Kuulti Nunatsinneersoq tuniniarneqartoq – najugalinnut
Nalunami kuultisiorfimmeersumik kuultimik gramimik ataatsimik oqimaassusilimmik tuniniaasoqaleruttorpoq, pisiassallu nunatsinni najugallit kisimik pisiarisinnaavaat. Kuultit minguissusaat, piujuartitsisumik piiaaffimmeersuunerallu uppernarsarneqarsinnaammat SMO-mik nalunaaqutserneqarnikuupput.
Kuulti grammi nunatsinni najugaqartunut maanna tuniniarneqalerpoq.
Assi: Amaroq Minerals
Canadamiut suliffeqarfiutaata Amaroq Mineralsip, Nalunami kuultisiorfimmi piiaanissamut akuersissutaatillip, kuultimik annikitsumik Tuluit Nunaanni aatsitassanik aatsitsivimmut immikkut ittumik suliaqartumut nassiussivoq. Tassani ”Single Mine Origin” (SMO-mik nalunaaqutsiineq) nalunaaqutsiisoqartarpoq.
Kuultip minguissusaa, piujuartitsinermik aallaaveqarluni suliaanera piiaaffimmiillu niuerfimmut qanoq suliarineqarsimaneranik takussutissaqarnera SMO-mit nalunaaqutserneqarnera isumaqarpoq. Kuultilu taanna kalaallinut pinnersaasiortartunut najugaqartunullu taamaallaat tuniniarneqarpoq.
Kuulti grammimik ataatsimik oqimaassusilik QR-kodeqartinneqarpoq, taanna atorlugu Nalunami kuultisiorfimmeersuunera paasineqarsinnaavoq.
Assi: Amaroq Minerals
Kalaallinut kuulti
Kuulti Nalunameersoq Single Mine Origin-imik nalunaaqutserneqarnikoq Kalaallit Nunaanni innuttaasunut neqeroorutigisinnaanera suliffeqarfimmi tulluusimaarutigineqaqisoq, Amaroq Mineralsip Canadamiittup pisortaa Joan Plant tusagassiuutinut nalunaarummi oqarpoq.
"Ammassumik ingerlatserusussuseqarnitsinnut, ileqqorissaartumik piiaaffeqarnermut nunaqavissunillu suleqateqarnitsinnut iliuuserisarput takussutissiivoq. SMO-mik nalunaaqutsiineq aqqutigalugu nunap immikkoortuani piujuartitsinermut suleqatigiinnermullu tunngatillugu nutaamik najoqqutassiorpugut,“ nalunaarummi allassimavoq.
Kuulti uani pisiarineqarsinnaavoq:
https://singlemineorigin.com/products/1g-nalunaq-gold-bar
Kalaallit Nunaanni najugaqanngikkaanni pisineq naammassineqarsinnaanngitsoq, nittartakkami allassimavoq.
