Mette Frederiksen: EU-mi isumannaatsumik killeqarfeqarnissaq siunissaavoq
Ministeriunerup EU-mi suleqatigiinneq nersualaarpaa, killeqarfinnillu nakkutilliinissaq inuiaassutsimillu pingaartitsinissaq pisariaqartutut isigaa.
Ministeriuneq Mette Frederiksenip (S) Danmarkip EU-mi siulittaasuuffeqarnerani pingaarnersiugai saqqummiunniarlugit EU-mi Inatsisartunut saqqummiussiartorluni marlunngornermi Strasbourgimiippoq.
Assi: Jean-Christophe Verhaegen/Ritzau Scanpix
Europa ingerlalluarpat Danmark ingerlalluassaaq.
Ministeriuneq Mette Frederiksen (S) Strasbourgimi EU-p inatsisartuini naggataarutaasumik marlunngornermi oqalugiarnermini oqarpoq.
- Uanga isumanni allamik aqqutissaqanngilaq, tassalu Europami. Europa, Europa, Europa, oqarpoq.
Nunasisut kikkullu nunanut allanut isersinnaanerisa aqunneqartariaqarnerat pingaaruteqartoq ministeriunerup erseqqissarpaa. Naalagaaffiuneq killeqarfinnillu nakkutiginninnerit pingaartillugit oqarpoq.
- Europamik oqarninnut pissutaasoq erseqqissarusuppara, tassalu nunaga tulluusimaarutigeqaara.
- Qallunaajuvunga, Mette Frederiksen oqarpoq.
Taanna naapertorlugu EU-p inatsisartuini politikkikkut gruppit ataasiakkaat Europami unammilligassat tamaasa aaqqissinnaanngilaat.
Naak parteeqatini EU-p inatsisartuini socialdemokraatit gruppianni S&D-mi ilaasortaagaluartut taama oqarpoq.
Danskilli socialdemokraatit politikiat EU-mi inatsisartuni socialdemokraatinit, Danmarkip nunasisunut tunngatillugu sukannerpallaarneranik isornartorsiuisunit, allaanerulluinnarpoq.
- Socialdemokraatiunera nunanit allaneersut pillugit sukannersumik politikkimik upperinninnera pissutaavoq.
Nunasisunut politikki maanna atuuttoq Europami atugarliornerpaanut eqquisoq ministeriuneq isumaqarpoq.
EU-p inatsisartuini ilaasortat partiimik tunuliaqutaat tunuartilaariarlugut pingaarnertut aaqqiivigisassat isiginiarnerusariaqaraat ministeriuneq oqarpoq.
- Ataatsimoortariaqarpugut. Innuttavut naleqartitavullu paarisariaqarpavut aamma Europa paarisariaqarparput.
"Tamanik" suleqateqarnissaq ministeriunerup inatsisartut ataatsimiittarfianiittumut naggataarutigalugu oqaatigaa.
Danmarkip EU-mi siulittaasuuffeqarmernermini EU-mi inatsisartuni ilaasortanut pingaarnersiugai saqqummiukkiartorlugit ministeriuneq Strasbourgimut marlunngornermi aallarpoq.
