillu aaqqissuussinikkut sulinissamut periarfissaqarnissaa qularnaarniarneqassapput.

• Ulloq unnuarlu najugaqarfiit pisariaqartitsisunut ataqqinassusilinnik neqerooruteqarnermik qularnaarinninnissamut ilinniarluarsimasunik naammattunik sulisoqassapput. 

• Meeqqanut timikkut tarnikkullu piginnaanikitsunut ilaqutaasut pitsaanerusunik atugassaqassapput. 

• Angajoqqaat meeqqaminnut ikorfartuinissaminnut sivikinnerusumik suliffeqarnissamik kissaateqartut aningaasarsiaminnut taartisisarsinnaassapput, taamaalilluni ilaqutariit aningaasatigut toqqammavimminnik annaasaqaqqunagit. 

Ineqarnermut politikki

• Nammineq angerlarsimaffittaarnissap pilerinarnerulernissaanut tunngaviusumik sulissutigineqassaaq.
• Innuttaasut amerlasuut namminneq pigisaminnik initaarnissaat anguniagaavoq, tamanna qulakkeerneqarsinnaavoq erniat ilanngaasersorneqarnerisigut aammalu naleqquttumik aaqqissuussinikkut kiisalu innuttaasut illoqarfiit angisuut avataaniittut initaarusuttut attartornissamut pitsaasumik periarfissaqartariaqarput. Tamanna assersuutigalugu illumik sanaqatigiittarnermut periarfissat annertusarneqarneratigut pisinnaavoq.
• Nunap ilaani siullermeerlutik initaarniarlutik piserusuttunut periarfissaqanngingajalluinnarneranut aaqqiissuteqartoqartariaqarpoq.
• Akilerneqarsinnaasunik amerlanerusunik inissianik sanaartortoqassaaq, aammalu pioreersunik iluarsaassisoqassaaq.
• Inissiani oquttuni ussiitsunilu najugaqartoqassanngilaq.
• Ilaqutariit ikippata amerlappataluunniit pisariaqartitaat naapertorlugit initaarnissaannut qulakkeerinninnartoqassaaq.

• Pisortat pigisaanni inissiani peqatigiiffiit minnerpaamik ukiumut ataasiarlutik aaqqissuussamik oquttoqalersimasinnaaneranut misissuisoqartarnissaanut malittarisassanik suliaqartoqassaaq, ajornartorsiutaasup suliniuteqarfigineqarnissaa siunertaralugu.

• Imminut akilersinnaasunik inissialiortoqarnissaa, inissiaatileqatigiiffiit pisortallu inissiaataat pillugit kommunit suleqateqatigiinnerat nukittorsarneqarnissaa sulissutigineqassaaq.

• Suliariumannittussarsiuussisarnermi inatsit misissuiffigineqassaaq, taamaalilluni najukkani sanaartornermik suliallit amerlanerusut akuutinneqartalernissaat qulakkeerumallugu sullissinissamut isumaqatigiissut misissorneqassaaq, taamaalilluni sinerissami sanasut annertunerusumik suliaqalersinnaaniassammata.

Oqaatsit- peqataatitsinermilu politiki

• Kalaallit Nunaanni kalaallit oqaasii pisortatigoortumik oqaasiupput.

• Aalajangikkat assigisaallu kalaallisuunngorlugit nutserneqaqqaartarnissaannik innuttaasunit noqqaassutigineqartassanngillat, taamaattussaareerpormi.

• Kalaallisut oqaatsit suni tamani sulinermi atorneqartarnissaat ingerlaffigineqartariaqarpoq.

• Taamaattoq suliat ilarpassui – pingaartumik inatsisilerinermi aningaasaqarnikkullu sulinermi suli danskisut ingerlanneqartarnerat kalaallisuumullu nutserneqartarnerat naalakkersuisoqatigiit akueraat. Tamanna inuiattut nammineq inatsisilerituunik aningaasaqarnikkullu aqutsinermik ilisimasalinnik amerlanerusunik kalaallisut oqaatsit atorlugit sulisalernissap anguneqarnissaa tikillugu pisariaqassaaq.

