ISUMANNAALLISAANEQ ILLERSORNISSARLU
USA-mik oqaloqatiginninnissamut Vivian qilanaarpoq
- Isumannaallisaaneq illersornissarlu pillugit USA-mik oqaloqatigiinnissamut piareersimavugut, kisianni tamanna sioqqullugu amerikamiut Kalaallit Nunaannik piginnittuunissamik aqutsilernissamillu oqaluuserinninnerminnik unitsitsisariaqarput, nunanut allanut tunngasunut Naalakkersuisoq, Vivian Motzfeldt (S) erseqqissaavoq.
Nunanut allanut tunngasunut Naalakkersuisoq, Vivian Motzfeldt (S) aamma illersornissamut Ministeri Troels Lund Poulsen (V) akuttunngitsumik ataatsimeeqatigiittarput naalagaaffiup Issittup immikkoortuani isumannaallisaanermut illersornissamullu tunngatillugu. Tassunga tunngatillugu Kalaallit Nunaata, Danmarkip aamma Savalimmiut akornanni isumaqatigiissut naammassineqarnikuuvoq, taamaattorli peqatigiit illersornissamut isumaqatigiissummut atatillugu nalilernikuuaat isumannaallisaanikkut pissutsit politikkikkut inissisimaneranni pisariaqartinneqartoq isumaqatigiissutip immikkoortuisa aappaannik isumaqatigiissusiornissaq, taannalu 2025-ip ingerlanerani naammassineqassasoq naatsorsuutigineqarpoq.
Asseq toqqorsivimmit: Leiff Josefsen
- Isumannaallisaanermut illersornissamullu sulineq arlalinnik immikkoortortaqarpoq, ataatsimoorlutik ataasiakkaarlutillu tamarmik nunatsinnut pingaaruteqartunik, nunanut allanut tunngasunut Naalakkersuisoq, Vivian Motzfeldt (S) sapaatip akunnerata tulliata aallartinnerani Savalimmiuni isumannaallisaanermut illersornissamullu ataatsimiinnissaq sioqqullugu.
- Issittoq pillugu Kalaallit Nunaanniit annertunerusumik nammineq oqartussaassuseqarnissarput anguniagarivarput, taamaattoq illersornissamut ministeri peqatigalugu maannamut angusagut pitsaasutut nalilerpagut. Kisianni suli iluarsartuussinissamik pisariaqartitsivugut. Tassami isumannaallisaaneq pillugu politikkikkut pissutsit allanngorartuarmata sorsunnerit akerleriinnerillu pissutigalugit, aamma nunani killiusuni iligiit akornanni illersornissamut isumaqatigiissutit aalaakkaasumik ingerlanneqarnissaat isumaginiaruminaallisarami. Tamakkulu saniatigut Kalaallit Nunaat Issittorlu isorartoorujussuummata, taamaammat aamma illersorneqarnissaa pillugu iligiit akornanni suleqatigiinnissamik pisariaqartitsigatta, Vivian Motzfeldt oqarpoq nangillunilu:
- Taamaattumik aamma pisariaqarpoq ataavartumik iligisatsinnik suleqatitsinnillu oqaloqateqartarnissarput. Assersuutigalugu imartatta imartattalu naqqata ilarujussui illersorneqanngillat nakkutigineqaratillu, tamannalu illersornissaqarfiup kisimiilluni nammassinnaanngilaa. Taamaattumik nunat allat, pingaartumik nunatsinnut qanittumik inissisimasut, ersarissumik isumaqatigiissuteqarfiginissaat, nunanut allanut tunngasunut Naalakkersuisoq, Vivian Motzfeldt (S) oqarpoq.
Taama oqareerluni, Vivian Motzfeldtip attaveqaqatigiinnissamut ataatsimiititaliami ataatsimiinnissaq sioqqullugu nunarput sinnerlugu apuussassaminik apuussisimatinnani annertunerusumik oqaaseqarusunngilaq.
USA utaqqisitsivoq
Nunat allat maannamut suleqatigiinnissaq siunertaralugu oqaloqatigineqarsimasut Vivian Motzfeldtip innersuussutigai ilaatigut tassaapput Tuluit Nunaat, Portugal, Frankrig aammalu Europami nunat kattuffiat EU, USA-mummi tunngaasut sumut killippat?
- Siullermik erseqqissaatigissavaara USA-mik isumaqatigiissuteqaratta atuuttunik allatigullu aamma suleqatigiinnermik inerisaagatta, ilaatigut illersornissamut isumaqatigiissut 1951-meersoq tunngavigalugu ilaatigullu ukiumoortumik Permanent Committee aammalu Joint Committee aqqutigalugit, taakkulu aqqutigalugit Kalaallit Nunaannut USA-mullu iluaqutissaasut anguniarlugit suleqatigiikkatta.
- Tamatuma saniatigut aamma NATO, tassa iligiit ataatsimoorfigisarput, tassanilu suleqatigiinnerput pingaaruteqartuuvoq Issittoq pillugu isumannaallisaanikkut illersornissamullu politikkikkut sulinermi. Tassani aamma USA-p pingaarutilimmik inissisimaffiaqarpoq.
Kisianni takusinnaavarput USA-p præsidentia Donald Trump suli kissaateqartoq Kalaallit Nunaannik aqutsinissaminik piginnittuunissaminillu, Nunatta USA-llu akornanni toqqaannartumik attaveqatigiittoqarpa?
- Amerikamiut illersornissamut ministeriata oqariartuuteqarnera maluginiarpara, tassalu suleqatigiinnissatsinnut qilanaarnerartoq. Uagutsinnilli oqarsinnaavunga, Kalaallit Nunaanni Issittumilu isumannaallisaanermut illersornissamullu oqaloqateqarnissatsinnut piareersimajuaannarnikuugatta sulilu piareersimalluta, Vivian Motzfeldt naqissusiivoq nangillunilu:
- Amerikamiut erseqqissumik paasitinneqareerput Kalaallit Nunaanni inuiaat nunaminnik piginnittuullutillu oqartussaasut. Taamaattumik oqaloqatigiinnissanut aallaaviuvoq amerikamiut uagut inuiattut nunattullu akuerissagaatigut ataqqillutalu, taamaalillutillu uagut sutut pigiligassatut oqaluuseriunnaassagaatigut. Tamanna qilanaaraarput, uagummi tungitsinnit USA-mik suleqatiginnikkusunnerput ikinngutigiittullu ingerlaqqinnissatsinnik kissaateqarnerput allanngornikuunngilaq.
Naggataatigut nunanut allanut tunngasunut Naalakkersuisoq oqaluttuarpoq nunat akornanni toqqaannartumik ataatsimiinnernik pilersitsinissamut diplomatiskimik sulisoqartoq.
- Inatsisartunut qinersinermut atatillugu qineqqusaarnermi neriorsuutigaarput USA-mut oqaloqatiginnissalluta, tamannalu aallartitaqarfipput Washington DC-miittoq aqqutigalugu amerikamiullu aallartitaqarfiat Nuummiittoq suleqatigalugu sulissutigaarput.
