Lektori: USA-p aallartitatigoortumik tatineqarnera sunniuteqarpoq
Amerikamiut Kalaallit Nunaanni tikeraarnerminni taamaallaat sakkutooqarfilianissaat, aallartitaqarnikkut saqitsaannermi sakkukillisaaneruvoq.
15. marts Nuummi amerikamiut Kalaallit Nunaannik tigusinissamik aqutsinissamillu soqutiginninnerannut akerliussutsimik takutitsisoqarpoq.
Assi: Oscar Scott Carl
Danmarkip Kalaallillu Nunaata aallartitaqarnikkut innuttatigullu tatisinera, USA-p Kalaallit Nunaannut tikeraarnissaata maanna annertuumik allanngortinneqarneranut patsisaaqataavoq.
Taama Marc Jacobsen, nunat tamat akornanni politikimi ph.d. Forsvarsakademimilu Institut for Strategi og Krigsstudierimi lektori oqarpoq.
USA-p vicepræsidentia J. D. Vance, nulialu Usha Vance tallimanngorpat Amerikamiut sakkutooqarfiannut Pituffik Space Basemut tikeraassapput. Amerikamiut aallartitaat amerlasuut Nuummut Sisimiunullu tikeraarnissaat siusinnerusukkut pilersaarutaagaluarpoq.
- Qallunaat kalaallillu aallartitaqarnikkut aammali inuinnaat akornanni USA-p tikeraarnissaanut sakkortuumik itigartitsinermut oqariartuuteqarnerisa kinguneqarsimanerattut tamanna paasivara, Marc Jacobsen Ritzau-imut oqarpoq.
- Amerikamiut assinik kusanartunik inuinnaat qarasaasiakkut naapeqatigiittarfianni Amerikamilu tusagassiorfinnut takutikkusullugit eqqarsaatigisaasa “Yankee, go home”-mik allagartarsuarnik amerlasuunik nittarsaassinikkut killormut sunniussinnaapput, Marc Jacobsen oqarpoq.
Privatfoto
Amerikamiut Kalaallit Nunaannut tikeraarnissaanik nutaarsiassaq Danmarkip ministeriunerata Mette Frederiksenip (S), tikeraarnissaq USA-p Kalaallit Nunaannut Danmarkimullu “akuersaarneqarsinnaanngitsumik tatisineratut” taavaa.
Kalaallit Nunaanni naalakkersuisut siulittaasorigallagaata Múte B. Egedep aamma tikeraarnerup ataqqinninnginnermik ersersitsisuunera oqaatigaa.
- Mette Frederiksenip taamaaliornissap akuersaarneqarsinnaanngitsutut oqaaseqarnera takuarput. Múte B. Egedep, suli naalakkersuisunut siulittaasuugallartup tikeraartoqarnissaanik sakkortuumik itigartitsinera takuarput. Tamanna sunniuteqarsimarpasippoq, Marc Jacobsen oqarpoq.
Sisimiuni tikeraarnissami maanna taamaatiinnarneqartumi akerliussutsimik takutitsisoqarnissaanik ilimasaarisoqarnera, maanna tikeraarnissap taarsiullugu Kalaallit Nunaata Avannaani sakkutooqarfimmi pisussanngorneranut sunniuteqarsinnaasoq, lektori ilanngullugu isumaqarpoq.
- Amerikamiut assinik kusanartunik inuinnaat qarasaasiakkut naapeqatigiittarfianni Amerikamilu tusagassiorfinnut takutikkusullugit eqqarsaatigisaasa “Yankee, go home”-mik allagartarsuarnik amerlasuunik nittarsaassinikkut killormut sunniussinnaapput, Marc Jacobsen oqarpoq.
Marc Jacobsen naapertorlugu USA-p vicepræsidentiata maanna Kalaallit Nunaannut tikeraartussanngornera suli aalassatsitsinnaavoq. Ingammik piffissaq tikeraarfiusoq eqqarsaatigalugu. Kalaallit Nunaat qanittumi qinersinerup kingorna suli naalakkersuisoqalinngilaq.
- Taama oqareerlunga, maanna USA-mi naalakkersuisut sukkulluunniit Kalaallit Nunaata Avannaani Pituffik Space Basemik tikeraarsinnaanerat eqqarsaatigalugu, tamanna pisut sakkukillisarneqarnerattut isigaara, Marc Jacobsen oqarpoq.
