NAALAKKERSUISUT:
Kalaallit Danmarkimi innuttaasut ernummatigaat
Inuit pisinnaatitaaffiisa unioqqutinneqarnerisa unitsinneqarnissaanik innuttaasunillu kalaallinik assigiinngisitsinermik Danmarkimi naalakkersuisut unitsitsinissaannik Naalakkersuisut piumasaqarput
Danmarkimi kommunit ilaanni kalaallit inuttaasut pineqartarnerat assut isornartoqarpoq, ilaatigut Naalakkersuisut siulittaasuata Múte Bourup Egedep tusagassiuutinut nalunaarummi atsiugaani allassimavoq
Photo: Leiff Josefsen
"Danmarkimi
kommunit ilaanni kalaallit inuttaasut pineqartarnerat assut isornartoqarpoq", Naalakkersuisut siulittaasuata Múte Bourup Egedep aamma Meeqqanut, Inuusuttunut, Ilinniartitaanermut, Kultureqarnermut Timersornermullu Naalakkersuisup Aqqaluaq Biilmann Egedep tusagassiuutinut nalunaarummi atsioqatigiissutigisaanni tamanna allassimavoq.
Danmarkimi kommunit ilaasa suli kalaallit angajoqqaatut piginnaaneri pillugit misissuisarnerat Naalakkersuisut ernummatigaat.
Misissuineq atorunnaarli
"Inuit sumiuunerat eqqarsaatigeqqaarnagu misissuisarneq
isornartorujussuullunilu akuerineqarsinnaanngilaq. Misissueriaaseq atorneqartoq
inuttaasunut kalaallinut naleqquttuunngitsoq ukiuni arlaqartuni ilisimaneqarpoq.
Misissueriaatsip kalaallinut naleqquttuunnginnera uppernarsakkamik
ilisimaneqarpoq Danmarkimilu kommunit ilisimasat taakku pigereerpaat. Misissuinerni
ataqqineqassapput sumiuussuseq, oqaatsit aamma kulturi, taakkumi inatsisitigut
pisinnaatitaaffiit naapertorlugit illersorneqartussaammata. Inuit pisinnaatitaaffiisa
unioqqutinneqarnerat unitsinneqassasoq innuttaasunillu kalaallinik assigiinngisitsineq
Danmarkimi naalakkersuisut unitsissagaat Naalakkersuisut piumasaraat."
Angajoqqaat kalaallit piginnaasaannik misissuisarnernik ammillu qalipaataa patsisigalugu immikkoortitsisarnermik unitsitsinissamik Naalakkersuisut danskit oqartussaasuinut sakkortuumik kaammattuipput.
"Inuit eqqarsarsartaatsikkut piginnaasaannik,
pissusilersuutaannillu misissuutinik atuineq kalaallinillu angajoqqaanik ammip
qalipaataa patsisigalugu immikkoortitsineq Danmarkimi oqartussat unitsissagaat Naalakkersuisut
sakkortunerpaamik inassutigaat."
Aqqaluaq Biilmann Egedep danskit isumaginninnermut ineqarnermullu ministeriat Sophie Hæstorp Andersen, pisoq pillugu piaartumik ataatsimeeqatiginiarlugu qinnuigisimallugu, Sermitsiamut sapaatip-akunnerani matumani siusinnerusukkut oqarpoq.
ICC misissuisoqarnissaanik piumasaqarpoq
Pissutsit akuerineqarsinnaanngitsut eqqarsaatigalugit Kalaallit Nunaanni Naalakkersuisut Danmarkimi Naalakkersuisunut pissutsit ilungersunartut pillugit misissuisoqarnissaanik piaartumik saaffiginnissuteqassasut ICC Kalaallit Nunaanni isumaqarpoq. Nalagaaffiit Peqatigiit Nunat Inoqqaavisa Atugaat Pillugit Nalunaaruteqartartuata José Francisco Cali Tzay-ip kingullermik Danmarkimut Kalaallit Nunaannullu angalanermini nalunaarusiaani aamma kalaallit Danmarkimi najugaqartut atugaat immikkoortitsisarnerillu nunat inoqqaavisa pisinnaatitaaffiinut unioqqutitsinerusut ICC-p innersuussutigaa.
- Nalunanngitsumik pisinnaatitaaffinnik
unioqqutitsisoqarpoq, pingaartumik kalaallit Danmarkimiittut meeraannik
arsaarinnittarnerup qanoq annertutiginera eqqarsaatigalugu, Hjalmar Dahl ICC
Kalaallit Nunaanni siulittaasoq oqarpoq.
