KOMMUNE KUJALLEQ
Borgmesteri Stine Egede: Demokraatit nuannaarput qujallutillu ikiortissarsiornitsinnut
Borgmester Stine Egede (IA) pisuutinneqarpoq kommunalbestyrelse arajutsisillugu meeqqanut inuusuttunullu aammalu innarluutilinnut sullissinermi kommuni ikiortissarsiorsimammat. Kisianni pisuutitsissut tamanna pisuutitsisunut utertippaa: - Soorunami kommunalbestyrelse ilisimatinneqarnikuuvoq, borgmesteri Sermitsiamut oqarpoq.
Borgmester Stine Egede (IA) naqissusiivoq arlaleriarluni kommunalbestyrelsimut politikkikkullu ataqatigiissaarisartunut nalunaaruteqartarsimalluni Kommune Kujalleq isumaginninnermut suliassat pillugit immikkut ikiortariaqartoq.
Assiliisoq (toqqorsivimmit): Leiff Josefsen
Demokraatit Kommune Kujallermi sallaatsumik oqaatigissagaanni annertuumik Inuit Ataqatigiinnut aammalu pingaartumik borgmester Stine Egede (IA)-mut saassussipput. Tamanna takuneqarsinnaavoq tusagassiuutitigut nalunaarummi partiip nassiussaani, IA-mut borgmesterimullu saassussineranni:
- Demokraatini pisut quarsaarutigaagut issanngugalugillu.
Quarsaarutigaarput Inuit Ataqatigiit nunatta kujataa kivisilermassuk.
Akisussaaffimmik nakkutilliisoqarsimanngilaq. Akileraarutit akilernissaat
puijorneqarsimavoq. Inunnik isumaginnittoqarfik nakkutigineqarsimanngilaq.
- Nakkutigineqarnera naammanngimmat maanna Naalakkersuisut inunnit
isumaginnittoqarfik Kommune Kujallermit akisussaaffimmit arsaarinnippoq, kommunalbestyrelsemi ilaasortaalluni
issanngunartorujussuuvoq susoqarpiarneranik ilisimasaqarani
ilisimatinneqaranilu ersarissumit Kommune Kujallermi borgmesteritsinnit.
Qinikkatut inissisimalluni pisoq assut isumakulunnarpoq.
Kommune Kujallermi
ingerlatsinermi tamat oqartussaaqataanerat atuutsinneqanngitsoq Demokraatinit
misigaarput. Maanna sivitsortumi malugaarput takuarpullu IA borgmesterilu
aqutsinerliornerujussuat, allaat akisussaaffimmik Naalakkersuisunit Kommune
Kujallermut arsaarinnittoqarluni, tassa inunnik isumaginnittoqarfik.
Stine Egede kommunalbestyrelsip tunulliunneragaaneranut ilumuunnginneraavoq
Borgmesteri Stine Egede (IA) isornartorsiuinermut akissuteqarpoq. Taanna naqissusiivoq kommunalbestyrelsi avaqqutiinnarlugu iliuuseqanngisaannarsimalluni, aammalu kikkut tamarmik ilisimatinneqartariaqartut ilisimatinneqarsimasut kommunip namminersorlutik oqartussanut ikiorneqarnissamik qinnuteqarsimaneranut tunngatillugu:
- Naluara suna siunertarisimaneraat (Demokraatit, aaqq.) tassami kommunalbestyrelsemik sumiginnaasimaneraallutik uannut aammalu partiinnut pisuutitsissutit pasinarsaarinerillu ataasialinngillat.
Septembarip 25-ani borgmester Stine Egede kommunalbestyrelsimut nalunaarpoq kommuni namminersorlutik oqartussanut isumaginninnermut suliassanut ikiorneqarnissamik qinnuteqarsimasoq. Borgmesterip oqarnera naapertorlugu Demokraatit Siumullu iliuuseq nuannaarutigaat qujallutillu.
Takussutissiaq: Kommune Kujallermi kommunalbestyrelsip ataatsimiinnerani imaqarniliaq.
Suliami tassanerpiaq kommunalbestyrelsi septemberimi ilisimatippara, namminersorlutik oqartussanut ikiorneqarnissamik qinnuteqarsimasugut, taamanikkut Demokraatit nuannaartorujussuupput. Taamaattumik paasisinnaanngilara sooq siullermik ikiorneqarnissamik qinnuteqarsimanerput naammagisimaarnerariarlugu kingornalu taannarpiaq pillugu isornartorsiulernersut, Stine Egede oqarpoq nangillunilu:
- Kommunalbestyrelsip ilisimatinnerata saniatigut, aamma isumaginninnermut ataatsimiititaliaq ilisimatipparput, isumaginninnermut tunngasut immikkut ittut pillugit ikiorneqarnissamik qinnuteqarsimasugut, tassa meeqqat inuusuttullu pillugit kiisalu innarluutilinnut tunngasut. Tamatuma saniatigut siusinnerusukkut ataatsimiinnermi politikkikkut ataqatigiissaarisoqatigiinnut isumaginninnermut tunngasutigut unammilligassavut ataasiarnanga saqqummiuttarpakka, taamaattumik ikiorneqarnissarput maanna pisussanngormat nalaatsornerinnaanngilaq. Ikiorneqalernerpullu nuannaarutigaara qularinnginnakku ikiortariaqartunut iluaqutaassasoq, borgmesteri naqissusiivoq.
Iluarsaassineq annertooq
Borgmesterip aamma innersuussutigaa, piffissaq qinersiviusoq manna, maannalu naajartulersoq, aallartinneqarmalli isumaginninnikkut ajornartorsiutinik aaqqiissutissanik attanneqarsinnaasunik sulissutiginnilluni iluarsaatassat iluarsaanneqarnerannut piffissarujussuaq atorneqarsimasoq, tassanilu aamma avataaneersunik isumaginninnermi siunnersortinik ikiorteqartoqartarsimasoq. Kisianni suliassat suliarineqarnissaannut iluaqutaagaluartoq, tamanna naammassimanngitsoq, suliassammi sukkasuumik amerliartoqqipallattarmata, aammalu kommunip avataaneersunik siunnersortinik atuisarnera killissaqarluni qanoq annertutigisumik aningaasartuuteqartarneq apeqqutaalluni.
- Manna tikillugu qinigaaffik tamaat, maannalu naajartortoq torersaanermut atortariaqarsimavarput. Aammalu annilaanngatigaara tulliani qinersisoqareerpat torersaanissamut suli pisariaqartitsisoqarumaartoq, kisianni qularutigineqassanngilaq ajornartorsiutit aaqqiiffiginiarlugit sulissutigigipput. Akisussaasutut borgmesteritullu inatsisitigut pisussaaffinnik sumilluunniit tunulliussinavianngilanga, aammalu uannut pingaaruteqarpoq qaqugukkulluunniit ammasumik ersarissumillu aqutsinermik ingerlatsinerput kommunalbestyrelsip ilisimassagaa, borgmesteri Stine Egede (IA) naggasiivoq.
