KOMMUNINUT QINERSINEQ 2025
Kommuninut qinersinermi partiit avataanni qinigassanngortittutuaq
Qineqqusaartut 300-it parteertik sinnerlugu sassartuupput. Taavalu kisimiilluni qinigassanngortittutuaq tassaavoq John Hansen, taanna Kommuneqarfik Sermersuumi qinigassanngortippoq. KNR-ip aqutaanik qinersisartunik ataatsimiinnerni piffissalerneqarpiarnikuunngilaq, kisianni inuit attaveqaqatigiittarfii aqqutigalugit qineqqusaarutini saqqummiuttaramigit ersialaarluaavippoq.
John Hansenip ersarissumik soqutigisaa tassaavoq nunatsinni illoqarfiit pingaarnersaata Nuup inuuffigiuminarsarneqarnissaa.
Assi: Privat
Piffissaq naajartuaarpoq. Nalunaaqutaq 20:00 qinersiviit matuneqassapput taamaalillunilu kommunimut qinersinermut qinersisartutut peqataaneq periarfissaajunnaassalluni.
Siumut 95-inik qinigassanngortitsivoq. Inuit Ataqatigiit 66-inik qinigassanngortitsipput. Naleraq 59-inik qinigassanngortitsivoq. Demokraatit 40-nik qinigassanngortitsipput. Atassut 26-nik qinigassanngortitsivoq. Qulleq 15-inik qinigassanngortitsivoq.
Taavalu John "Ujuut" Hansen, partiit avataani qinigassanngortittoq. Kommuneqarfik Sermersuumi taanna qinigassanngortippoq.
Taassuma politikkikkut oqariartuutai Sermitsiamit misissorpagut, tassa inuit attaveqaqatigiittarfiisigut qinersisigisinnaasaminut oqariartuutini tamanut takusassiarisimasai.
Illoqarfiit pingaarnersaat sammilluarpaa
Ataatsimut isigalugu, qinigassanngortittup attaviitsup nunatsinni illoqarfiit pingaarnersaanni , Nuummi, pissutsit iluarsiniarnissaat soqutigisupilussuuai.
Nuummi pissutsit iluarsiniarnissaannik sulissutiginninniarnermi saniatigut, John Hansenip ataatsimoorneq annertusarusuppaa, isumaqarluni qanimut ataatsimoorneq annertusarneqassasoq, taassumalu ilutigisaanik "inummut illuatungaaniittumut" nipaatsumik ersarissuliornissaq:
- Kommunalbestyrelsimut isissaguma siunnersuutigissavara qaammatit tamaasa arfininngornerit allortarlugit katersortarfimmi naapittassasugut, 12.30-13.00-imiit 15.00-imut allamik siunertaqanngitsumik ataatsimoornissaq siunertaralugu, kisianni aamma "taanna illuatungaaniittoq" nipaatsumik akerliussutsimik takutitsivigisarlugu.
"Illuliortarnermi iluanaarniapiluit" iliuuseqarfigerusuppai
John Hansenip qineqqusaarnermini anguniarusutaasa annerpaat ilagaat "illuliortarnermi iluanaarniapiluit" iliuuseqarfigineqassasut, paarlattuanillu nalinginnaasumik inissiat amerlanerusut sanaartorneqassasut:
- Illuliortarnermi iluanaarniapiluit ukiuni 20-nik erniaqanngitsumik inuit namminneq pigisassaannik sukkasoorujussuarmik sanaartorput, sanaartornerallu sukkavallaarpoq, illoqarfimmullu kusassaataanngivillutik. Tuniniaanermi nalunaarutigineqartarpoq - "inissianik amigaateqarneq pissutigalugu iluanaarutissarpassuaqartoq".
- Inuit akissallit namminneq illuuteqarnissaminnut/inissiaateqarnissaminnut periarfissaqarpata, taava Sermersooq uagutsinnut ininik luksusinik akissaqanngitsunut, nalinginnaasumik inissianik attartortittakkanik sanaartornerit annertusarneqartariaqarput.
Atuarfik nukittorsarneqartariaqarpoq
John Hansenip atuarfimmi ilinniartitsinermut tunngatillugu sulissutiginiarpaa atuartut peqataatinneqarnerulernissaat, ilinniarnissamut nuannaarnermik aammalu kalaaliuneq pillugu tanngassimaarnerup annertusarneqarnissaa, atuarfik qinngasaaruttarnermik nungusaanermik qitiutitsisoq, qinngasaaruttarnermi atuarfinni siammarsimasorujussuummat, kiisalu sunngiffimmi aaqqissuussinerit pitsaasut kiisalu atuarfik atuartunut, misilitsinnissamut piareersarnerinnaanani, inuunermut piareersarfiusoq.
Sermitsiamit partiit avataatigut kisimiilluni sassartoq attaviginiaraluarparput, iluatsitsinngilarpulli, taamaattumik Facebookimi quppernerani qineqqusaarutaanit matumani issuarparput.
