KL

DK

Kommune Kujallermi aningaasanut missingersuutit ilungersunartorsiorfioreersullu akuerineqarput

Kommune Kujallermi politikerit aningaasanik sipaarniuteqartariaqarsimapput kommunimi isumaginninnikkut unammilligassat annertuut pingaarnerutikkumallugit. Borgmesteri arlalinnik innuttaasunik ataatsimiisitsissaaq.

Ukioq manna siusinnerusukkut Stine Egedep kommunimi aningaasaqarnerup aqunneqarnera isornartorsiorneqareersorlu tatiginnikkunnaarnermik taasititsineq anigorpaa. Maanna aamma aappaagumut missingersuutit inissippai.
Morten Okkels Tusagassiortoq
Saqqummersinneqarpoq

Kommune Kujallermi kommunalbestyrelsi 2025-mut missingersuutinik akuersivoq.

- Missingersuusiorneq assorsuaq ilungersunarsimavoq, ileqqaarutissat nassaarinissaat pisariaqarsimalluni kiisalu isumaginninnermut tunngasut ilaanni oqartussaaffik Naalakkersuisunit utaqqisaasumik atorunnaarsinneqarsimalluni, Stine Egede (IA) oqarpoq.

Isumaginninnermut missingersuutissat pissutigalugit Aningaasaqarnermut Inuussutissarsiornermullu Ataatsimiititaliami kiisalu Inerisaanermut Ataatsimiititaliami, atuarfeqarnermut, suliffeqarnermut kulturimullu akisussaaffeqartumi, missingersuutit katillugit 20 millionit koruuninik ileqqaarniarfigisariaqarsimapput.

- Isertitat aningaasartuutillu oqimaaqatigiilersissinnaajumallugit ingerlatsinermut missingersuutini 70 millionit koruuninik ileqqaartoqassasoq kommunalbestyrelsi siusinnerusukkut aalajangerpoq. Akileraartarnermik Aqutsisoqarfimmut kiisalu Namminersorlutik Oqartussanut akiitsut akilerneqartariaqarput, borgmesteri oqarpoq. 

Kommune Kujallermi isumaginninnikkut ajornartorsiutit pissutigalugit meeqqanut inuusuttunullu naalakkersuisoq Aqqaluaq B. Egede (IA) novembarimi aalajangerpoq meeqqanut tunngasut innarluutilinnullu tunngasut naalakkersuisoqarfimmit isumagineqalissasut.

Borgmesteri Kujataani angalaassaaq

Kommune ingerlatsinermut sanaartornermullu 663 millionit koruuninik missingersuusiorpoq, akileraarullu allannguuteqarani 27 %-iuinnassaaq.

- Suleqatigiinnermut pitsaasumut kommunalbestyrelsimut ilaasortaaqatikka qutsavigaakka kiisalu kommunip aningaasaqarnera ilorraap tungaanut aallarteqqinniarlugu aalajangigassat ilungersunartut pingaaruteqartulli ataatsimoorfigisimagatsigit qujanera oqaatigeqqikkusuppara, taanna oqarpoq.

Stine Egedep decembarip qulingiluaanit aqqaneq-aappaanut Nanortalimmi, Qaqortumi Narsamilu innuttaasunik ataatsimiisitsinermini kommunimi unammilligassat oqaloqatigiissutigissavai.

samfund inuiaqatigiit

ATORFIIT Se alle jobs

Powered by Labrador CMS