Jens-Frederik: Ataatsimeersuarnerit ingerlanneqassapput
Naalakkersuisut siulittaasuat, Jens-Frederik Nielsen (D) Siumumut isumaqataavoq silaannaq salinneqartariaqartoq aammalu pissutsit pitsaanerulersinneqartariaqartut Kalaallit Nunaata nunat tamalaat akornanni mittarfittaarsimaneranut atatillugu. Taanna nalunaarpoq namminersorlutik oqartussani ingerlatseqatigiiffinnut immikkut ittumik ataatsimeersuartinneqassasut.
Naalakkersuisut siulittaasuat, Jens-Frederik Nielsen (D), suli ulluliisinnaanngilaq qaqugu Greenland Airports aamma namminersorlutik oqartussat suliffeqarfiutaasa allat ataatsimeersuartinneqassanersut, kisianni qanittukkut pisussaasoq, Sermitsiamut oqarpoq.
Assiliisoq: Oscar Scott Carl
Greenland Airportsimut tunngatillugu Erik Jensen Siumumeersoq tigussaasunik arlalissuarnik saqqummiussivoq partiip isumaa naapertorlugu kukkussutaasimasutut amigaataasutullu isumaqarfigisaminnik.
Tamatuma malitsigisaanik partii Naalakkersuisut siulittaasuanut noqqaassuteqarpoq immikkut ittumik ataatsimeersuartitsisoqassasoq.
Jens-Frederik Nielsen (D) Sermitsiamut uppernarsarpaa ataatsimeersuartitsinerit Naalakkersuisut pilersaarutaanniittut, kisianni siullermik Siumumut tapersersuivoq:
- Siumup saqqummiussaanut atatillugu ajornartorsiutit amerlasuut ilisarnarmata isumaqataagama oqaatigisinnaavara, angalanitsinnilu tamatta annerusumik minnerusumilluunniit nalaataqartartugut. Nalunngilarput ilaasut amerlasuut, Nuup mittarfia atulerneraniit, anganiarnermi akimmiffiit arlaqatartartut aammalu utaqqisarnerit sivisuut nalaanneqartartut, silalu tamatumunnga pissutaanngikkaluaraangalluunniit, misigineqartartut. Tamanna eqqumaffigisorujussuuarput iluarsisariarporlu. Taamaattumik ataatsimeersuartitsinissamut qilanaarpunga, Naalakkersuisut siulittaasuat oqarpoq.
Piumasaqaatit sakkortunerusut
Greenland Airportsimut immikkut ittumik piumasaqaatit atuutsinneqalersinnaappat?
- Kalaallit Nunaannut pingaaruteqarpoq timmisartuussineq pitsaanerpaamik ingerlanneqassasoq, nunami namminermi timmisartuussinerit kisiisa pinnagit aammali nunat tamalaat akornanni timmisartuussinerit eqqarsaatigalugit. Pingaaruteqarpoq nunatta timmisartuussinermut tunngasutigut tatiginninnerata innarlerneqannginnissaa aammalu Siumumut isumaqataavunga sapinngisamik qulakkeertariaqaripput Qaqortumi Ilulissanilu mittarfiit Nuup mittarfiani pisutut nalaataqannginnissaat.
Kinguneqartitsisoqassava siulersuisunut aammalu/imaluunniit aqutsisunut?
- Immikkut ittumik ataatsimeersuartitsisussaavugut, kisianni massakkuugallartillugu oqaatigisinnaanngilara suliffeqarfimmut tassunga tunngatillugu ataatsimeersuarnissaq sunik siunertaqassanersoq, kisianni erseqqilluinnarpoq kukkunerit amigaataasullu siunissami uteqqinnginnissaat anguniartariaqaripput, tassanilu siulersuisut uagutsinnut piginnittut sinniisuattut inissisimasunut pingaarutilimmik inissisimapput.
Naalakkersuisut piareersimappat kinguneqartitsisinnaanissamut?
- Soorunami, uagullu piginnittutut erseqqissumik piumasaqaateqassaagut kukkunerit amigaataallu annikinnerpaaffianiinnissaat pillugu. Tamanna siulersuisut nalunngilaat, kisianni piumasaqaat taanna uteqqittariaqarparput. Tassami pingaaruteqarpoq, piginnittutut piumasaqaatitsinnut naatsorsuutigisatsinnullu ingerlatsinerup naapertuuttuunissaa, aammalu ingerlatseqatigiiffiup ilisimaqqissaartariaqarpaa suut naammassiniartariaqartutut nalilernerigut.
Aamma suliffeqarfiit allat tullinnguupput
Greenland Airports kimi pinnani aamma Namminersorlutik Oqartussat suliffeqarfiutaasa sinneri tamarmik immikkut ittumik ataatsimeersuartinneqassapput:
- Tamanna attuumassuteqarpoq inatsisit naapertorlugit ataatsimeersuarnerit ingerlanneqarnissaat Inatsisartunullu qinersinerup imminnut qanittuararsuusimanerannik. Maanna ataatsimeersuarnerit ilimasaarutigineqareersut ingerlattussaavagut, aamma piginnittutut naatsorsuutigisagut piumasagut nalimmassarnissaat tassani pissammat, ullumikkut ulluliisinnaanngikkaluarlunga taamaattoq sukkasuumik sulivugut ataatsimeersuarnerit ingerlanneqarnissaat sulissutigalugu, Naalakkersuisut siulittaasuat Jens-Frederik Nielsen (D) naggasiivoq.
