KALAALLIT NUNAAT USA-LU
Kalaallit Nunaata USA-llu akornanni naapinnissaq suli pissanngikkallarpoq
Naalakkersuisut siulittaasuat aamma nunanut allanut tunngasunut Naalakkersuisoq NATO-p ataatsimeersuarnerani, Haagimi, Hollandimi aqagu aallartittussami peqataassanngillat. Nunanut allanut tunngasunut Naalakkersuisoq Haagimut angalanissamut periarfissarsioraluarpoq, ilaatigut USA-p nunanut allanut tunngasunut ministeria Marco Rubio pisortatigoortuunngitsumik naapinnissaa anguniarlugu. Sermitsiamilli paasisagut naapertorlugit peqataasinnaanera taamaatiinnarneqarpoq piffissaliussat ajornartorsiutaammata.
Vivian Motzfeldt (S) neriuuteqaraluarpoq NATO-p ataatsimeersuarnerani Haagimi ingerlanneqartumi, suleqatit attuumassuteqartut naapeqatigissallugit, tassanimi ataatsimiinnermi nunat NATO-mi ilaasortat illersornissamut nunanullu allanut tunngasunut ministerii tamarmik najuttussaammata, taakkununnga ilaalluni USA-p nunanut allanut tunngasunut ministeria Marco Rubio.
Arkivfoto: Leiff Josefsen
Kingullertigut Kalaallit Nunaata aammalu politikerit nuimasut nunanit tamalaaneersut akornanni ataatsimeeqateqarnerit arlallit pipput. Ilaatigut Naalakkersuisut siulittaasuata Frankrigillu præsidentiata Emmanuel Macronip, Nuummi sapaatip akunnerata siuliani sapaammi tikeraarnerani taamatut pisoqartoq.
Tamatuma saniatigut aamma uppernarsaatitaqanngitsumik tusaamaneqaleraluarpoq, politikerimik allamik nuimasumik Kalaallit Nunaannut tikeraartoqassasoq, tassalu Amerikap nunanut allanut ministeria Marco Rubio.
Naalakkersuisut USA-mik ataatsimeeqateqarnissaminnut qilanaaraluarlutik, taamaattoq nunanut allanut tunngasunut naalakkersuisoq Vivian Motzfeldt (S) tallimanngormat, suli nalunarallarmat ilumut Vivian NATO-p ataatsimeersuarneranut atatillugu Haagiliassanersoq, Sermitsiamit apersorneqarluni oqarpoq tamanna ilumuunngitsoq:
- Pitsaanerussaaq ataatsimiinnerput siulleq (USA-mi nunatsinnilu qinersinerit kingorna, aaqq.) pitsaanerussaaq nunami attuumassuteqanngitsumi naapeqatigiinnissarput pissappat, periarfissarlu taanna NATO-p ataatsimeersuarnera iluatsillugu piviusunngortinneqarsinnaanersoq misissorneqaleruttorpoq, Vivian Motzfeldt Sermitsiamut tallimanngormat oqarpoq.
Taassuma naalakkersuisoqarfiata uppernarsarpaa, NATO-p ataatsimeersuarnerani Haagimi, nunanut allanut tunngasunut Naalakkersuisup nunanut allanut ministeqatiminik ataatsimeeqateqarnissaq periarfissatut misissorneqartoq, tassunga ilanngullugu Amerikap nunanut allanut ministeria Marco Rubio ataatsimeeqatigineqarsinnaanersoq.
Aammattaaq naalakkersuisoqarfimmit ilisimatitsissutigineqarpoq Vivian Motzfeldt peqataasinnaajunnaarsimasoq piffissaliussat akimmiffeqartitsineri pissutigalugit.
Nunarput sinnerlugu NATO-p ataatsimeersuarneranut Haagimut angalasoqarpoq
Nunanut allanut naalakkersuisoqarfimmi pisortaq Mininnguaq Kleist Hollandimi Haagimut angalavoq ataatsimeersuarnerup ingerlanerani nunatta suleqataanik naapitsissamaarluni.
Taamaattorli aamma naalakkersuisoqarfimmit erseqqissaatigineqarpoq, Naalakkersuisut ataatsimeersuarnermi pisortatigoortumik najuutissanngitsut politikkikkut imaluunniit atorfilittatigoortumik.
Nunanut allanut naalakkersuisoqarfimmi atorfilittat pisortaat, Mininnguaq Kleist, Hollandimut aallanngitsiarnerani Sermitsiamit attaveqarfigaarput:
- Politikkikkut ataatsimeeqatigiittoqanngilaq Kalaallit Nunaat USA-lu akornanni, kisianni uppernarsarsinnaavara atorfilittatigoortumik maanna Hollandimut ingerlasugut. Suleqatit ataatsimeersuarnermi Haagimi najuuttut naapissavakka. Taamaattorli Naalakkersuisut ataatsimeersuarnerup pisortatigoortumik ingerlanneqarnerani najuussinnaanngillat. Taamaattumik ataatsimiinnerit uanga ingerlatassakka illoqarfimmi sumiiffinni allani ingerlanneqassapput.
Nunanut allanut Naalakkersuisoq, Vivian Motzfeldt (S), USA-mik ataatsimeeqateqarnissamut tunngatillugu allatigut periarfissarsiortoqarnersoq pillugu Sermitsiamit oqaaseqartinniarlugu sulissutigaarput.
