Meeqqap meeqqerivimmi kimmarneqarnerata kingorna Kommuneqarfik Sermersooq qisuariarpoq: Isumannaatsuuneq atugarissaarnerlu pingaarnerpaatinneqarput
Kommuneqarfik Sermersuup uppernarsarpaa meeqqap angajoqqaavaniit attavigineqarsimallutik. Aammattaaq kommunip uppernarsarpaa, paaqqinnittarfiup pisortai qanimut suleqatigalugit, maanna siunissamilu akisussaassuseqarluni naleqquttumillu iliuuseqartoqarnissaa qulakkeerniarlugu pisariaqartunik iliuuseqarsimallutik.
Kommuneqarfik Sermersooq
Foto: Leiff Josefsen
Meeraq ataatsimik affarmillu ukiulik sapaatip akunnerata siuliani sisamanngornermi meeqqaniinnermini meeqqamit allamit kimarneqarpoq. Meeqqamut anaanaasup oqaluttuai naapertorlugit meeqqerivimmi sulisussaaleqineq peqqutaalluni kimmaaneq pivoq.
Kommuneqarfik Sermersuup uppernarsarpaa meeqqap angajoqqaavaniit attavigineqarsimallutik, pisimasorlu pillugu oqaloqatigiissimanertik naleqartilluinnarnerarlugu.
- Angajoqqaajusup ernumassutini uagutsinnut anngummagu qujamasuutigaarput. Meeqqap ilaqutaasalu inuunerat ataqqiniarlugu inuit ataasiakkaat pillugit oqaaseqassanngilagut, kisianni uppernarsarsinnaavarput meeqqeriviup aqutsisui qanimut suleqatigalugit taamatut pisoqaqqinnginnissaa pillugu akisussaassusilimmik naleqquttumillu iliuuseqarpugut, Lone Nukaaraq Møller, Meeqqat Atuarfiillu pillugit immikkoortortaqarfimmi pisortaaneq oqarpoq.
Meeqqat isumannaatsumiinnissaat pingaartinneqarpoq
Kommunip erseqqissarpaa meeqqat isumannaatsumiinnissaat atugarissaarnissaallu annerpaamik pingaartinneqartoq. Taamaattumillu iliuusissat maanna atuuttut pillugit misissorneqarput, meeqqerivinni sakkussat atorluarneqarnersut qulakkeerniarlugu, siunissamilu taama pisoqaqqinnginnissaa anguniarlugu.
- Meeqqat meeqqerivitsinni toqqissisimanissaat isumannaatsuunissaallu pingaarnerpaatipparput, meeqqanullu tamanut toqqissisimanartunik avatangiiseqartitsinissaq sulissutigiuarparput.
- Kommunip periaasii misissorneqarput, taamaalillutalu qulakkeerniarlugu, periarfissat pitsaanerpaamik atorneqarnissaat, taamaalilluta assingusumik pisoqaqqinnginnissaa qulakkeerniarlugu, Lone Nukaaraq Møller naggasiivoq.
