KL

DK

Kalaallit Nunaanni peqqissuseq pillugu misissuineq annertooq aallartippoq

Kalaallit Nunaanni peqqissuuneq atugarissaarnerlu pillugit misissuinermi suliniummut innuttaasut 8000-it peqataanissamut qaaqquneqarput.

Professori Christina Viskum Lytken Larsen aamma 2018-imi inuuniarnermi atukkat, inooriaatsit peqqissutsillu pillugit innuttaasunik misissuisitsivoq.
Morten Okkels Tusagassiortoq
Saqqummersinneqarpoq

Innuttaasut peqqissusaat pillugu sukumiisumik paasissutissiissutaasumik 2024-mit 2026-mut misissuisoqarnissaa piffissanngorpoq.

- Innuttaasut qanoq innersut ataavartumik misissuissaagut, piffissallu ingerlanerani qanoq ineriartortoqarnersoq malinnaaffigisinnaavarput, professor Christina Viskum Lytken Larsen, Syddansk Universitetimi Innuttaasut Peqqissusiannik Ilisimatusarfimmeersoq oqarpoq.

1993-imiilli misissuineq arfinilissaa ingerlanneqarpoq, Peqqissutsimullu Naalakkersuisoqarfik sinnerlugu Ilisimatusarfik suleqatigalugu Kalaallit Nunaanni Innuttaasut Peqqissusiannik Ilisimatusarfik misissuinermik ingerlatsivoq.

- Paasissutissat kommuninit Namminersorlutillu Oqartussanit atorneqartarput, taamaattumillu peqqissutsip siuarsarnissaanut pinaveersaartitsinermullu suliniutit pingaarnersiuiffiginissaannut tunngavissaalluarput, professori naqissusiivoq.

Peqqissuseq assigiinngitsorpassuarnik tunngaveqarpoq

Kalaallit Nunaanni innuttaasut 8.000-it peqataanissamut neqeroorfigineqassapput, peqataasullu peqqissutsimut pingaarutilinnik arlalinnik aperineqassapput. Assersuutigalugu pinngortitaq, ilaqutariit, ataatsimoorneq oqaatsillu.

- Kalaallit Nunaanni peqqissutsimut KRAM-it (nerisat, pujortarneq, imigassaq timigissarnerlu, aaqq.) kisiisa apeqqutaanngillat, taamaattumik tamanna misissueqqissaarnermi soorunami aamma eqqarsaatigineqartariaqarpoq. Pinngortitaq, ataatsimoorneq kulturilu pingaaruteqarput, Christina Viskum Lytken Larsen oqarpoq.

Kalaallit Nunaanni paasissutissanik katersineq inunnik oqaloqateqarnikkut pisinnaavoq, aammali allatigut, Kirsten Nystrup, Kalaallit Nunaanni Innuttaasut Peqqissusiannik Ilisimatusarfimmi aamma SDU-mi immikkut siunnersorti, oqaluttuarpoq:

- Peqataasut amerlanerusut maanna internetikkut oqarasuaatikkulluunniit apersorneqarsinnaalissapput. Taamaalilluta inoqarfiit minnerusut amerlanerusut tikissinnaalissavavut, misissuinerlu siornatigornit sumiiffinnit tamalaanit peqataaffigineqarnerulissaaq.

Misissuineq 2026-mi naammassineqartussatut naatsorsuutigineqarpoq, nalunaarusiarlu tamarmiusoq 2027-mi naammassineqassaaq.

inuiaqatigiit befolkningsundersøgelse christina viskum lytken larsen samfund sundhed folkesundhed

ATORFIIT Se alle jobs

Powered by Labrador CMS