Lars Erik Gabrielsen inoqarfinnut angalasoq
Upernaviup eqqaani aqquserngit, inissaqarneq inuuniarnermilu atukkat pitsaanerusut innuttaasunik ataatsimiititsinerni oqaluuserineqartut ilagaat.
Avannaata Kommuniani borgmesterip Lars Erik Gabrielsenip innuttaasut 220-t missaanniittut septembarip naanerani ataatsimeeqatigai.
Assi: Oscar Scott Carl
Avannaata Kommuniani borgmesteri Lars Erik Gabrielsen (S) Upernaviup eqqaani nunaqarfiit qulingiluat tamaasa septembarip naanerani tikeraarpai.
Avannaata Kommunia nittartakkamini allappoq.
Borgmesterip kommunimi takorluukkat saqqummiummagit innuttaasut 220-nit amerlanerusut peqataapput. Ataatsimiinnermi innuttaasunit apeqquteqarsinnaapput, isumassarsiaminnik isumakuluutiminnillu apuussisinnaallutik.
- Inoqarfinnik mikinerusunik ineriartortitsineq kommunip imminut ataqatigiinneranut qanoq pingaaruteqartigisoq angalaarnerup takutippaa. Isummat nutaat, najukkami piumassuseq ataatsimoorlunilu iliuuseqarsinnaassuseq atorlugit angusaqarluarsinnaavugut. Isumalluartorujussuuvunga, Avannaata Kommuniani borgmesteri Lars Erik Gabrielsen (S) tusagassiuutitigut nalunaarummi oqarpoq.
Borgmesterip innuttaasunik ataatsimiititsinerani attaveqaasersuutit pitsaanerusut eqqartorneqangaatsiarpoq. Aqquserngit, imeq, innaallagiaq angallannerlu pingaartinneqaqisut taassuma erseqqissaatigaa.
Inoqarfinni arlalinni aqquserngit ajorluinnarmata eqqagassanik, nioqqutissanik atortussanillu assartuineq ajornakusoortarpoq. Amerlaqisuni illuni paaqqinnittarfinnilu imeqanngilaq.
- Pitsaasunik aqqusineqarpat, imermik kuuinnartoqarpat, assartuineq umiarsualiviillu pitsaaneruppata, taava ineriartortitsinissamut nukissanik amerlanerusunik peqalissaagut, borgmesteri oqarpoq.
Sumiiffinni arlalinnut betonimik aqquserniornissamut atortussat tikisinneqareersimapput.
Innuttaasut atugaat
Innuttaasut atugarisaat aamma sammineqarluarput. Ilaqutariit nukittuut, taavalu meeqqat inuusuttullu inuunerissaartut imminnut ataqatigiilluinnarnerat borgmesterip erseqqissarpaa.
- Peroriartorfimmik akiuussinnaassuseqalersitsisumik iliuuseqarsinnaalersitsisumillu sinaakkusiisariaqarpugut. Sulisunik ilinniarsimasunik tapersersorneqarnissamik najukkamilu nukissanik suliamut pimoorussisunik peqarnissamik tamanna pisariaqartitsivoq, oqarpoq.
Sumiiffinni mikinerusuni
suliniutit assigiinngitsut sunniuteqarluartut angajoqqaat arlallit oqaatigaat.
Illut pitsaanerusut
Inuunerissaarneq illullu pitsaasut aamma imminnut ataqatigiilluinnarput. Illutaarniarluni aningaasanik attartornissamut periarfissat pillugit illoqarfinni tamani paasisitsiniaalluni ataatsimiisitsisarnerit Avannaata Kommunianit aallartinneqareerput.
Borgmesterillu Namminersorlutik Oqartussat illut nutaat allallu suleqatigiissutigineqarsinnaanerat siunertaralugu naapinnissaat kissaatigalugu aamma oqaatigaa.
Inoqarfinni qulaaluani tamani ilaqutariinnut inuusuttunut inissiat, meeqqanut inuusuttunullu sunngiffimmi neqeroorutit, talittarfiit pitsaanerusut eqqakkanulllu amerliartuinnartunut aaqqiissutit amingaatigineqartut oqaatigineqaqattaarpoq.
Najukkani nunaqarfinni aqutsisunut ilaasortat aamma ataatsimiisitsinerni peqataapput, borgmesterilu inoqarfimmi alakkarterisillugu ingiaqatigisarpaat, siunnersuutit aaqqiissutaasinnaasullu aalajangersimasut itisilertarlugit.
- Nammineerluni iliuuseqarusunneq sakkortoorujussuuvoq tamannalu pingaaruteqarpoq. Aaqqiissutissat najukkani nanineqartariaqarput atorneqarlutillu, pingaaruteqarporlu kikkulluunniit iliuuseqarsinnaanertik suleqataasinnaanertillu takussagaat, Lars Erik Gabrielsen oqarpoq.
Upernavimmi septembarip 19-iani innuttaasunik ataatsimiititsineq aallarniutigalugu angalaarneq 20-25. septembari 2025 ingerlanneqarpoq.
