KL

DK

Kommunip inatsisinik suliaqarnermik isornartorsiuinera naalakkersuisoqarfimmit sumiginnarneqarpoq

Nunap kommunii utoqqarnut tapiissutit pillugit inatsisissamut nutaamut tunngatillugu suliaq isornartorsiorpaat. Tamannali Isumaginninnermut, Suliffeqarnermut Nunamullu namminermut tunngasunut naalakkersuisoqarfimmi pisortap Martha Abelsenip sunnertissutigerpasinngilaa.

Naalakkersuisoqarfimmi pisortaq Martha Abelsen isumaqarpoq utoqqarnut tapiissutit pillugit inatsip nutaap suliarineqarnerani – kommunit assiginagit – pitsaasumik suleqatigiittoqarsimasoq.
Tusagassiortoq
Saqqummersinneqarpoq

Sapaatip-akunnerata siuliani kommunini tallimani pisortat ataatsimut allakkaminni utoqqarnut tapiissutit pillugit inatsip nutaap saqqummiunneqarnera sakkortuumik isornartorsiorpaat.

Inatsisissatut siunnersuutip nassuiaataani inatsisissatut siunnersuutip suliarineqarnerani aningaasaqarnikkut allaffissornikkullu kingunerisinnaasai Naalakkersuisut misissorniarlugit sulissuteqartut allassimammat pisortaqarfiit tupaallaatigaat.

Inatsisip kingunerisinnaasaata "inatsisissatut siunnersuutip suliarineqarnerani pissanngitsoq, inatsisiliornissamulli piareersarnermut atatillugu pissasoq" pisortat tikkuarpaat.

Suleriuseq nutaaq

Sermitsiap isumaginninnermut naalakkersuisoqarfik isornartorsiuineq pillugu oqaaseqaqquaa, tassanilu naalakkersuisoqarfimmi pisortaq Martha Abelsen ilisimatitsivoq “inatsisinik nutaanik inatsisinillu atuuttunit allannguisoqartillugu periuseq nutaaq atulersinneqarsimasoq”.

- Inatsimmik atuutilersitsisussat suliarinninnerup nalaani aalajangiisuusumik oqaaseqarsinnaanissaat uagutsinnut pingaaruteqarpoq. Tamanna pissutigalugu utoqqarnut inatsisip suliarineqarnerani tusarniaanerup saniatigut kommunit ataatsimeeqatigineqarlutillu, oqaaseqaataat allanneqarlutillu malitseqartitsisoqartartoq. Tamatumunnga atatillugu kommunit erseqqissaasunik apeqquteqarfigisarpavut. Suliarinninneq tamanna suli ingerlavoq siunissamilu taamatut suleriuseqarneq aalajngersimasumik ingerlanneqartassaaq. Kommunit Naalakkersuisullu suleqatigiilluarnerisigut aatsaat tamatta nunami maani innuttaasut inuunerat atugarissaarnerallu pitsaanerulersissinnaavavut, Martha Abelsen allappoq.

Anihngaasatigut kingunerit

Aningaasatigut allaffissornikkullu kingunerisinnaasat pillugit misissuisoqannginneranik isornartorsiuineq kommunit pisortaasa akissutissarsissutiginavianngilaat, Martha Abelsenimi ima oqarpoq:

- Utoqqaat pillugit inatsisip pisortanut aningaasatigut kingunerinut tunngatillugu innersuussutigissavara inatsisissatut siunnersuutip suliarineqarnerani allassimasut. Aningaasatigut allaffissornikkullu pisortanut qanoq kinguneqassanersoq nassuiaatip immikkoortuani naleqquttumik allaatigineqarpoq.

Siullermeerneqarpat aappassaaneerneqarpalluunniit allannguutit qanoq ittuussanersut apeqqutaalluni “nutaanik naatsorsuisoqartariaqarsinnaasoq” Martha Abelsenip erseqqissarpaa.

Kommunit tallimat ernumassuteqarnerminnik allagaqartut tassaapput pisortat Ejner Grønvold, Kommuneqarfik Sermersooq, Nivi Strunz, Kommune Qeqertalik, Aviâja Madsen, Avannaata Kommunia, Paneeraq Olsen, Qeqqata Kommunia, aamma Nielsine Petersen, Kommune Kujalleq.

samfund kommuner inuiaqatigiit lovforslag naalakkersuisut ældre personer martha abelsen

ATORFIIT Se alle jobs

Powered by Labrador CMS