Kommunefogedit sulinerat agguaqatigiissillugu qaammammut nalunaaquttap akunnera ataaseq sivisussuseqarpoq
Ukiup ingerlanerani nunatsinni kommunefogedit agguaqatigiissillugu qaammammut nalunaaquttap akunnera 1,06-t politiinut sulisimapput, Naalagaaffiup politiivi Siumumit folketingimi ilaasortamut Aki-Matilda Høegh-Damimut akissuteqarlutik ilisimatitsipput.
Merete Lindstrøm / Sermitsiaq.AG
Aki-Matilda Høegh-Damip kommunefogedit akissarsiaat sulinerminnilu atugaat inatsisinik atortitsinermut ministerimut Peter Hummelgaardimut apeqqutigalugit sulisut atugaat ukkatarai.
Ministeri akissummini ilisimatitsivoq kommunefogedit qaammammut 6.718,69 koruuninik akissarsiaqartartut suliassanut pisarialinnut piareersimajuarsinnaaniassagamik. Suliffik saniatigooralugu suliffiuvoq, suliffiup saniatigut sillimasutut atorfiusinnaalluni.
Taamatut pisussaaffeqarneq kommunefogedip sulinngiffeqarnissaanut, piniariarnissaminut, aalisariarnissaminut il.il. akornutaanngilaq, Naalagaaffiup politiivi ilisimatitsipput, ilisimatitsissutigalugulu akissarsiaq Kalaallit Nunaanni ajoqit (ajoqersuisoq/palasi) ilinniarsimanngitsutut akissarsiaannut assingusoq.
Akunnermut akissarsiaq
Kommunefogedit qaammammut akissarsiaasa saniatigut nalunaaquttap-akunneranut 97,28 koruuninik sulinerminni akissarsisinneqartarput. Akunnermut akissarsiaritinneqartoq Kalaallit Nunaanni naalagaaffiup ataani ilinniarsimanngitsutut atorfeqartinneqartunut, soorlu reservebetjentinut, allaffimmi ikiortinut sulisunullu allanut akissarsiaqartitsinertut annertussusilerneqarsimavoq.
- Ukiumi kingullermi (1. maj 2023 – 30. april 2024) Kalaallit Nunaanni kommunefogedit tamarmik qaammammut agguaqatigiissillugu nalunaaquttap-akunneri 1,06-it politiinut sulisimapput. Piffissami tassani kommunefogedit katillugit 82-it atorfeqarsimapput (kisitsisitigut taakkunani piffissami tassani atorfinitsitaasut atorfimminillu soraartut ilanngunneqarsimapput). Taakkunannga kommunefogedit 32-it kisimik politiini sulisimapput. Kommunefogedit 32-iusut ukiup ataatsip kingulliup ingerlanerani sulisimasut agguaqatigiissillugu akunnerit 2,71-it politiinut sullissillutik sulisimapput, akissummi ilisimatitsissutigineqarpoq.
