Kim Kielsen KNAPK-mut: Paatsuuisimagunarpusi
Aningaasanut inatsisissaq pillugu isumaqatigiissuteqarnerup kingorna KNAPK-p sakkortuumik oqaaseqarnera Aalisarnermut Piniarnermullu Naalakkersuisup Kim Kielsenip ilumuunnginnerarpaa. Kissaatigineqartut tusarnaarsimavagut ineriartortitsinermullu aningaasaliissuteqarsimalluta, Kim Kielsen oqarpoq.
KNAPK-p aningaasanut inatsisissamut aalisarnermullu inatsisissamut oqaaseqaatai aalisarnermut naalakkersuisup Kim Kielsenip (S) akueriumanngilai.
Assi: Leiff Josefsen
Sapaatip-akunnerata siuliani IA-p Siumullu aningaasanut inatsisissaq isumaqatigiissutigereeraallu, Naalakkersuisut Inatsisartullu amerlanerussuteqartut KNAPK-p sakkortuumik isornartorsiorpai. KNAPK naapertorlugu politikkerit aalisarnermut iluaqutaasumik iliuuseqarusunnginnerannik aalisarnermut inatsisissaq ersersitsivoq.
- Ajoraluartumik naalakkersuisoqarpugut tusaanngitsunik, tassami sinerissap qanittuani aalisarnermi atukkat ajornerulersinneqartussanngorput. Politikki sinerissap qanittuani aalisarneq piniarnerlu pitsaasumik iliuuseqarfigineqanngilaq, kattuffiup siulittaasua, Nikkulaat Jeremiassen, taama oqaaseqarpoq.
Maanna aalisarnermut piniarnermullu naalakkersuisoq akivoq isornartorsiuineq tamanna paatsuuinerusoq:
- Aningaasanut 2025-mut inatsisissatut siunnersuummi aalisarnermut piniarnermullu inerisartortitsinissamut 22 millionit koruunit missaanni aningaasaliisoqassaaq. Aamma ESU (inuussutissarsiortunut ikiorsiissut, aaqq.) ullutsinnut naleqqussarniarlugu misissuiffigissallugu pilersaaruteqarpunga. Aalisartut piniartullu ullutsinnut siunissamullu piumasaat naapertorlugit tapiisalernissaq misissuinerup siunertarissallugulu qulakkiissavaa, siger Kim Kielsen (S) oqarpoq.
Aamma sinerissap qanittuani aalisarneq inatsip nutaap sukateriffiginninnissaanik KNAPK-p oqarnera Kim Kielsenip akerlilerumavaa.
- Aalisartut kissaataat naalaartarpavut, soorlu PNNP-mik kissaateqarnerat naalaaripput. Aqutsiveqarfimmi 47-mi umiatsiaararsortut kissaatertik naapertorlugu taanna tunngavigalugu aalisarnissaminnut periarfissaqarput. PNNP-mik aalisalernissap aallartinnissaa pillugu Aalisarnermut Piniarnermullu Naalakkersuisoqarfik maannakkut suliaqaleruttorpoq, aalisalernerup allartinnginnerani allaffissornikkut naammassisassat suliaralugit.
Nalunaarummini KNAPK-p siulittaasuata suna anguniarneraa nalulluinnarlugu, Kim Kielsen ilassuteqarluni oqarpoq.