• Inuit nunatsinnut nuuttartut pitsaanerusumik akuutinneqartalernissaat naalakkersuisoqatigiit sulissutigerusuppaat.

• Oqaatsitta ineriartortinneqarnissaannut, sulinermi ilinniartitsinermilu atorneqarnissaannut assersuutigalugu naqinnernik ilisarsisinnaanngitsunut misissuinissaq siunertaralugu teknologi ineriartortinneqassaaq.

Nunat tamalaat, illersornissaq isumannaallisaanermilu politikkit

• Nunanut allanut-, Sillimaniarnermut- aamma Illersornissamut politikitut periusissiaq 2024-miit 2033-imut ima oqaasertalik” ”KALAALLIT NUNAAT NUNARSUARMI” – pineqartilluta ilaassaagut” naalakkersuisooqatigiit tunngaviatigut sulissutiginiarpaat. 

• Nunarsuarmi politikikkut pissutsit eqqarsaatigalugit periusissiap nutarterneqartarnissaa siunertaralugu isumaqatigiissuteqarfigineqarsimasut suleqatigalugit uterfigeqqinneqartariaqarpoq.

• Tassunga atatillugu Kalaallit Nunaat nunat killiit illersoqatigiiffianni ilaanera aalajangiusimassallugu pingaaruteqarpoq. Tamanna qularutissaanngilaq.

• Nunarsuarmi nunat pissaanillit akornanni issittoq pingaarutilittut inissisimavoq, innuttaasut nunallu illersorneqarnissaat naalakkersuisooqatigiinnit anguniarneqarpoq.

• Nunatta anginerujussua innuttaasalu amerlannginnerat pissutigalugu namminiussuseqarnerput illersorumallugu nunarsuarmioqatinik suleqateqarnissaq pisariaqartipparput.

• Illersornissamut suleqatigiinnissaq eqqarsaatigalugu piffinni najugaqartut amerlanerusut akuutinneqarnissaat, ilaatigut issittumi tunngaviusumik ilinniartitaanerit allatigullu illersornissamut ilinniarneqarsinnaasut aqqutigalugit maani nunami aamma neqeroorutigineqartarnissaat pingaaruteqarpoq.

• Nunanut allanut politikerput ersarissuusariaqarpoq: Open For Business – Not For Sale. Kalaallit nunaat niueqatigiinnermut ammavoq – tuniniagaanngilarli.

• Issittumi apeqqutinut tunngatillugu Kalaallit Nunaata nipaa sakkortunerusariaqartoq naalakkersuisoqatigiit anguniarpaat, Danmarkip Kunngeqarfiani kisiartaagatta issittumi najugaqartut. 

• Nunat Avannarliit Siunnersuisoqatigiivini susassaqarfinni tamani nunatta naligineqarluni naligiimmillu pineqarnissaa pillugu piumasaqarneq naalakkersuisoqatigiit attappaat.

• Issittumi Siunnersuisoqatigiinni nunatta suleqataanera pingaaruteqarpoq. Issittumi Siunnersuisoqatigiinni nunatta aqutseqataanera issittormiunut naggueqatitsinnullu nukittuunngortitsissaaq.

Attaveqaqatigiinneq

• Kalaallit Nunaanni attaveqaativut pitsaanerusumik ataqatigiittariaqarput.

• Angallassinermut aaqqissuussineq nutaaq sumiiffinni najugaqartunut iluaqutaanerulernissaa siunertaralugu sullissinissamut isumaqatigiissutit misissorneqassapput. Taamaaliornikkut nunatsinni angalaneq akikinnerulerniassammat pisariinnerulerniasssammallu.

