Mette F.-ip naalagaaffeqatigiit isumannaallisaanikkut ilungersunartumiinnera oqaatigaa
Naalagaaffeqatigiit navianartorsiorfiusumiipput, sakkulersuineq sakkussanillu annertusaaneq pisariaqarluinnarput, ministeriuneq naalagaaffeqatigiit ataatsimeereersullu tusagassiortunik katersortitsinermi oqarpoq. Taassuma aamma naqissuserpaa Danmark Kalaallit Nunaanni annertunerusumik aningaasaliinissamut piareersimasoq.
Assi: Ida Marie Odgaard/Ritzau Scanpix
Kalaallit Nunaat, Savalimmiut Danmarkillu naalagaaffeqatigiinneranni ataatsimiinnerat Savalimmiuni naammassillugu tusagassiortunik katersortitsinermik naggasiisoqarpoq.
Ministeriunerup Mette Frederiksenip tassani arlaleriarluni erseqqissarpaa Kunngeqarfiup sillimaniarnermut politikkianut tunngatillugu pissutsit ilungersunartorujussuusut, tamannalu ilaatigut erserpoq illersornissamut pisortap naalagaaffeqatigiit ataatsimiinneranni peqataanerani, naak peqataasareersimanngikkaluartoq.
- Ataatsimiinneq piffissami ilungersunartumi pisoq eqqaamaneqarumaarpoq. Illersornissaqarfiup pisortaa ataatsimiinnermut peqataavoq, tamannalu pissutsinut maanna atuuttunut ersiutaavoq, tassami pissutsit ilungersunarnerulersimapput.
- Danmarkimi Østersømi kangianilu tamanna misigaarput, aammali avannarpasinnerusumi issittumilu soorunami malugaarput. Tamatta tamanna maanngaanniit pissarsiaraarput, Mette Frederiksen tusagassiortunik katersortitsinermi oqarpoq, tassanilu Amerikamiut Kalaallit Nunaannut tatisinerat arlaleriarluni eqqaavaa, tamannalu "naleqqutinngitsutut" taallugu.
Kalaallit Nunaat aningaasaqarnikkut periarfissaqarnerulersinniarlugu piareersimavugut
Statsministerip pingaaruteqarnerarpaa naalagaaffeqatigiit pingasuusut pissutsini maanna atuuttuni ataatsimoornissaat:
- Sorsunnermi sakkutuussutillu saniatigut ataasiinnaq upperaara, tassa ataatsimoornissaq.
- Naalagaaffeqatigiinnermut aamma tamanna atuuppoq. Navianartorsiorfiusumiippugut. Pissutsit ilungersunarluinnarput. Taamaammat suleqatigiinnissaq iligiinnerlu upperilluinnarpaat, Mette Frederiksen oqarpoq.
Erseqqissarpaa tamanna naalagaaffeqatigiinni nutarterinissamik kissaateqartunut allanut akerliusariaqanngitsoq, uteqqiillunilu oqarpoq Danmark ilaatigut piareersimasoq Kalaallit Nunaata namminersorneq pillugu inatsimmik allannguinikkut aningaasaqarnikkut periarfissarsiornissaanut:
- Kalaallit Nunaata Namminersorlutik Oqartussanut inatsit allanngortikkusummagu tapersiivugut, ilaatigut aatsitassarsiornermut atatillugu Kalaallit Nunaata aningaasaqarnikkut pitsaanerusumik atugaqarnissaa qulakkeerniarlugu. Tamassuma angunissaanut Danmarkip tungaannit isumaqatigiissusiornissamut piareersimavugut, Mette Frederiksen oqarpoq.
Aamma eqqaavaa Danmark Kalaallit Nunaanni aningaasaliinissamut allatut piareersimasoq:
- Kalaallit inuiaqatigiinnut toqqaannartumik oqarusuppunga Kalaallit Nunaanni inuiaqatigiinnut aningaasaliissuteqarnerunissamut piumassuseqartugut. Attaveqaqatigiinnermut pingaarutilimmut, inuussutissarsiornermik ineriartortitsinermut, umiarsualivinnut allanullu tunngatillugu, ministeriuneq oqarpoq.
