Jens-Frederik: Soorunami Mette tikeraassaaq

Naalakkersuisunut siulittaasunngortussaq, Jens-Frederik Nielsen (D) erseqqissaavoq Vivian Motzfeldtip tusagassiorfinnut nalunaarutini nammineq akisussaaffigigaa:

- Erseqqissaatigissavara tikeraartoqarnissaanut tunngasut oqaatigineqartut naalakkersuisunngortussat isummernerinngimmassuk, Jens-Frederik Nielsen Facebookimi quppernermini erseqqissaavoq.

Tikeraarnissaanut qilanaarpoq

- Ministeriunerup tikeraarnissaa kissaatiginikuuarput aammalu assut uanga nammineq qilanaaraara. Qallunaat Nunaat suleqatitsinni qaninnerpaatut suleqatigigatsigu naliginnaasuuvoq sukkanerpaamik naapinnissarput. Ministeriunermut kissaatigalugu apuuppara pilersaarutigut attatiinnassagigut. 

Jens-Frederik Nielsen naggataatigut erseqqissaavoq Naalakkersuisut siulittaasussaattut qilanaarluni oqaloqatigiilluarnissaminnut siunissami suleqatigiinnissaq eqqarsaatigalugu.

Ministeriuneq Mette Frederiksen (Soc.dem.) marlunngornermiit tallimanngornermut Kalaallit Nunaanni tikeraassaaq, Sermitsiallu paasisai naapertorlugit tikeraarneq Kalaallit Nunaata Namminersornerullutik Oqartussat Ministeriuneqarfimmillu aaqqissuunneqarsimasoq.