“Pereersimasut allanngortissinnaanngilavut. Kisianni akisussaaffik uagut tigorusupparput. Taamaattumik Danmarki sinnerlugu ima oqarusuppunga: Utoqqatserpunga.”
Taama Naalakkersuisut Danmarkimilu ministeriuneq Mette Frederiksen pingasunngornermi tusagassiuutitigut nalunaaruteqarput, taamaalillunilu spiralilersuinermut tunngatillugu utoqqatserneq sivisuumik utaqqisaq naammassineqarpoq.
“Pereersimasut allanngortissinnaanngilavut. Kisianni akisussaaffik uagut tigorusupparput. Taamaattumik Danmarki sinnerlugu ima oqarusuppunga: Utoqqatserpunga.”
Taama Naalakkersuisut Danmarkimilu ministeriuneq Mette Frederiksen pingasunngornermi tusagassiuutitigut nalunaaruteqarput, taamaalillunilu spiralilersuinermut tunngatillugu utoqqatserneq sivisuumik utaqqisaq naammassineqarpoq.
Spiralilersuineq pillugu arlaannaannulluunniit attuumassuteqanngitsumik misissuinerup saqqummiunneqannginnerani utoqqatsertoqarpoq, tamatumalu saniatigut arnat arlallit nunamut namminermut peqqissutsimullu ministeriaqarfik taarsiiffigitinnissamik piumasaqarfigaat.
Aaqqissuussamik assigiinngisitsisimaneq nassuerutigigaa
KNR, Sermitsiaq, DR TV2-lu peqataasoralugit pingasunngornermi ullaakkut tusagassiortunik katersortitsinermi ministeriuneq Mette Frederiksenip Naalakkersuisut siulittaasuat Jens-Frederik Nielsen oqaloqatigisimallugu, arnallu spiralilersorneqarsimasut utoqqatserfigineqarnissaannut maanna piffissanngortoq isumaqatigiillutik oqarpoq. Tamatuma saniatigut utoqqatserneq kalaallinut aaqqissuussamik assigiinngisinneqarsimasunut sumiginnagaasimasunullu aamma atuuppoq.
– Danmark sinnerlugu utoqqatserusuppunga. Utoqqatserneralu arnanut kalaallinullu, allanit allaanerulluinnartumik pineqartarsimasunut, tunngavoq, ministeriuneq tusagassiortunik katersortitsinermi oqarpoq.
Aningaasanik taarsiissuteqarnissaq pillugu oqaloqatigiinnerit
Utoqqatserneq arnat akisussaaffiannik iperaanermik isumaqassasoq ministeriunerup neriuutigaa, tamatumalu saniatigut Naalakkersuisut peqatigalugit aningaasanik taarsiissuteqarnissamik apeqqutillu allat qanoq iliuuseqarfigineqarsinnaanerannik oqaluuserinninniarpoq.
– Eqqartuussivinni suliat ingerlapput. Tamakku akuliuffiginngilakka. Qanorli pitsaanerpaamik iliuuseqarfigisinnaaneripput oqaloqatigiissutiginiarlugu Naalakkersuisut siulittaasuat isumaqatigiissutigaara. Tamatumunnga tunngatillugu kukkusoqangaatsiarsimavoq. Killitsisimangaatsiarpunga, aammali inuit arnallu annertuumik pilliuteqarsimasut pillugit killitsisimajuarnikuuvunga. Utoqqatsernissaq eqqortuuvoq, aammali Naalakkersuisut peqatigalugit Kalaallit Nunaat, Danmark Naalagaaffeqatigiinnerlu qanoq pitsaanerpaamik ingerlaqqissinnaanersut paasiniarlugu piffissaqartariaqarpugut.
Inuiaqatigiinni ikit ammasut
Kalaallit Nunaata Danmarkillu suleqatigiinnerat eqqarsaatigalugu arnat spiralilersorneqarsimasut utoqqatserfigineqarnissaat pisariaqartoq Jens-Frederik Nielsen siornatigut oqarnikuuvoq. Mette Frederiksen tamatumunnga isumaqataavoq.
– Siusinnerusukkut ataatsimoorluta misigisimasavut sapiilluta misissorsinnaagutsigit ataatsimoorluta pitsaasumik suleqatigiissinnaasugut uanga nammineq isumaqarpunga. Ajortumillu pisoqarsimavoq, spiralilersuinerlu pillugu suliaq kalaallit inuiaqatigiivinut ikiusoq ammasoq qularutissaanngilaq. Danmarki utoqqatsernissamut sapiissuseqassasoq ikip mamitsinneqarnissaanut pisariaqarpoq. Ullumikkut taamaaliorpugut. Kalaallit Nunaallu piffissaq peqqinnissaqarfimmut akisussaaffini pillugu aamma taamaaliortoq nalunngilara.
