- Oqaloqatigiinnermi isumaqatigiinniarnernik ingerlatsisoqanngilaq qalleqqissarneqarlunili Naalakkersuisunngortut isumaqatigiissutaani anguniarneqartut piffissami aggersumi naapeqatigiisssutigineqartarnissaat naatsorsuutigineqassasoq.
Naalakkersuisut siulittaasuat Jens-Frederik Nielsen (D) tusagassiorfinnut nalunaarummi taama allappoq.
- Oqaloqatigiinnermi isumaqatigiinniarnernik ingerlatsisoqanngilaq qalleqqissarneqarlunili Naalakkersuisunngortut isumaqatigiissutaani anguniarneqartut piffissami aggersumi naapeqatigiisssutigineqartarnissaat naatsorsuutigineqassasoq.
Naalakkersuisut siulittaasuat Jens-Frederik Nielsen (D) tusagassiorfinnut nalunaarummi taama allappoq.
Tassani isumaginninnermut, suliffeqarnermut nunamullu namminermut naalakkersuisuusimasup Jess Svanep (S) tallimanngormat isornartorsiuinera toqqaannanngitsumik akissuteqarfigaa. Taassuma Jens-Frederik Nielsen namminersorneq pillugu inatsisip oqaasertai pillugit oqaaseqarnera isornartorsiorpaa.
Jens-Frederik Nielsen sapaatit akunneri marlungajaat qaangiuttut Danmarkimiippoq, tassani ministeriuneq Mette Frederiksen (Socialdemokraterne) ataatsimeeqatigalugu. Nunap siuttuisa taakku marluk namminersorneq pillugu inatsit suliareqqinneqassanersoq eqqartorsimannguatsiarpaat.
- Sunik tamanik periarfissaqarpoq, aamma namminersorneq pillugu inatsimmik misissuinissaq periarfissaavoq. Danmarki kalaallit inuiaqatigiivinut aningaasaliiumavoq, Mette Frederiksen Marienborgimi sapaammi apriilip 27-ani oqarpoq.
Namminersorneq pillugu inatsit nutarterneqarlunilu, Inatsisartullu inissitsiternerisa kingorna isumaqatigiinniarnerit aallartinneqassasut Demokraatit, Siumut, Inuit Ataqatigiit Atassutillu naalakkersuisooqatigiinnissamut isumaqatigiissutaanni allassimavoq. Apriilip arfineq-aappaanni tamanna pivoq.
Jens-Frederik Nielsenili tamanna pillugu iliuuseqarnissamut piginnaatitaanngitsoq Jess Svane isumaqarpoq.
- Namminersorneq
pillugu Inatsit nunat marluk akornanni isumaqatiginninniutissaanngilaq. Inatsit
tassaavoq inuiaat Kalaallit piumasaanik ersersitsisoq taamaallaallu
inuiaqatigiit Kalaallit pigisaat allanngortissinnaasaallu, tusagassiorfinnut nalunaarummi allappoq.
Jens-Frederik inissinneqartariaqartoq
Naalakkersuisut siulittaasuata namminersorneq pillugu inatsit qanoq allanngortinneqarsinnaanera pillugu Danmarkimik oqaloqateqarnera Jess Svanep ajoraa. Taamaaliornissamik tunngavissaqanngitsoq taanna isumaqarpoq.
Jens-Frederik Nielsenili naapertorlugu nunap siuttuisuisa taakkua marluk naalakkersuisooqatigiinnissamik isumaqatigiissut nutaaq namminiilivinnissamillu anguniagaqarneq kisiat eqqartorpaat.
Jess Svanep aamma Danmarkimut attaveqarnerup annertusarneqarnissaanik oqariartuutit apeqquserpai, Jens-Frederik Nielsenili naapertorlugu Danmarkimut pituttornerunissaq pineqanngilaq.
- Nunarsuarmi pissutsit tunngavigalugit Danmarki aammalu NATO suleqatigilluartussaavagut. Suleqatigiilluarneq isumaqanngilaq Danmarkimut pituttornerusoqalernissaanik, nunattami soqutigisaraa namminersulivinnissaq taamaattoq aamma soqutisaralugu nunarsuarmiooqataalluni sillimaniarnissamut suleqataanissaq, Naalakkersuisut siulittaasuat oqarpoq.
Jess Svanelli Jens-Frederik Nielsen Inatsisartunut nassuiaateqaqquaa.
- Isumaqarpunga pissusissamisuussasoq
Naalakkersuisut Siulittaasuat periarfissaq siulleq atorlugu, sulerisimanini
qanorlu danskit peqatigalugit siunnerfilersuisimarpalunnini pillugit, Inatsisartunut
nassuiaateqarpat. Kalaallit Nunaata siunissaa namminiussuseqarneralu pillugit
oqalunneq isumaqatiginninniarpalunnerlu taamaallaat ammasumik
ingerlanneqarsinnaapput, aamma taamaallaat innuttaasut erseqqissumik
tunuliaqutsiisimaneratigut, allappoq.
Jens-Frederik Nielsen taanna pillugu akissuteqanngilaq.
Jess Svane marsip aqqarngani qinersinermi Siumut sinnerlugu Inatsisartunut ilaasortanngoqqinngilaq, sinniisullu pingajuattut inissilluni.
Sermitsiap Siumup siulittaasua Vivian Motzfeldt oqaaseqartikkumallugu attaveqarfigigaluarpaa, taannalu suli akissuteqanngilaq.
