Kommunalbestyrelsimut ilaasortat Nakkutilliisoqarfiup pinngitsuutippai
Missingersuutinut naatsorsuinermullu inatsimmik Kommuneqarfik Sermersuup unioqqutitsisimanera Nakkutilliisoqarfiup assuaraa, kommunilli attartornermut attartortitsinermullu arlalinnik isumaqatigiissusiorsimanera pillugu Kommuneqarfik Sermersuumi kommunalbestyrelsimut ilaasortaq ataaseq arlallilluunniit pisussaaffimminnik sakkortuumik unioqqutitsisutut unnerluussisussaatitaasunut unnerluutigineqarnissaat naammattumik Nakkutilliisoqarfiup tunngavissaqarsorinngilaa.
Kommuneqarfik Sermersooq
Assiliisoq: Leiff Josefsen
Kommuneqarfik Sermersuumi attartornermut attartortitsinermullu arlalinnik isumaqatigiissusiorsimaneq kommunalbestyrelsemi ilaasortanut kinguneqassanngilaq, naak suliami kommuni unioqqutitsisimagaluartoq.
Unioqqutitsilluni isumaqatigiissusiornerit pillugit politikerit ilisimatinneqartarsimannginnamik aniguisinneqarput. Tusagassiuutinut nalunaarummi Nakkutilliisoqarfik tallimanngornermi unnukkut taama nalunaarpoq.
Siunnersuisoqatigiit kommunit nakkutigisussaavaat, aammalu inatsisinik malitassanillu maleruaanersut qulakkiissallugu.
Kommuneqarfik Sermersuup piffissami 2018-2022-mi, Naalakkersuisunit akuersissummik pissarseqqaarnani, tamaattumillu missingersuutinut naatsorsuinermullu inatsimmi malittarisassanut akerliusumik, attartornermut attartortitsinermullu 31-nik isumaqatigiissusiornera pillugu, Nakkutilliisoqarfiup assuaraa.
Pisussaaffitsik politikerit sumiginnarsimanngilaat
Kommunilli nalunaarusiaa naapertorlugu isumaqatigiissutit taakku politikkikkut suliarineqarsimanngimmata, kommunalbestyrelsimut ilaasortat akiligassinneqassanngillat:
- Borgmesteri imaluunniit Aningaasaqarnermut Ataatsimiititaliami ilaasortat allat nakkutilliinissamut pisussaaffimminnik ima unioqqutitsinerat sakkortutigisoq allaat, aqunneqarnermut inatsimmi § 63 malillugu akiliisitsisoqassaneranut isummerfigeqqusaq, tunngavissaqanngitsoq Nakkutilliisoqarfiup naliliiffigaa, tunngavilersuummini Nakkutilliisoqarfik allappoq.
Aningaasaqarnermut Naalakkersuisoqarfiup qinnutiginninnera tunngavigalugu Nakkutilliisoqarfiup suliaq suliarisimavaa.
Ilaatigut inissiaqarfinnik marlunnik, maskiinanik sanaartornermut atortunik qulinik aamma naqitsissutinik arlalinnik, missingersuutinut naatsorsuinermullu inatsit malillugu isumaqatigiissutit Naalakkersuisunit akuersiteqqaarnagit, attartornermut imaluunniit attartortitsinermut Kommuneqarfik Sermersooq isumaqatigiissusiorsimanini peqqutigalugu, Aningaasaqarnermut Naalakkersuisoqarfimmit 2022-p naalernerani sakkortuumik isornartorsiorneqarpoq.
Ullumikkut kommunit assingusunik isumaqatigiissuteqannginnerminni suliassat suliarineqartarnerat pisariaqartoq qulakkeertaraat, Nakkutilliisoqarfiup maluginiarpaa.
