Danmarkimi ministeriuneq Mette Frederiksen spiralinik kanngunartuliornermut kisimi utoqqatsinngilaq, aamma Naalakkersuisut siulittaasuat Jens-Frederik Nielsen piffissami 1992-imiit maannamut Kalaallit Nunaata peqqinnissaqarfiata tiguneqarnerata kingorna pisunut utoqqatserpoq.
Nakorsaaneqarfik naapertorlugu arnat 15-it 1992-ip kingorna akuerseqqaaratik spiralilerneqarsimapput. Taakkuli arnat 4500-t 1966-imit 1975-imut Danmarkimi innuttaasut amerliartornerat unikaallatsinniarlugu danskit oqartussaasuisa periusissiaat naapertorlugu spiralilerneqarsimasunut sanilliullugit amerlavallaanngillat.
Danmarkimi ministeriuneq Mette Frederiksen spiralinik kanngunartuliornermut kisimi utoqqatsinngilaq, aamma Naalakkersuisut siulittaasuat Jens-Frederik Nielsen piffissami 1992-imiit maannamut Kalaallit Nunaata peqqinnissaqarfiata tiguneqarnerata kingorna pisunut utoqqatserpoq.
Nakorsaaneqarfik naapertorlugu arnat 15-it 1992-ip kingorna akuerseqqaaratik spiralilerneqarsimapput. Taakkuli arnat 4500-t 1966-imit 1975-imut Danmarkimi innuttaasut amerliartornerat unikaallatsinniarlugu danskit oqartussaasuisa periusissiaat naapertorlugu spiralilerneqarsimasunut sanilliullugit amerlavallaanngillat.
Pisooqataasut
Naalakkersuisut spiralilersuilluni kanngunartuliornermi „utoqqatseqataanerat“, taamaalillutillu pisooqataanerat arlalinnit tupaallaatigineqarsimavoq.
Assersuutigalugu oqallisissiortoq Michael Bro Facebookimi allappoq "pinerlunnerit taakku pilersaarutigineqarlutillu naammassineqarmata, tamatumalu kingorna aaqqissuussaasumik kinguneqartitsinerit pineqarmata, uagut nammineerluta oqartussatut pissaaneqarata inuiaasutut pisuussuteqarsinnaanngilagut. Naalakkersuisut naalakkersuisutsinnut innuttaasutsinnullu sinniisuusussaagaluartut Danmarkimi naalagaaffik peqatigalugu utoqqatsernerat ernumanartorujussuuvoq, eqqunngitsuullunilu naleqquttuunngilaq. […] Danmark qallunaallu naalagaaffiat kisimik inuiannut iliuuserisimasaminnut akisussaalluinnartariaqartut isumaqarpunga.“
Ataatsimoorluni utoqqatserneq
Jens-Frederik Nielsen Naalakkersuisut spiralilersuisimanermut tunngatillugu ministeriuneq utoqqatsertoq sooq tapersersorneraat apeineqarami ima akivoq:
– Sivisuumik suliaraarput, Naalakkersuisullu tungaannit isummerneq ersarilluinnarpoq – naalakkersuisooqatigiit siuliini maannakkullu naalakkersuisooqatigiinni; Qanoq pisoqarsimanersoq nalunngilarput, aamma atornerluisoqarsimasoq amerlasuullu tarnimikkut ikilerneqarsimasut nalunngilarput.
– Arnat ilisimanagu spiralimik naartunaveersaatilluunniit allat atorlugit naartunaveersaasigaasimasut samminissaat Naalakkersuisut pingaarnerpaatippaat. Akisussaaffipput nassuerutigaarput, arnallu eqqugaasut taarsiiffigineqarnissaat januaarimiilli sulissutigisimavarput. Qanoq ililluni taarsiiffigitinnissamik qinnuteqartoqarsinnaanersoq qanittukkunni nalunaarutigissavarput. Arnat danskit naalagaaffiannut taarsiiffigitinnissamik piumasaqarsimasut aamma tapersersorpagut.
Naligiinnerulernissaq anguniarlugu ilungersorneq
Jens-Frederik Nielsenip utoqqatserneq siullertut saammaateqatigiinnissamut alloriarnertut pingaaruteqartutut isigaa.
– Naalagaaffeqatigiinni naligiinnerulernissaq anguniarlugu ilungersornitsinni siornatigut pisimasunik qulaajaasoqarnissaa pimoorullugu anguniarsimavarput. Utoqqatserneq eqqugaasunut tamatigut naammanneq ajortoq nalunngilarput. Timimi tarnimilu ikit mamisikkuminaatsuusut. Akisussaaffilli tigusariaqarparput. Tamannalu alloriarneruvoq pingaarutilik, maannalu iliuuserisinnaasatta minnerpaartaraat, taanna oqarpoq.
Danmarkip akiliinissaanut piffissanngortoq
Naalakkersuisunut siulittaasuusimasoq Múte B. Egede, spiralilersuinerup inuiannik toqoraaneruneranik oqarsimasup, Naalakkersuisut ministeriunerlu nalunaarutaat Facebookikkut aamma oqaaseqarfigaa.
”Kiisami danskit naalagaaffiat spiralilersuisimanerminut utoqqatserpoq akisussaaffinilu nassuerutigalugu. Tamanna eqqunngitsumik pineqarsimasut eqqarsaatigalugit inissaminiiginnarpoq. Eqqugaasut ilungersuuteqarlutillu suliniuteqartut eqqarsaatinniipput Danskit utoqqatsernermikkut nassuerput eqqunngitsuliorsimanerminnut. Taamaammat arnat eqqunngitsumik pineqarsimasut, danskit naalagaaffiata piumasaat malillugu taarsiiffigisariaqarpai piaartumik. Piffissanngorpoq danskit akiliinissaannut - Aamma eqqunngitsuliaminnut allanut.”
Naalakkersuisut naapertorlugit spiralilersuisimaneq pillugu arlaannaannulluunniit attuumassuteqanngitsumik misissuineq ulluni tulliuttuni tamanut saqqummiunneqassaaq. Tamatuma kingorna danskit ministeriunerat peqatigalugu utoqqatsertoqassaaq, arnallu eqqugaasut ilaat aamma najuukkumaartut neriuutigineqarpoq.
