Maligassiuisoq ataqqiniarneqartoq

Inuk Davidsen 68-inik ukioqartoq ukiut qulit missaanni akissarsinissani eqqarsaatiginngikkaluarlugu Aasianni illoqarfimmi najugarfigisami eqqaani eqqagassanik katersisartoq ataqqiniarneqarpoq. Kommune Qeqertalik tusagassiuutinut taama nalunaaruteqarpoq.

Katersuunnermi borgmester Simigaq Heilmann qujaniarnermini ilaatigut ima oqarpoq:

- Kommunerput sinnerlugu qujaffigerusullutit maani katersuuppugut, suliannut allanngueqataaninnullu qujajumalluta, taamalu sulisimanerit pingaaruteqartuusoq ersersikkumallugu. Innuttaasut illoqarfimminni pinngortitamilu saligaatsuutitsinissamik pingaartitsisut akisussaaffimmillu tiguseqataasinnaasut qujassutissaqarfigaavut. Illit aqqutigalutit qujassutiga apuukkusuppara, qujanaq saligaatsuutitsinissaq pinngortitamillu paarsilluarnissaq kommuni utaqqinngikkaluarlugu nammineerlutit akisussaaffimmik tiguseqataasarninnut. Tamatsinnut maligassiuisuuvutit, borgmester Simigaq Heilmann ilaatigut taama oqaaseqarpoq.

Otto Sandgreen, Aasianni Teknikimut avatangiisinullu ingerlatsinermut aqutsisoq oqarpoq, ”Saligaatsoq” kommunimit ukiumoortumik aaqqissuunneqartartoq, taamalu eqqakkanik katersineq ukiumut ulloq ataaseq ingerlanneqartarluni. Aammali maluginiarlugu Inuk Davidsenip piumassutsini atorlugu saliisalerneratigut inuit arlallit aamma sunnerneqarsimasut.

Kommuni ilanngullugu allappoq, erseqqissumik allanngortoqarsimanera Inuk Davidsenip nammineq aamma maluginiarsimagaa:

- Aallarteqqaarmat eqqagassat takussaanerujussuusimagaluarput, soorlu iliveqarfiup eqqaani. Massakkut eqqakkat malunnartumik ikileriarujussuarsimapput.