• Sullissinissamut isumaqatigiissuteqartut namminersortunut unammillinnginnissaat naalakkersuisooqatigiinnut pingaaruteqarpoq. Tamanna takornarialerinermut aammalu sullississutinut allanut atuuppoq.

• Nuna tamakkerlugu talittarfiit nutarsarneqarnissaannut iluarsartuunneqarnissaannullu pingaarnersiuilluni pilersaarusiorneq ingerlanneqassaaq. 

• Timmisartoqarfiit mittarfiillu pillugit pilersaarusiortoqassaaq.

• Nuna tamakkerlugu talittarfiit timmisartoqarfiillu pilersaarusiorfigineqarnerisigut takornariat innuttaasullu pisariaqartitaannik pingaartinneqarlutik suliaqartoqassaaq piviusunngortinneqassallunilu.

• Nuummi, Ilulissani Qaqortumilu mittarfiliortiternernut atatillugu aningaasaliinerit annertuut ingerlanneqareersut nuna tamakkerlugu iluaqutaalernissaat qulakkeerneqassaaq.
  

• Tasiilami, Ittoqqortoormiini timmisartoqarfiliortoqarnissaa matuma qinersiviup ingerlanerani aallartinneqassasut qulakkeerneqassaaq.

Piniarneq

• Tamakkiisumik piniartuuneq annertuumik ulorianartorsiortinneqarpoq, kisianni piniartuuneq aallaaniartarnerlu kinguaariippassuarni suli ingerlanneqartartussaavoq.

• Puisip neqaa, arferup neqaa, tuttup neqaa nuna tamakkerlugu angerlaanneqartuartussaapput. Kulturitsinnut ilaalluinnartut peerneqarsinnaanngilluinnartut.

• Arferit puisillu neqaasa tamanit pissarsiarineqarsinnaanerisa qulakkeerneqarnissaa sulissutigineqassaaq.

• Piniagassat eqqortumik amerlassusilerneqarsimanersut misissorneqartariaqarpoq. Tamanna piniartut uumassusilerinermilu siunnersuisut suleqatigalugit ingerlanneqassaaq.

• Kinguaariit tulliuttut piniagassaqarnissaat aamma pingaaruteqartoq naalakkersuisoqatigiit isumaqarput.

• Tamatuma saniatigut ullumikkut piniartortatsinnut pikkorissarnissaat ilinniartitaanissaannillu neqeroorfigineqartalernissaat pillugu sulissutiginnittoqassaaq, taamaaliornikkut piniartutut isertitat assersuutigalugu takornarianik sullissinermik imaluunniit aalisarnermik tapertaqalersinnaaqqullugit.

Timersorneq

• Timersorneq taassumalu iluaqutissartai tamarmik sammineqarnerussapput.

• Aningaasat amerlanerusut naliginnaasumik timersornermut aamma qaffasissumik  timersornermut atorneqassapput.

• Timersorneq inuulluataarnermik peqqinnerunermillu tunisisarpoq, inuusaatsip kinguneranik nappaatinik ingalassimatitsisuulluni, aammali ataatsimoornermik ataatsimooqatigiinnerup anersaavanik, akuunermik siunnerfeqarnermillu pissusissamillu malinnilluarnerunermik tunisisarpoq.

• Pikkorinnerit nunatsinni timersortarnerat aamma pitsanngorsaavigineqartariaqarpoq. Atortuutit pitsaanerulertariaqarput, sungiusarnermullu nunallu tamat akornanni unamminerni peqataanissamut periarfissat annertunerusariaqarput.

• Meeqqanut, inuusuttunut, utoqqarnut, innarluutilinnut aamma tamanut timersornermut aningaasaliinerusoqassaaq.

• Aalaakkaasumik timigissartarnerup inuusaatsip nassatarisaanik soorlu sukkornermik uummatillu taqarsuanik nappaatinik nalaanneqarnissamut aarlerinaammik annikinnerulersitsisarnera ilisimareerparput.

