KL

DK

Københavnimi akerliussutsimik takutitsisut: - Trumpi ajorputit

Danmarkimi akerliussutsimik takutitsisut Trumpip USA-mi præsidentitut ivertinneqarnera Kalaallit Nunaatalu aqulerniarneranik oqariartuutaa akerleriissutaasoq qisuariarfigaat. - Nunarput tuniniagaanngilaq, akerliussutsimik takutitsinermik aaqqissuussisoq oqarpoq.

Assip qeqqani Sika Kristensen aaqqissuisorlu Poul Johansen. - Nunarput ilaquttavullu ungasissumiittut tapersersorniarlugit katersuuppugut, Københavnimi akerliussutsimik takutitsinermik aaqqissuisoq oqarpoq.
Julia Aka Wille
Tusagassiortoq
Saqqummersinneqarpoq

Donald Trump ullumi ataasinngornermi USA-p præsidentiisa 47-ssaattut ivertinneqarpoq. Ippassarli sapaammi præsidentinngoqqinnissaa Kalaallit Nunaatalu pisiarinissaanik oqariartuutaa qisuariarfigineqarput.

Inuit 30-t missaanniittut Københavnimi Rådhuspladsimi allagartarsualisaarlutik erfalasulerlutillu akerliussutsimik takutitsipput. Oqariartuutaat paatsoorneqarsinnaanngilaq: Kalaallit Nunaat tuniniagaanngilaq.

Akissut pisariaqartoq

Pisariaqassappat sakkutuut atorlugit Kalaallit Nunaat tiguarniarlugu amerikami præsidenti oqararpat akineqartariaqarpoq. Akerliussutsimik takutitsinermik aaqqissuussisoq Poul Johansen taama isumaqarpoq.

- Akerliussutsimik takutitsineq præsidentinngorlaap Kalaallit Nunaannik pisiumalluni oqaaseqarneranut aamma sakkutooqarnikkut pissaanermik atuinissamut piareersimaneranut qisuariarneruvoq. Oqaatsit annilaarnartut pissutigalugit pilersaarutillu akerlerineqarnera takutinniarlugu ullumikkut maaniippugut, Poul Johansen Aasianneersoq maanna Danmarkimi najugaqartoq oqarpoq.

Trumpip Kalaallit Nunaat pillugu takorluugai suli piviusuupput

Inuit 30-t missaanniittut Rådhuspladsimiit Amerikamiut Københavnimi aallartitaqarfiannut allagartarsuaqarlutik erfalasoqarlutillu ingerlaaqatigiipput.

Donald Trumpip Kalaallit Nunaata pisiarerusullugu 2019-imi oqarnera tusagassiutigut sammineqangaatsiarnikuuvoq. "Pigisanut aningaasaliineq annertooq“ ilaatigut taama taavaa. Præsidentinngorlaap suli ivertinneqarani Kalaallit Nunaata USA-mi naalagaaffiit 51-issaattut inissinnissaa puiorsimanagu takutereerpaa. Sika Kristensen Københavnimi akerliussutsimik takutitsinermi oqalugiartoq naapertorlugu tamanna kalaallinik meeqqatut pinninneruvoq.

- USA aqagu nutaamik præsidenteqalertussaavoq. Præsidenti nutaaq nunasiaatilittut kisermaassilluni aqutsisutut eqqarsartaatsitoqqamik atuutilersitseqqittussaq. Ilinnulli oqariartuuteqarpugut: Kalaallit Nunaat tuniniagaanngilaq. Oqaatsitit nikanarsaangaarmata oqaasertaleruminaatsippakka. Soorlu kalaallit meeqqatut mamakujunnik akilerlugit pisiarineqarsinnaasutut pineqartut, Sika Kristensen oqarpoq.

Siunnersuut ingattarsertoq kamassutaasoq

Danmarkip ministeriunerata Mette Frederiksenip (S) Donald Trumpip Kalaallit Nunaata pisiarinissaanik 2019-imi siunnersuutaa "ingattajaarnertut" taavaa. Donald Trumpip mette Frederiksen kingorna "nasty"-mik (ajortpq aaqq.) taavaa.

- USA-p Alaskami nunap inoqqaavi naggueqatigiillu inuit qanoq pisimanerai nalunnginnakku: Trump, ajortuuvutit.

- Inuit nunaat naggueqatigiinnut inunnut. Kalaallit Nunaat kalaallinut, Sika Kristensen oqarpoq.

Poul Johansenip ilaquttani, ikinngutini Kalaallit Nunaannilu innuttaasut piffissami matumani tapersersorniarlugit Danmarkimi katersuunnissaq pingaartippaa.

- Nunarput ilaquttavullu ungasissumiittut tapersersorniarlugit katersuuppugut. Donald Trumpip oqaasii Kalaallit Nunaanni innuttaasunut annilaanganarsimassapput, aamma Amerikamiut nunatsinnik aqutsilerpata nunatta qanoq ingerlalerumaarnera ernumagisimassavaat, oqarpoq.

Kalaallit Nunaat kalaallinit pigineqarpoq

Kalaallit Nunaat nutaanik nunasiaateqarfinngussanngilaq, tamannalu Rådhuspladsimiit Københavnimi Amerikamiut aallartitaqarfiannut ingerlaaqatigiinnermi ersersinneqartoq aaqqissuisoq oqarpoq.

- Kalaallit Nunaat Amerikamit pigineqalerpat Kalaallit Nunaannut pissaaneqalissapput. Taamaattumik pingaaruteqarpoq Kalaallit Nunaata Amerikamit pigineqarnissaanik kissaateqannginnitta ersersinnissaa.

- Trumpip nunap inoqqaavi soqutiginngilai, inuillu pisinnaatitaaffii aamma soqutiginagit. Tamanna præsidentiunerani ersarippoq kisermaassilluni aqutsisuugami. Taamaattumik naammaginninnginnerput takutinniarlugu erfalasorput amussavarput. Ataatsimoorluta Kalaallit Nunaat tuniniagaanngitsoq oqariartuutigissavarput, nunalu pisiarineqarsinnaanngitsoq. Inuit tuniniarneqanngillat, uaguttaaq pisiarineqarsinnaanngilagut, Poul Johansen oqarpoq.

samfund mette frederiksen usa demonstration donald trump grønland inuiaqatigiit

ATORFIIT Se alle jobs

Powered by Labrador CMS