KNAPK: Naalakkersuisut tusaajumanngitsut aalisarneq puigorsimavaat
Aalisartut piniartullu kattuffiat naalakkersuisut aningaasanut inatsisissatut siunnersuut pillugu isornartorsiorpaat. - Aalisarnermut iluaqutaasussanik iliuuseqartoqarniarnera amigaataavoq, KNAPK isornartorsiuivoq.
- Politikerit namminneq inatsisiliornertik tunngavigalugu imminnut nittarsaapput, KNAPK-p siulittaasua Nikkulaat Jeremiassen isumaqarpoq.
Assiliisoq: Leiff Josefsen
- Naalakkersuisooqatigiit sinerissap qanittuani aalisarneq ataatsimilluunniit misigissuseqarfiginngilaat, aamma arlaatigut suliniutinik imaluunniit iliuusissanik inatsit imaqanngilaq, sinerissap qanittuanik imaluunniit aalisarneq ataatsimut isigalugu siuariartortitsisinnaasunik, KNAPK-p siulittaasua Nikkulaat
Jeremiassen oqarpoq.
KNAPK-p nammineerluni oqaatigaa
naalakkersuinikkut isumaqatigiissummut sunniuteqarnissamut annertuumik suliaqarsimagaluarlutik, taannalu, tassa aningaasanut inatsit pillugu isumaqatigiissut ataasinngormat IA aamma
Siumut isumaqatigiissuteqareersullu avammut saqqummiunneqarpoq.
Taamaattoq
kattuffik isumaqarpoq asuliinnaq immersuiniaqataasimagaluarluni, naalakkersuinikkut
suliassamik sunniuteqarnissamut periarfissaqarsimannginnami,
politikerit aalisartut 2025-mi unammilligassaannik
tusarnaarusussuseqanngimmata.
KNAPK-p oqaatigaa, aalisartunut
atugassarititaasut ajorseriarnerisigut aamma nunami suliffissaqartitsinermut
sunniuteqartussaassasoq. Kisianni naalakkersuinikkut
piumassuseqartoqarsimanngilaq, siulittaasoq Nikkulaat
Jeremiassen naliliivoq.
- Ajoraluartumik naalakkersuisoqarpugut tusaanngitsunik, tassami sinerissap qanittuani aalisarnermi atukkat ajornerulersinneqartussanngorput. Politikki sinerissap qanittuani aalisarneq piniarnerlu pitsaasumik iliuuseqarfigineqanngilaq, Nikkulaat Jeremiassen naggasiilluni oqarpoq.
