PINNGITSAALIISSUMMIK ARSAARINNINNERIT
Københavnimi akerliussutsimik takutitsineq: Naammaleqaaq!
Kalaallit Nunaanneersut 100-t missaanniittut allagartarsualerlutik, oqalugiarlutik oqaasinnaalerlutillu Danmarkimi kalaallit meerartaannik pinngitsaaliissummik arsaarinnittarneq akiorniarlugu akerliussutsimik takutitsipput. – Tamanna unittariaqalerpoq. Naammaleqaaq!, aaqqissuisut oqariartuuteqarput
Danmarkimi meeqqanik pinngitsaaliissummik arsaarinnittarneq pillugu arfininngormat Kalaallit Nunaannit inuit 100-t missaanniittut akerliussutsimik takutitsimmata suaartartoqarlunilu, erinarsortoqarlunilu qissattoqarpoq.
Keira Alexandra Kronvoldip meeraata sapaatip-akunnerani matumani inunngornerata kinguninngua pinngitsaaliissummik arsaarinnissutaanera akerliussutsimik takutitsinermut pissutaavoq. Tamanna Sermitsiami aamma allaaserisarparput. Akerliussutsimik takutitsinermi peqataasut ilagaat angajoqqaat arlallit namminneq meeqqaminnik pinngitsaaliissummik arsaarinninnermik misigisaqarsimasut.
Taakkua ilagaat Qupalu Platou, 2015-imi ernini marlulissat peqatigalugit Danmarkimut nuuttoq. Sivitsunngitsoq Holstebromi kingornalu Ringkøbing-Skjern Kommunemi Qupalu ernerilu soqutigineqalerput, ukiullu marluk ingerlanerini suliat amerliartorujoorput, nukappiaqqat 2017-imi pinngitsaaliissummik arsaagaanissaata tungaanut. Ullumikkut qulingiluanik ukioqarput angajoqqaarsiaminnilu najugaqarlutik. (Uani atuaruk)
– Qaammatip matuma naanerani Meeqqanut Inuusuttunullu Ataatsimiititaq ataatsimeeqatigissavara. Nukappiaqqat Kalaallit Nunaannukartikkusuppakka, Danmarkimiinnatik kalaallinik angajoqqaarsiaqarsinnaaniassammata, Qupalu Platou oqarpoq.
Misissuinerit unitsinneqarlik
Akerliussutsimik takutitsinermik aaqqissuussisoq tassaavoq MAPI-p siulittaasua Laila Bertelsen, taassumalu Københavnimi Rådhuspladsimit Christiansborg Slotspladsimut ingerlaaqatigiinneq taama amerlatigisunik peqataaffigineqarmat qujamasuutigaa.
– Kialluunniit tapersersuinera pingaaruteqarpoq, ataatsimoornerlu nuanneqaaq. Inuttut atugarliortutut taaneqartarneq maani amerlasuut misigisimavaat, meeqqamilli pinngitsaaliissummik arsaarneqaraanni aamma ikiortittoqarneq ajorpoq, inutullu sanngiilliartornartarluni. Meeqqat arsaarinnissutaasut amerlasuut aamma taamatut misigisaqartut takusarpavut, Laila Bertelsen oqaluttuarpoq, angajoqqaallu piginnaaneri pillugit misissuinerit Danmarkimi kommunini tamani ingerlaannaq unitsinneqartariaqartut taanna isumaqarpoq.
Birthe Nathanielsenip (saamerleq) Qupalu Platouillu angajoqqaatut piginnaanitik pillugit danskit kommuniinit soqutigineqarnertik misigisimavaat. Qupalu Platou 2017-imi marluliaatiminik, maanna qulingiluanik ukiulinnik, pinngitsaalissummik arsaarneqarpoq.
Trine Juncher Jørgensen
– Angajoqqaat piginnaasaannik misissuinerit taakku kalaallit oqaasiinut kulturiannullu naleqqussarneqalernissaata tungaanut Danmarkimi kommunini tamani atorunnaarsinneqartariaqarput. Danmarkimi kulturikkut tunuliaqutarput oqaatsivullu atorlugit inuunissamut pisinnaatitaaffeqarpugut, aamma nunap inoqqaavi pillugit isumaqatigiissut naapertorlugu illersorneqarnissatsinnut pisinnaatitaaffeqarpugut, Laila Bertelsen oqarpoq.
