Danmarkimi pinngitsaaliissummik arsaarinninnerit pillugit:
Naalakkersuisoq isumaginninnermut ministerimik piaartumik ataatsimeeqateqarumavoq
Danskit oqartussaasuisa ilaat assigiinngisitsinerat akuerineqarsinnaanngilaq, Aqqaluaq B. Egede (IA) oqarpoq, taassumalu isumaginninnermut ministeri Sophie Hæstorp (S) Keira Alexandra Kronvoldip panianik inoorlaamik pinngitsaaliissummik arsaarneqarneranut atatillugu piaartumik ataatsimeeqatigiumavaa.
”Isornarlunilu akuerineqarsinnaanngilaq” nunaqqativut – pingaartumik ilaqutariit sanngiinnerpaat – qallunaat oqartussaasuisa ilaannit assigiinngisitsinikkut ilungersortinneqarmata, naalakkersuisoq Aqqaluaq B. Egede, meeqqamik pinngitsaaliissummik arsaarinninnermut atatillugu psykometrimik misilitsinnerit isornartorsiorneqangaatsiarsimasut Thisted Kommunip atorsimaneri pillugit oqarpoq.
Assi: Leiff Josefsen
– Tamanna assuarnartorujussuuvoq. Meeqqat angajoqqaallu Kalaallit Nunaanneersut suliami ajorluinnrtumi eqqorneqarput. Allatut oqaaseqarlutalu kultureqarnerput qallunaat kommuniisa ataqqisariaqarpaat, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede (IA), Keira Alexandra Kronvold pillugu suliamut tunngatillugu oqarpoq. Taanna ernerlaajulluni Thisted Kommunemit pinngitsaalineqarluni meeqqaminik inoorlaajusumik arsaagaavoq.
Aqqaluaq B. Egede Sermitsiamut oqarpoq “isornartorsiorneqartariaqarlunilu akuerineqarsinnaanngitsoq” nunaqqatigisat – pingaartumik ilaqutariit sanngiinnerpaat – Danmarkimi oqartussaasunit immikkoortinneqartarnerat.
– Isumaginninnermut ministeri piaartumik ataatsimeeqatiginissaa qinnutigaara, Aqqaluaq B. Egede, qanoq iliuuseqassanersoq aperineqarami akivoq.
Arfininngormat Københavnimi Rådhuspladsimi akerliussutsimik takutitsisoqarpoq Nuummilu kalaallit meerartaannik Danmarkimi najugalinnik pinngitsaaliissummik arsaarneqartarnermut angajoqqaallu piginnaanerinut misissuinernut akerliussutsimik takutitsisoqarluni.
