Kommuneqarfik Sermersooq nutaamik upalungaarsimanermut pisortartaartoq
Kalaallit Nunaanni upalungaarsimasut ataasinngornermi saqqummiussipput, upalungaarsimanermut pisortatut tunuartoq pisortanngortussarlu tassani peqataapput.
Jens Mikkelsenip Kommuneqarfik Sermersuumi upalungaarsimanermut akisussaaffimmik tamakkiisumik akisussaaffigilernissaata tungaanut, Jens Mikkelsen Jes Damgaard Andersenilu maanna ikaarsaariarnermiipput.
Assi: Leiff Josefsen
Jens Niels Mikkelsen septembarip aallaqqaataaniit Jes Damgaard Andersen taarserlugu upalungaarsimanermut pisortanngussaaq..
- Sermersuumi upalungaarsimanerup ineriartortinneqarnissaanut peqataanissannut qilanaarpunga, taamatuttaarlu illoqarfitsinni nunaqarfitsinnilu qatserisartut piginnaanerisa atortullu aserfallatsaaliornissaasa ukkatarinissaat qilanaaraara. Suliassaqarfiit, oqartussat politikerillu allat kiisalu Kalaallit Nunaanni upalungaarsimasut allat assigiinngitsunik suliaqartut suleqatiginissaannut qilanaarpunga, Jens Mikkelsen AG-mut oqarpoq.
Jens Mikkelsen 45-nik ukiulik ukiuni 23-ni upalungaarsimasunut ilaavoq, taamaammallu qatserisartut immikkut ittumik uummateqarfigai. Air Greenlandimi qaammatini sisamani misiliilaarnermigut upalungaarsimasut inuunermini suliffigissallugit paasivaa.
- Aaqqissuussinerup inissinnissaa suliassanni siullersaavoq, tamatumalu kingorna kommunimi qatserisartut naapissavakka, tassani angalallunga ilassiartortassavakka, aammali upalungaarsimanitsinni sunik ukkataqarnissarput pillugu pilersaaruteqassaanga, atortui, sungiusartarneri, ilinniartitaanerat il.il. misissussallugit. Tamatuma saniatigut suut tamarmik ingerlaannassapput, taamaammat ulapinnissara qularnanngilaq, qilanaarpungali, Kommuneqarfik Sermersuumi qatserisartut pisortartaavat oqarpoq.
Ministeri naalakkersuisorlu pulaartut
Upalungaarsimasut Nuummi Qatserisartoqarfimmi ataasinngormat saqqummiunneqarput.
Isumaginninnermut, suliffeqarnermut, nunamut namminermut avatangiisinullu naalakkersuisoq Bentiaraq Ottosen (A), Danmarkimi inuiaqatigiit isumannaatsuunissaannut aamma upalungaarsimanermut ministeri Torsten Schack Pedersen (V) Kommuneqarfik Sermersuumilu pisortaq Ole Jakobsen pulaartut ilagaat.
Upalungaarsimanermut pisortajunnaartussap Jes Damgaard Andersenip Kalaallit Nunaanni aamma kommunimi upalungaarsimanerup aaqqissuussaanerapillugu saqqummiivoq.
Kommuneqarfik Sermersooq nittartakkamini allappoq.
Torsten Schack Pedersenip Bentiaraq Ottosenillu Kommuneqarfik Sermersuumi upalungaarsimanermut atortut nutaat qatserisartullu atisaat misiliippaat.
Assi: Kommuneqarfik Sermersooq
Jes Damgaard Andersenip saqqummiussinermini Kalaallit Nunaanni qatserisartut ilinniartinneqarneranni tapersersuinerup pingaaruteqassusaa immikkut eqqartorpai.
- Piffissami matumani ilinniagaqarneq uagutsinnut pingaaruteqarluinnarpoq. Unammilligassanut piareersimasariaqarpugut, Jes Damgaard Andersen oqarpoq.