• Peqatigiiffinnik nukittorsaasoqassaaq. Peqatigiiffiit sungiusarnermut unamminermullu tunngaannanngillat. Taakku sinaakkutinik suleqatigiinnermik, ataqqinninnermik ataatsimoornermillu ilinniarfigisarpagut. Peqatigiiffiit attaveqaatinik peqqinnartunik pilersitsisarput, tamattalu angerlarsimalluta misigiffigisartakkatsinnik pilersitsisarlutik.

• Esportip timersuutitut akuerineqarnissaa sulissutigineqassaaq.

• Nunatsinni pissartanngorniukkiartorluni angalanernut atatillugu akikilliliissutinik eqqussisoqarsinnaanera sukumiisumik misissorneqassaaq.

Naalagaaffinngoriartorneq

• Nunatta naalagaaffinngoriartuaarnerani piorsarsimassusitta inuiattutt ataatsimoortitsisup ikorfartorlugulu piorsartuarnissaanut aamma pingaaruteqarpoq.

• Tassunga atatillugu eqqumiitsuliorneq kulturilu kinaassutsitsinnut, ataatsimoornitsinnut immitsinnullu paasinissatsinnut pingaaruteqartumik inissisimapput. Eqqumiitsuliorneq kulturilu eqqarsarnermi, oqallinnermi isiginnittaatsinillu allannguisinnaanissamut sakkuupput, oqartussaaqataanerullu uummaarissup ineriartortinnerani pingaaruteqarlutik.

• Nipilersorneq, filmi, isiginnaartitsineq, atuakkat assilissanillu eqqumiitsuliat ileqqutsinnik unammilligassiisarput. Kinguaariit akimorlugit ataqatigiissutsimik pilersitsillutillu ataatsimut oqaluttuassartatsinnik siaruarterisuupput. Oqaluttuatoqqanit unikkaartuanit oqariartaatsinut oqaasilianullu. Kiffaanngissuseqarluta eqqumiitsuliorsinnaanitta sinnattornissamut, naqisimaneqarnani isumaliornissamut sapiitsuliornissamullu periarfissittarpaatigut.

• Kulturi kikkunnut tamanut tunngasuussaaq, taamaammallu eqqumiitsuliornermi ineriartornerup pitsaasunik sinaakkuteqarnissaanik qulakkeerinninniarluni sulineq nanginneqassaaq.

• Inatsisartut manna tikillugu kulturikkut inuunerup ingerlaavartumik ineriartortinneqarnissaanik pingaartitsinerat isumaqatigineqarpoq. Tamanna allanngortinneqassanngilaq. Assersuutigalugu naalakkersuisooqatigiit filmiliornermik inuussutissarsiornermut tunngasunik pitsaasunik killissaliinissaq sulissutigissavaa.

• Tusagassiorfiit kiffaanngissuseqartut attuumassuteqanngitsullu tamat oqartussaaqataaneranni ingerlalluartumi pingaaruteqarluinnartuupput. Taamaammat tusagassiorfinnut tapiisarneq nutarterneqassaaq, taamaalilluni tusagassiorfiit digitalimik ingerlasut, soorlu nittartakkani quppernerit podcastillu ilaalersinneqarlutik.

• Tusagassiorfinnut tapeeriaaseq ullutsinnut naleqquttoq, nutaaliornermut inissaqartitsillunilu tamat oqartussaaqataaneranni oqallinnermik nukittunerulersitsisoq naalakkersuisooqatigiit kissaatigaat.

• Peqatigisaanik Kalaallit Nunaata Radioata aningaasaqarnerata pitsanngorsarnissaa pingaaruteqarpoq. Kalaallit Nunaata Radioa nukittooq attuumassuteqanngitsorlu oqartussaaqataanitta sukaraat, tusagassiornermillu siammasissumik tutsuiginartumillu, oqaatsitsinnik, kulturitsinnik assigiinngiiaartuunitsinnillu takutitsisuussaaq.