Kommunit: Inatsisissatut siunnersuut paatsoornarlunilu tuaviuussaavoq

Nunami kommunini tallimani pisortat utoqqarnut tapersersuinissaq pillugu inatsisissap saqqummiunneqarnissaata tungaanut suliap ingerlanera ataatsimut allakkaminni sakkortuumik isornartorsiorpaat.

Inatsisissatut siunnersuutip nassuiaataani inatsisissatut siunnersuutip suliarineqarnerani aningaasaqarnikkut allaffissornikkullu kingunerisinnaasai Naalakkersuisut misissorniarlugit sulissuteqartut allassimammat pisortaqarfiit tupaallaatigaat.

Inatsisip kingunerisissaasaata "inatsisissatut siunnersuutip suliarineqarnerani pissanngitsoq, inatsisiliornissamulli piareersarnermut atatillugu pissasoq“ pisortat tikkuarpaat.

- Suliarineqarnerata nalaani paasiniaaneq inatsisissatut siunnersuutip Inatsisartuni suliarineqarnissaanik amerlisitsissasoq kingunerissavaa, Kommuneqarfik Sermersuumi pisortaq Ejner Grønvold, Kommune Qeqertalimmi pisortaq Nivi Strunz, Avannaata Kommuniani pisortaq Aviâja Madsen, Qeqqata Kommuniani pisortaq Paneeraq Olsen aamma Kommune Kujallermi ingerlatsinermut pisortaq Nielsine Petersen allapput.

Suleqatigiinneq ilisimanngikkat

- Kingunerisinnaasaanik paasiniaanermi kommunit suleqatigineqartut oqaatigineqarpoq, tamannali suleqatigiinneq kommunit peqataaffiginerattut taaneqarsinnaanngitsoq, ernumassuteqarluni allakkami allassimavoq.

Kommunit "periaaseq tamanna tunngavissaqanngitsumik aalajangiinermik kinguneqarsinnaasoq, tamannalu kommunit missingersuutaannut inatsisillu atuutilersinneqarnissaanut kingunerlutsitsingaarsinnaavoq“ naqissuserpaat.

Kommunit naalakkersuisoqarfik inatsisissamik nutaamik suliaqartoq oqaloqatigisimagaluarlugu isornartorsiuinertik naalakkersuisoqarfimmit pimoorunneqarneq ajortut misigaat.

- Tusarniaanermi allakkiat immikkoortunik nassuiaatitaqarput, kommunillu isummernerat arlalitsigut tunngavilersuuteqaratik itigartinneqartarput. Inatsisartut tusarniaanermi akissutinik tamarmiusunik pissarsisinnaanngitsut kommunit paasissutissiipput, tamannalu inatsisissatut siunnersuutip kingunerisassaanik unammilligassanik piviusunik Inatsisartut iluamik paasinnissinnaanerannik annikinnerulersitsinermik kinguneqarsinnaavoq, kommunit pisortaat allakkaminni nassuiaapput.

Naalakkersuisut Inatsisartullu ernumassutit pimoorullugit inatsisissatut siunnersuutip suliarineqarnerata peqqissaarunneqarnissaa qulakkiissagaat kommunit neriuutigaat.

Piareersarluarneqarnissaa kissaatigineqartoq

- Inatsisit nutaat pillugit aalajangiinerit piareersarluakkamik tunngavissaqarluarnissaat, ammasumik suliarineqartarnissaat kommuninillu, Inatsisartunik innuttaasunillu ataqqinninnissaat pingaaruteqarpoq.

Inatsisissatut siunnersuut ullumi siullermeerneqassaaq, ukiakkullu ataatsimiinnerup immikkoortuata aappaani, tassa ukiumi nutaami, aappassaaneerneqarluni pingajussaaneerneqassaaq.