Siumut Greenland Airports pillugu: Piaartumik immikkut ittumik ataatsimeersuartoqarli!
Kukkussutit amigaatillu ilaasunut tutsinneqartartut iluarsiivigineqarnissaat pisariaqarpoq, tamannalu pinartuuvoq. Taamak isumaqarpoq partii Siumut. Inatsisartuni ilaasortaq, Erik Jensen (S), Naalakkersuisut siulittaasuanut kaammattuivoq ingerlatseqatigiiffimmi immikkut ittumik ataatsimeersuartoqassasoq.
- Nuummi mittarfik atulerneraniit, manna tikillugu ilaasorpassuit timmisartukkullu assartuinermik atuisartut amerlasuut kukkunerit amigaatillu amerlasuut misigisimavaat, tamakkulu Greenland Airportsip mittarfiup atulerneqannginnerani iluarseriigassarinikuugaluarpai, Siumut sinnerlugu taamak oqarpoq Inatsisartuni ilaasortaq Erik Jensen (S) .
Foto: Oscar Scott Carl
Inatsisartut ilaasortaq, Erik Jensen (S) piumasaqaatiminnut atatillugu erseqqissaavoq, Greenland Airportsimi aqutsisut siulersuisullu suliassaminnik naammassinnissinnaanngitsut takussutissarpassuaqartoq.
Taassuma ilaatigut innersuussutigai mittarfiup utaqqisarfiani ilaasussat nalunaaquttap akunnerpassuini utaqqisinneqartartut. Angalasut tikerlaat aallalersulluunniit utaqqisarfimmut iseqqusaanatik timmisartup saavani utaqqisinneqartartut kiisalu angalasut ingerlaqqinnaveernerminni unnuisariaqartartut unnuiffissaqartinneqannginnamik sumi tamaani sinittariaqartartut.
- Kisianni aamma utoqqaat, pitsorluttut innarluutilillu kiisalu ilaqutariit meerartallit mittarfimmi nalunaaquttap akunnerpassuini Nuummiit ingerlaqqinnissaminnut utaqqisariaqartarnerat nalinginnaavallaaleqaaq. Angalasullu aallarsinnaanngikkaangamik aamma nalornissutigisarpaat unniffissaqassanerlutik, tamannalu assut isornarpoq, Erik Jensen oqarpoq.
Siumup tungaanit matumani eqqartorneqartut ilagaat partiip maanna piumasaqalerneranut Greenland Airportsip qullersaqarfiani iluarsartuussinissamik.
- Silap pissusia allanngortissinnaanngilarput, silallu pissusia unammilligassaasinnaasoq nalunngilarput. Kisianni silagissuugaluartorluunniit, kinguaattoornerpassuit misigineqartalerput. Tamannalu pissuteqarpoq Greenland Airportsip aqutsisuisa siulersuisuisa kukkussutit amigaatillu naammaginartumik aaqqiiviginninniarsimannginnerannik, Erik Jensen (S) oqarpoq.
Taassuma erseqqissarpaa, isornartorsiuineq Greenland Airportsimi sulisut nalinginnaasunut sammisinneqanngitsoq:
- Ilaasut toqqissisimanissaat qitiutillugu sulisut annertuumik nersortarialimmillu tamaviaarlutik sulipput, taamaattumik isornartorsiuinermi suliffeqarfiup sulisui pineqanngillat, kisianni aqutsisut siulersuisullu, taakkumi sulisuminnut, suliaminnik pitsaasumik naammassinnissinnaanissaannut periarfissiinngillat. Allaat aarleqqutigineqarsinnaavoq sulisut qimagussulersinnaasut, taakkununnga atugassarititaasut oqilisaaffigineqanngippata, Erik Jensen Siumut sinnerlugu oqarpoq.
Atortut isumannaallisaanermillu qulakkeerinninneq amigaateqaqisut
Aammattaaq Erik Jensen (S) oqarpoq atortunik amigaateqartoqarnera ilungersunartuusoq, timmisartut orsernissaannut orsiissutit ikippallaartut, timmisartumit niulernermi timmisartumullu ikilernermi majuartarfiit ikippallaartut, aputaajaatit ikippallaartut, isumannaallisaanermut sulisut ikippallaartut aammalu avatangiisit ippinnartut, soorlu biilinut inissiisarfiit, annertuumik ajornartorsiortitsisut.
- Tupinnaqaaq, suliffeqarfik kukkunernik amigaatinillu taama amerlatigisunik nalaataqartitsigaluartoq ingerlatiinnarneqarmat, Siumumiimmi isumaqarpugut tamakkorpassuit mittarfiup atuutilinnginneranili aaqqinneqareersimasussaagaluartut:
- Tamanna isumaalliorneruvoq aamma qulakkeerneqartariaqarpoq Ilulissani Qaqortumilu mittarfiit ammarnerini taamak annertutigisumik pisoqaqqinnginnissaa qulakkeerneqartariaqarpoq. Taamaattumik Naalakkersuisut immikkut ittumik ataatsimeersuartitsisariaqarput, Greenland Airportsimulli piumasarineqartariaqarpoq kinguarsaanertaqanngitsumik pissutsit iluarsaanneqassasut.
Erik Jensen aamma innersuussivoq piffissami sivisuumi Air Greenland aamma Icelandair kisimik mittarfimmut missinnaatitaanikuusut, allat tamarmik immikkut akuersissummik qinnuteqaqqaarlutik aatsaat missinnaasut:
- Maanna piviusuuvoq Nuup mittarfia timmisartuutileqatigiiffinnit nunanit tamalaaneersunit atorneqalereermat. Iliuuseqanngitsuuginnarsinnaanngilagullu nunatsinni innuttaasut angalasut kisiisa piinnarnangit aammali nunanit tamalaaneersut pissusissamisuunngitsunik nalaataqartinneqartarnerat tassunga killeqartariaqarpoq.
Taava isumaqarpit aaqqiissutissaq tassaasoq siulersuisut aqutsisullu taarserneqarnissaat?
- Tamanna Naalakkersuisut siulittaasuata aalajangigassaraa. Taanna ingerlatseqatigiiffinnut siulersuisunullu akisussaavoq. Kisianni ajornartorsiutit nipangiutiinnarlugit qaangerneqarnavianngillat, iliuuseqartoqartariaqarpoq Ilulissani Qaqortumilu mittarfiit ammarneqannginneranni, Erik Jensen akivoq.
Naalakkersuisut siulittaasuat, Jens-Frederik Nielsen (D), oqaaseqartinniarlugu Sermitsiamit sulissutigaarput.
