Mette Frederiksen: Rusland EU-mi pisunut akuliutissanngilaq

- Rusland Europami pisunut akuliuttariaqanngilaq, ministeriuneq Mette Frederiksen (S) EU-p Bruxellesimi ataatsimeersuarnissaa sioqqullugu sisamanngornermi oqarpoq.

Aamma nunat sorliit EU-mut Natomullu ilaasortaasinnaanersut Ruslandip aalajangersinnaanngikkaa erseqqissarpaa.

- Angutip Moskvaminngaanniit EU-mi Nato-miluunniit siunissaq pillugu aalajangiisarnissaa Europap soorunami akuerissanngilaa, taamaattoqassappammi ajorsassaagut, Mette Frederiksen oqarpoq.

Ullumi ataatsimeersuarnermi Europami siuttut Europap sakkulersorneqarnissaa eqqartussavaat.

Rusland nunap iluani pissutsinut akuliukkumassappat “akuerinagulu ataqqiunnanngikkipput” ministeriuneq oqarpoq.

Præsidenti Vladimir Putini eqqissinissamik isumaqatigiissuteqarusuppat Ruslandi qangalili taamaaliorsimassagaluartoq oqarpoq.

- Ruslandip Europap siunissaa aqukkusuppaa. Taamaattumillu tamanna taama pingaaruteqartigaaq, oqarpoq.

USA-p præsidentiata Donald Trumpip Ukrainep Ruslandillu præsidentii ulluni kingullerni oqarasuaatikkut oqaloqatigalugit sorsuttoqarunnaarallartoqarsinnaanera eqqartorpaa.

Naalagaaffiit siuttui oqaloqatigiinnerminni suna eqqortumik isumaqatigiissutigisimaneraat suli ilisimaneqanngilaq.

Ukrainep præsidentia Volodymyr Zelenskyj EU-mi sisamanngornermi ataatsimeersuarnermi videokkut peqataanissaa naatsorsuutigineqarpoq.

Ulluni 30-ni sakkuaattoqannginnissaa Ukrainep tapersersoraa Ukrainep præsidentiata siusinnerusukkut oqaatiginikuuaa.

Sakkutooqarnikkut eqqisseqatigiinnissamut Rusland piumasaqaateqarpoq, soorlu Ukrainemut sakkunik tunniussisoqassanngitsoq nunallu allat Ukrainemut sakkutooqarnikkut ikiuissanngitsut.

Mette Frederiksen naapertorlugu tamanna Ruslandip eqqissinissamik kissaateqannginneranut uppernarsaataavoq.

- Præsident Trump præsident Putinilu oqaloqatigiinnikuupput. Tamatuma kingorna Rusland qanoq iliorpa? Ukraine qaartartumeeriffigineqarpoq. Russit tungaanniit eqqissinermik takutitsineq eqqumiippoq, Mette Frederiksen isumaqatigiinniarnerit pillugit oqarpoq.

Tysklandip kansleriata Olaf Scholzip Ukrainep sakkutooqarnikkut tapersersortuarnissaa aamma qularutiginngilaa.

- Ukraine eqqissinerup nalaani aamma nukittuumik namminersortumillu sakkutuussaqartariaqarpoq, ataatsimeersuarneq sioqqullugu oqarpoq.

Tysklandip Ukrainemut sakkutooqarnikkut atugassanik aningaasaliissutini 3 milliardit euronik ilaqqammerai ilanngullugu oqaatigaa.

- Pissutsit atukkavut eqqarsaatigalugit tamanna pingaarutilimmik ersersitsivoq, oqarpoq.

Tysklandip akiitsuisa annikillineqarnerata kingorna illersornissamut aningaasartuutinik qaffaasoqarsinnaanngortoq Olaf Scholzip tikkuarpaa.

- Maannakkut Europap qeqqani naalagaaffittut angisuutut iliuuseqarnissatsinnut periarfissaqalerpugut, oqarpoq.

/ritzau/