Ministeriuneq Mette Frederiksen Nuummut aallarpoq
Naalakkersuisut siulittaasussaat Jens-Frederik Nielsen aamma Ministeriuneq Mette Frederiksen ulluni marlunni imminnut ilassiornissaminnut ilinniarnissaminnullu periarfissaqassapput kiisalu Kalaallit Nunaata Danmarkillu suleqatigiinnerat eqqartussamaarpaat. Tamanna pissaaq pisortatigoortumik pituttuinertaqanngitsumik, Inatsisartut suli inissititerneqanngimmata.
Ministeriuneq Mette Frederiksen Kalaallit Nunaannut akuttunngitsumik tikeraartarpoq. Assimi takuneqarsinnaavoq 2023-mi aasaanerani naalagaaffeqatigiinneq pillugu atatsimeeqatigiinnermi Qooqquni ingerlanneqartumi anersaartorfissaqalaartoq.
Assiliisoq (toqqorsivimmit): Leiff Josefsen
Ministeriuneq Mette Frederiksen maanna Nuummut ingerlaarpoq. Tikeraarnera apriilip aappaanniit sisamaata tungaanut pissaaq.
Pingaarnertut siullertullu nunatsinni Naalakkersuisut siulittaasussaat, Jens-Frederik Nielsen ilassiussavaa, taannalu peqatigalugu ilaatigut Kalaallit Nunaata Danmarkillu suleqatigiinnerat oqaluuserissallugu.
- Kalaallit Nunaata Danmarkillu akornanni qanittumik tatigeqatigiinnermik suleqatigiinnerup Jens-Frederik Nielsen aammalu Naalakkersuisut sinnerisa peqatigalugit nanginnissaa qilanaaraara, Ministeriuneq Mette Frederiksen oqarpoq nangillunilu:
- Kalaallit Nunaat maanna pitsaasumik oqartussaaqatigiinneq tunngavigalugu qinersinermik ingerlatseqqammerpoq tamatumalu kingorna siammasissumik naalakkersuisooqatigiilernissamik isumaqatigiissusiortoqaqqammerpoq. Uannut pingaaruteqarpoq piaarnerpaamik tikeraarnissara aammalu Naalakkersuisunut siulittaasunngortussaq ilassiussallugu.
Naalakkersuisunngortussat sinneri aamma naapissavai
Statsministerip tikeraarnissaa pillugu naalakkersuisooqatigiilertussat akornanni isumaqatigiinngittoqarpoq.
Siumut Atassullu tikeraarnissaq apeqquserpaat, taakku isumaqaramik siusippallaartoq innersuussutigalugu Inatsisartut suli inissititerlutik ataatsimiissimannginnerat. Paarlattuanilli naalakkersuisunut siulittaasunngortussaq, Jens-Frederik Nielsen, ministeriunerup tikeraarnissaanut qilanaarpoq.
Pilersaarutilli malinneqassappata, ministeriunerup Jens-Frederik Nielsenip saniatigut aamma Naalakkersuisunngortussat sinneri naapissavai.
Naalakkersuisut siulittaasuat, maanna siulittaasuujunnaartussanngortoq, Múte Bourup Egede (IA) siusinnerusukkut noqqaassuteqarnikuuvoq ersarinnerusumik nipitunerusumillu USA-p kimigiisernera sakkortusiartuinnartoq akiorniarlugu nunarput tapersersorneqartariaqartoq.
Kalaallit Nunaat Kalaallit pigaat
Kalaallit Nunaat Danmarkilu qaammatit arlalissuanngortut ingerlaneranni USA-p præsidentiata sakkortuumik nanertuusersorneqarput, USA-p Kalaallit Nunaat "piginneqatigiissallugu aqussallugulu" sakkortusiartuinnartumik kimigiisermat.
Tamatuma malitsigisaanik sukkasuumik Kalaallit Nunaat Danmarkilu nunarsuarmut takutitseqatigiinnissaminnik pisariaqartitsisut qularnanngilaq, ersersinniarneqarlunilu Kalaallit Nunaat Danmarkilu kialuunniit pinngitsaalisinnaanngikkaa, aammalu Kalaallit Nunaat tassaasoq Kalaallit piat.
- Kalaallit Nunaanni innuttaasut politikkerillu ilungersorlutik sakkortuumik nanertuusersorniarneqarnerminnut akiuunnerminni aqutsinerat ataqqilluinnarpara. Pisoq tamanna politikkikkut partiit akimorlugit ataatsimoornissamut tunngavissiivoq. Taamatuttaaq Naalagaaffeqatigiinnerup iluani nunat akimorlugit ataatsimoornissaq pingaaruteqarpoq. Tamannalu pissaaq ataqqinnittumik naligiissumillu suleqatigiinnikkut, ministeriuneq tikeraarnissaminut atatillugu tusagassiorfinnut nalunaarummi oqaatigaa.
