KL

DK

Mette F: Taamaammat Kalaallit Nunaat Trumpimik oqaloqateqarnermut peqataanngilaq

Oqaluuserineqartussat ilaatigut amerlammata USA-mi præsidentinngortussaq oqaloqatigineqarmat Kalaallit Nunaat peqataanngilaq.

Ritzaus Bureau
Saqqummersinneqarpoq

Kalaallit Nunaat nunarsuaq tamakkerlugu maluginiarneqarpoq, ministeriunerulli Mette Frederiksenip (S) USA-milu præsidentinngortussap Donald Trumpip pingasunngornermi oqaloqatigiinneranni, piginnittuunermik eqqartuiffiusumi, peqataanngilaq.

Folketingimi nunanut allanut tunngasunut ataatsimiititaliami sisamanngornermi ataatsimiinnerup kingorna taama oqarpoq, tassanilu Kalaallit Nunaat eqqartukkanut ilaasoq Folketingimi partiit oqaloqatigiinnissaq pillugu ilisitimatinneqarsimapput.

- Assigiinngitsunik eqqartuisoqarpoq, maannakkulli qanoq inissisimanersugut erseqqissaatigissavara. Naalakkersuisut siulittaasuat oqaloqatigiittoqarnissaanik ilisimatippara, oqaloqatigeereernermilu saaffigisara siulleq tassaavoq Mute B. Egede, Mette Frederiksen oqarpoq.

Trumpip Kalaallit Nunaannut soqutiginninnera pissutigalugu piffissami kingullermi politikkikkut eqqissiviilliortoqareersorlu tamanna pivoq, taamaammallu Amerikamiut Kalaallit Nunaannik piginnittuunissaannik sooq kissaateqarnersoq itisiliiffiginiarlugu Danmark saaffiginnippoq.

- Kalaallit Nunaat kisimi pineqanngitsoq

Trumpip oqaloqatiginerani Kalaallit Nunaata “ingerlallualeqqinnissaa” eqqaaneqarpoq - USA-p “ingerlalluaqqilernissaanik” oqariartuutaanut assingusoq.

nunarsuarmi qeqertat annersaata siunissaa kalaallit namminneq aalajangissagaat Mette Frederiksenip arlaleriarluni oqaatigisarpaa, tamannalu oqaloqatigiinnermi uteqqippaa.

Kalaallit Nunaat pillugu Danmarkip oqaloqateqarneranut peqataanissaq kalaallit soqutigisarilluarpaat.

Nunali oqaloqatigiinnermi peqataanngilaq, ministeriunerlu naapertorlugu tamanna pissusissamisoorpoq.

Siullertut USA-mi præsidentinngortussaq oqaluussinnaasariaqarpara, soorlu nunani tamalaani suleqativut assigiinngitsutigut oqaloqatigisarigut.

- Kalaallit Nunaat kisimi eqqartorneqanngilaq. Niuernerup aningaasaqarnerullu aamma eqqartornissaannut periarfissaqarpugut, Mette Frederiksen oqarpoq.

Isumannaallisaanermut isumaqatigiissut nutaaq isumaqatiginninniutigineqarpoq

Pingasunngornermi oqaloqatigiinneq oqarasuaatigigut pisoq minutsini 45-ni sivisussuseqarpoq.

Issittumi isumannaallisaanerup annertusarneqarnissaa pingaaruteqartoq, aamma danskit folketingiat akisussaaffimmik suli annerusumik tigusinissaminut piareersimasoq ministeriunerup erseqqissarpaa.

Folketingimi Issittoq pillugu isumannaallisaanermut isumaqatigiissut nutaaq maanna isumaqatiginninniutigineqarpoq, isumaqatigiissutilli pisoqqap 2021-meersup ilaa arlalitsigut suli atuutilersinneqanngilaq.

Pingaartumik dronet ungasissumut ingerlasinnaasut, umiarsuarnut dronet mikinerit aamma Savalimmiunilu radarit Atlantikup avannaani pingaarutilimmik nakkutilliisinnaasut taakku ilagaat.

Politikerit illersornissamillu ilisimasallit naapertorlugit tamanna ajorpoq.

Donald Trumpip tusagassiortunik katersortitsinermi kissaatini piviusunngortinniarlugit sakkutuulersorsinnaanini aningaasatigullu pinngitsaaliilluni iliuuseqarsinnaanini tunuarsimaarfiginagu oqaatiginikuuaa.

Tamanna politikkikkut isumaqatigiissuteqarnissamut periarfissani annertusarniarlugit periarfissat tamaasa ammatinniarai naliliisartut ilaat isumaqarput.

Donald Trump ataasinngorpat USA-mi præsidentinngortussaavoq.

/ritzau/

inuiaqatigiit grønland donald trump arktis mette frederiksen samfund naalakkersuisut

ATORFIIT Se alle jobs

Powered by Labrador CMS