Mette F.: Israelikkut iliuusii inuiannik toqoraanertut taanissaat uagut suliassarinngilarput
Israeli inuiannik nungusaasutut nalilerneqassanersoq eqqartuussisut aalajangigassarigaat, Mette Frederiksen isumaqarpoq. Parteeqatai isumaqataanngillat.
Ministeriunerup Mette Frederiksenip (S) Israelip Palæstinamiunut iliusai qatsuppai. Israelip akerleriinnermi iliuuserisimasai ingasappallaartut isumaqarpoq.
Assi: Ida Marie Odgaard/Ritzau Scanpix
Israelimit Palæstinamiunik nungusaasoqarnersoq politikkerit naliligassarinngilaat.
Ministeriuneq Mette Frederiksen (S) Aarhusimi tusagassiortunik marlunngornermi katersortitsinermi oqarpoq. Partii ukiumoortumik aasaanerani naapeqatigiittarneranni katersuuppoq.
- Inuiaqatigiinni ajunaarnersuaq pivoq, Israelilu eqqunngitsuliorpoq. Inatsisitigut eqqartuussineq nalinginnaasumik ingalassimasarparput. Nunani tamalaani aalajangiisarfinnik peqarpugut, inuiannillu nungusaasoqarneranik naliliisoqassappat malitassaqarluta.
- Naliliinissaq politikikkut suliassaanngilaq. Eqqartuussivinni nalilerneqassaaq, taakkualu maannakkut Gazami pisut misissorpaat, Mette Frederiksen oqarpoq.
Parteeqataat isumaqataanngitsut
Taamaasilluni ministeriuneq parteeqatiminit arlalinnit isumaqatigineqanngilaq.
Israelip iliuusia pillugu Odensip borgmesteria Peter Rahbæk Juel (S) Facebookimi sapaatip-akunnerani kingullermi ima allappoq:
- Ullormut qaammatillu tamaasa tamanna takusarpara - inuiannik toqoraanersuaq!
Socialdemokratit siulittaasorisimasaata nunanullu allanut ministeriusimasup Mogens Lykketoftip Mette Frederiksenip iliuusii sivitsortumik isornartorsiortarpai. Nammineq isumani malillugu pisut inuiannik nungusaanertut isigalugit Jyllands-Postenimi marlunngornermi saqqummertumi oqaatigaa.
Israelip Palæstinamiullu akornanni akerleriinneq oktobarimi 2023-mi sakkortusivoq. Palæstinamiunit peqatigiiffimmit sakkutooqatigiinnit Hamasimit Israelimut saassussisoqarmat inuit 1200-t missaat toqutaallutik.
Israeli tapersersoqqaaraluaraa
Israelip ministeriunera Benjamin Netanjahu sakkortuumik akissuteqarpoq.
Mette Frederiksen aallaqqaammut Israelimut tapersersuilluinnaraluarpoq.
Israelili peqqarniinneruleriartortillugu isummani allanngortippaa.
- Israelip nunanit tamalaanit mianersoqqussutinik tusaanngitsuusaarnera paasiuminaallunilu mamiatsaataavoq, tamannalu pissutigalugu Israelimik tatisineq suli annertunerusariaqarpoq, ministeriuneq oqarpoq.
Mette Frederiksenip akerleriinnerup aallartinnerani illuatungeriit isiginnittaasaanniit isiginiarnerusimasinnaagaluarnersoq aperineqarami toqqaannaq akinngilaq. Aamma Israelip sakkutooqarnikkut qanoq periuseqartarnikuunera eqqarsaatigalugu.
