Kristian Qeqertalimmi borgmesterinngorusuppoq

Kristian Jeremiassen 2001-mili qinikkatut innuttaasunik sullissilernikuuvoq. 

Qasigiannguit kommuniugallarmat, kingornalu Qaasuitsup kommuniugallarmat kiisalu kommunip avinneqarnerata kingorna Kommune Qeqertalimmi taanna atasungaannartumik kommunalbestyrelsemi ilaasortaajuarpoq, tamatumalu saniatigut aamma Inatsisartuni qinikkatut qinigaaffiit arlallit sulisimalluni.

Maanna Jeremiassen erseqqissuliorpoq, qinersisartunit taaguunneqarluassaguni aammalu partiini siuttuuginnassappat, taava nammineq piareersimalluni borgmesterinngorsinnaanissaminut:

- Tamanna eqqarsaatigereerlugulu sillimaffigivara. Qinersisartut borgmesterissatut piukkussappannga piareersimavunga, Jeremiassen Sermitsiamut oqarpoq.

Pitsaassuseq anguniarlugu sukannersumik ingerlatserusuppoq

Qinigaaffik maanna qaangiuttoq kingumut qiviarlugu Kristian Jeremiassen naliliivoq kommunalbestyrelsip aalajangeriigaasa allaallumi aningaasaleriigaasa malitseqartinneqartarnerat sukannersumik nakkutigineqassasoq:

- Aaqqiissutissanik innuttaasullu atugarissaarnerulernissaannik siunertaqarluni aalajangersakkat kommunalbestyrelsimi suliarineqareerlutik akuersissutigineqareersut allaallumi amerlasuutigut aningaasartassaanik illuartitsisoqareersoq piviusunngortinniarneqartarnerisa arriippallaarsorinartumik suliarineqartarnerat kommunalbestyrelsimut kommunimilu innuttaasunut assut kipiluttunarsinnaasarpoq, taamaammat malitseqartitsisarnerit sukannersumik nakkutigineqartarnissaat sulissutissama ilagaat, Jeremiassen oqarpoq.

Kristian Jeremiassenip assersuutigaa Qeqertarsuarmi meeqqerivissaq. Taanna pillugu kommunalbestyrelsi aalajangereeraluartoq suli meeqqerivissaq naammassineqanngitsoq, aammalu:

- Sanaartugassanut kommunalbestyrelsimit aningaasaliissutaasut 100 millioner koruunit nalinginut aalajangiisoqarnikuugaluarpoq aningaasalli uninngatiinnarneqarput, sanaartortussaaleqisoqarnera patsisigineqarluni. Taamaattoqarnerata sumiiffinni inoqarfinni kommunitsinniittuni innuttaasut inuussutissarsiuteqartullu utaqqisinneqalertarnerannik isumaqarpoq, qaangerniartariaqalerparpullu.

Jeremiassen aperigatsinni nunatsinni sanaartornerit annertoorsuit sanaartortussaaleqinermik pilersitsisarnerat pissutaanersoq, taanna akivoq tamanna pissutaanngitsoq, kisiannili pilersaarutit piviusorsiortut sulianillu naammassitserluni iperaanaveersaarnerit pisariaqartut.

Borgmesterinngussaguni Aasiannut nuukkusuppoq

Kommune Qeqertalimmi Inuit Ataqatigiit amerlanerpaanit akisussaaffimmik tigumminnittussatut toqqarneqassappata, namminerlu taaguunneqarnerpaassaguni Jeremiassen pilersaarusioreerpoq:

- Maannakkut qitornagut perorput, nuliaralu eqqartortarparput Aasiannut nuussinnaanissarput, maannalu tassa sassarninni matumani qinersisartut piumassappannga taava akisussaaffimmik tigusissaanga aamma Aasiannut nuussaagut, ilimanarporli aasaanerani Qasigiannguaniit sulisassasunga, kiisalu aamma kommunitsinni inoqarfiit tikitsiaannarnagit peqatigisassavakka, Kristian Jeremiassen Sermitsiamut oqarpoq